Pi Rasuri Enari 21

Paulusi na Tirusi kong Kaisarea

1Na Miletusi ama amatewara we amanda warui we embedung we jemaati na Efesusi paya na amasanerarong papea mae amatapai to Kosi. Kamaipai amatapaia amampapa na Radosi, na Radosi amatapaia amampapa na Patara. 2Interi na Patara amatadu kapari pei we do depai to Penisia, impaina amambeita na kapari wadia mae amatapai. 3Interi amatapaia amandeo nutakutu Siprusi to amasaneung dowiri pai mae amatapai topong to Siria. Interi amatapaia amampapa na Tirusi, wo etadaung piwe kapari kiopa. 4Nayana, amandara amampaiyo nyontarai we endoao Yesusi paya kong amanai nayana ape boitu. Duainunung Mamarang pai kewio we ya imbaro esua Paulusi reo riato Yerusalemi pe. 5Interi apa ra kai na yana pa, amanda we amatapai naria ea. We etua Yesusi paya kong ene wawing paya, ene kumai paya enda kong ama rasisu bendari ri waneia. Nayana na kareng pa amamayoi amasaebu mae amantandau kuira we Allai. 6Nayana amatewara piboki we ya, interi Paulusi kong ama amasana kapari pai mae ya kong ene mandarong paya entaweri to manu enempa. 7Na Tirusi amatapaia amampapa na Potolemaisi. Nayana amatapaia amantopang piboki we amaneta wauya mae amanai ape koiri ko ya. 8Interi kamai wadi amatapai ea amampapa na Kaisarea. Amasua to Pilipusi we wiuwu Kawio Weweng wadi ne manu wadi. Iwo nyontarai koiri na embeitu we piana etiri ya na Yerusalemi pa, mae amanai na nemanu wadi ape koiri.1 9Pilipusi wo ne kumai wawing pe manua, ya etadu mambiri na Allai, we engkawio kawio Allai dona we etingkawiora pa.

10Piana ape bototoi amanai nayana pa, nyontarai pei riana Yudea ma iwo nabi dina, anongpei Agabusi.2 11I riawu ama ma. Interi kio Paulusi ne wai we dingkae anerabuang wadi. Wai nini pai dingkae mantau warang kong aengwau, i kewio doyo, “Duainunung Mamarangpai kewio tonina, We ne wai nini pai ingkai nyontarai Yaudi paya na Yerusalemi etingkaei mae etoni wu kawasa ea wauya embarararongpa.” 12Amantarao kawio yana mamo, ama kong nyontarai nayana amatewara imbaromi Paulusi reo riato Yerusalemi pe. 13Mana Paulusi kewio doyo, “Pitoi dona ne mesaipa, metong aneurarongnei tekakutua pa e? Mesaneaoa we yau piana yemang we entapu yau to, kong yemang we ekada na Yerusalemi tutu Sen Yesusi anongne.” 14Tutu Paulusi meidai tarao amane anyaupa, impaina amantopang pianea wei ea wa mae amatoyo, “Tawa parari we Seni aneaoa pa!”

Paulusi pendura kong Yakobusi

15Piana amanai ape bototoipa ra kai na Kaisarea pa amanduasasoni ea, interi amatapai to Yerusalemi. 16Weetua Yesusi pe embetotoi na Kaisarea enda kuira kong ama. Ya enda tutu ama to nyontarai we anong pei Manasoni manu nempai, i wo nyontarai Siprusi dina, i piana rioao Yesusi manyona to. Na ne manupai ingkai amamayoi konti. 17Awe amampapa na Yerusalemi pa, amaneta we endoaoa paya etamang ama na esanerarong we mararising. 18Kamai wadi amanda kuira kong Paulusi wu Yakobusia; we wedung we jemaati na yana pa empandura tato. 19Paulusi kewio sopang piboki weya. Interi kewio na wemai parari piwe Allai nyari we kawasa ea wau ya pa na mariwa we nyari pa. 20Ya entarao kawio yana pa etaparanding Allai. Interi ya engkawio we Paulusi etoyo, “Maneta pa au, au remuaroana we nyontarai Yaudi madupei piana endoaoa Yesusi to. Ya wo nyontarai we etong parari kawio we Musai soipa na wemai di ya. 21Mana nyontarai madupei entaraoa we au bonyau nyontarai Yaudi wauya engkai, we enai na kawasa ea wauya pa, we empika Kawio we Musai soi pa, wo au topana weya imbaro embe sunati ene kumai muang paya pe kong endeo etong parari tane kanang nei pe. 22Nina ne nyontarai Yaudi we piana endoaoa we enai na nina paya ingkai entaraoa we au piana bonta ma nuai na nina pa. Impaina topitotoi rai? 23Impaina, nuari parari piwe amantopana ninapa: Naina ama nyontarai pe embe manua ya piana etong arera wu Seni.3 24Au ruakong ya we metong kanang we mendoipi menetarai pa memarang. Kong au buai ene piwe etingbaita pa imbaro ya engka enduandaung pa. Na toyana pa nyontarai paya kuira endearoana we kawio we entaraoa parari aupa tarai wa. Mae ya esaneaoa konta tutu au wo bongparari kawio we Musai soi pa na wemai di au. 25Mana parari kawasa ea ya paya, we endoaoa pa, piana amantoi arera pea we ya to parari pitoai amangkutua pa. Imbaromi ya etang roweang we etona etisomi nyombatangnai pa pe, etang ria pe, ete etang pieung we emuni mana riapa nainai pe, kong etong manyinyawari pe.”4 26Na apei ea mamo Paulusi kio nyontarai embe manua paya kongti enda, mae i rioipi netaraipai kong embe manua wauya. Interi esua to Allai ne Manu pai mae emberoana we apa totoi kanang endoipi enetarai pai etonia kiai, impaina imami pai nyunung pikika etona pa ki.

