Alkitab Bahasa Ansus
Pi Rasuri Enari 22
Paulusi kewio we nyontarai Yaudi paya
Kewio doyo, “Yai pa mia kong netapa mia mentarama, pitoai yo etopana we mia nina we yingba yau ne.” Na awe nyontarai we empau paya entarao Paulusi kewio na kawio Iberani pa, ya aidisa kia. Interi Paulusi kewio doyo, “Yau wo nyontarai Yaudi di yau, yau dukamitebau na bendari Tarsusi na raora Kilikia. Mana ebaba na bendari Yerusalemi nini; Gamalieli denyau yau pitarai parari Kawio we Musai soi kong doni we tantapumi woriai paya pa. Impaina yau wo nyontarai we emarising kia emariwa we Allai parari mia mengkai na a nini.12 Yau piana yongkangkani nyontarai we etua Seni ne Rangpai ki engkada. Etapu muang kong wawing interi yong ya esua to wangka pa.3 Parari pi yana pa, Imami Baba kong Majelisi Akama paya endoa wea mamo embesaksi pararia tato. Wo na ya, yau yewa weraung pei we maneta we na Damsiki kong yau era towana we etapu nyontarai we endoao Seni paya, kong ekoya to Yerusalemi we etadu mambabati pa. Mana na rangpai towana pa, yau piana ekikeu we Damsiki, wake raida to, na tantuma wedea we wieria kia pei wiana rora paima dariwari yau. Na yanato etabari to kakopa wadi mae etarawo nyondaupui pei kewio we yau doyo, ‘Saulus, Sauluse pitoi andi kongkani yau pae?’ Ekawio wei joyo, ‘Tuane, matei di au?’ Nyondapui pai kewio doyo, ‘Yau Yesusi nyontarai Nasareti we kongkani pai di Yau.’ Nyontarai we engkong yau pa, endeo wedea wadi mae ya entarao nyondaupui we kewio kong yau wadi wa. Interi yutani ea yoyo, ‘Seni au ne, pitoai ingkai yonipa?’ Seni kewio doyo, ‘Towa mae wua to Damsiki. Na wana ingkai ei sopana we au pitau we Allai anewe bonapa.’ Tutu wedea wieria pai dona reukamine ereunawa, impaina neu maniwowi we endakong yau enduna waraune mae eting yau to Damsiki.
Na wana nyontarai pei anongpei Ananiasi. I nyontarai we dong parari kawio we Musai soipa na we mai dina. Nyontarai Yaudi we enaina Damsiki paya engkai esomi wei. I riama doa rurang yau mae kewio doyo, Saulus, Sauluse neta pa au, wepa rengkamipa remuna taweriea! Na yanato yau erewoa ea kong ereukakepani. Interi Ananiasi kewio we yau doyo, ‘Allai tantapumi woriai esomi wei pai piana diri au imbaro rearoang pitoai anetatuata pa, kong remo Yesusi, Allai ne Woming pai we dongparari Allai ne anetatuata pa kong taramo Yesusi raupui memeari. Wo au andi we saksi we kowio we nyontarai paya kuira parari pitoai remoa kong we taramoa pa. Pitoai andi bomani eampa e? Towa mae bong nemutarai paia webaptisi kong tondau we Seni imbaro nemu sasari pa dupirandenia.’ Yau etaweri to Yerusalemi ea, kong na awe etandau na Allai ne Manu Mamarang pai toyana pa mamo, Duainunung Mamarang pai yomuo yau. Yau erewo Seni kewio we yau doyo, ‘Pika Yerusalemi moraru, tutu nyontarai nisa entamang we kawio we topana parari Yau pa wa. Yau ekawio yoyo, Senie, ya piana endearona we yau eyuana manu entandau na pa we etapu ya kong eso ya to wangkapai kong eraruba nyontarai we endoao Au paya. Toyana tato na awe Stepanusi emuni pa, mantau yau enai na yana tato kong eroa we mamuni yani. Yau tato yewawu nyontarai we emuni wadi ene asung pa.’ 4 Mana Seni kewio we yau doyo, ‘Ruaki, wo Yau ingkai yemi au woroi warui nina wu kawasa Yaudi wa paya.’ ”
Nyontarai tau paya entarao Paulusi kewio pa, mana na kawio sopana na pui parari doyo ria wu Yaudi wa paya, ya etanana kangkuna etoyo, “Memung nyontarai yani ki warui nunei. I andi mei we wieng wa!”
Na markasi rarong
Ya etanana pampang mae eso ene asung pampangpa kong eso wawu toyei peia. Impaina wewedung na rai wadi dong airora we engko Paulusi to markasipai mae demi ya etutang kakewari kong endarubati na ene wai pirarubata, imbaro esaneaoa we pitoai donane nyontarai we empau wauya etanana wei pa. Mana awe etawi Paulusi we endarubati na ene wai pirarubata pa, Paulusi kewio we perwira we doana yana pai doyo, “Na tane mamba Roma nei mamo, nyontarai pei etiri ne parakara pai wami mae endarubati pampong ne?” Perwira wadi tarao kawio pa impaina ria ra sopana we wewedung na rai wadi doyo, “Tuanie! Pitoai bona tonina pa? Nyontarai nini paiwo nyontarai Roma dina.” Interi we wedung na rai wadi kewio we Paulusi doyo, “Topana we yau, taraie au nyontarai Roma di aue?” Paulusi doyo, “Tarai.” We wedung wadi kewio doyo, “Yau ewe rai Romanei pa na ebai pe we pau kia!” Paulusi kewio doyo, “Mana yauwo dukamitebau we nyontarai Roma.” Na yanato pimamuna we eto etiri Paulusi wauya esutopui, mae we wedung na pimamuna wadi tato metai, tutu piana dawi Paulusi aempa, mana iwo nyontarai Roma dina tato.
Paulusi na Majelisi Akama endenawau
We wedung na pimamuna Roma wauya pai anewe rearong na pitarai we pitoi dona nyontarai Yaudi entubakepang Paulusi wea pa. Impaina na kamai wadi i yau we embedung na imami wauya kong Majelisi Akama paya imbaro empandura. Interi pimamuna pa engko Paulusi tori warui markasi wadi ma arota ya.
Source notes (4)
- Cross-reference Kis. 5:34-39
- Cross-reference Kis. 9:1-19a, 26:4-18
- Cross-reference Kis. 8:3
- Cross-reference Kis. 7:58
Alkitab Bahasa Ansus. Copyright © The Seed Company. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.