Nyontarai Yaudi Entapu Paulusi na Manu Mamarang

27Na a boitu pa ra kikeuwe kaipa, nyontarai Yaudi we enda na Asia ma pa, endeo Paulusi na Allai ne Manu Mamarang wadi. Interi engkawioaya nyontarai we empau peaya imbaro engkayou Paulusi kong ya kuira enda entapuri, 28etanana etoyo, “He nyontarai Israeli pa mia, metapai ma mempata ama! Nyontarai ninipai anemai denyau nyontarai neya engkai we embateta kawasa tanenei kong Kawio we Musai soi pa kong Allai ne Manu Mamarang pai! Kong anei kio nyontarai Yunani paya esua wu Allai ne Manu rarong pai mae etonia keraria!” 29Wo ya piana endeo Toropimusi na Efesusi kong Paulusi na bendaripai, kong ya etorato Paulusi kiori to Allai ne Manu Mamarang pai rarong wadi.5

30Impaina bendari wadi tantenang donung na nyontarai we engkayou kong etong wawara paya. Interi entapu Paulusi mae empapari tori warui Allai ne Manu Mamarang wadi mae nayana to aturarei baba na Allai ne Manu Mamarang pa kai esui. 31Nyontarai paya esamupa we emung Paulusi, mana nyontarai pei depaia sopana we wewedung we pimamuna Roma paya we bendari Yerusalemi donung na nyontarai weetong wawara paya. 32We wedung we pimamuna paya kio perwira pa embetotoi kong pimamuna pea etapai emararu to nu we nyontarai paya etongamuna nai pai. Na awe nyontarai paya endeo wewedung pai kong ne pimamuna paya pa, ya empo we endora Paulusi. 33Wewedung we pimamuna wadi ria kikeu Paulusi, tepuri mae demi ya engkaei na wai rantepe kodu. Interi dutani doyo matei au kong pitoai bonapa. 34Mana naina nyontarai we empau wauya eayati etanana tonina, eayati etanana toyana, donane entawa embawari pa, dona wewedung wadi anekaeng kong riuinari pitoiai we rangwe ya endora Paulusi wea tuturapa. Tutu i demi pimamuna wauya we engko Paulusi to ene markasi paia. 35Enda sisu tei wadi mamo nyontarai wauya embatiteta ya impaina pimamuna paya esadowari toyeia. 36Rai tau etuari mae etanana etoyo, “Memunia!”

Paulusi dewara kewio

37Awe engko Paulusi esuato markasi wadi, i kewio we wewedung we rai wadi doyo, “Yaie topino etopang pianea we aukie?” Wewedung wadi kewio doyo, “Au kowio na kawio Yunanie? 38Impaina au nyontarai Mesiri pi di au wa e? We pampompe dong amuna kong kio nyontarai pe piaring we ura we manua (4,000) we etosaepi na apai ambe to mapangpai di au wa e?” 39Paulusi kewio doyo, “Yau wo nyontarai Yaudi di yau, na bendari Tarsusi, yau erana na bendari we anong na raora Kilikia. Yau yewara we bong a pea we yau we ekawio we nyontarai empau neya.” 40Interi wewedung we rai mamuna paya dong apea we Paulusi we kewio, impaina ria doa na tei wadi mae doa kewio kemang na warang wau we nyontarai we empau wauya. Piana aidisa, interi kewio na kawio Iberani wea.