Pi Rasuri Enari 23

1Paulusi rekakepang Majelisi Akama paya mae doyo, “Maneta pa mia! Ra sisu a nini pai mamo na aneurarong mantaung nei ereoa we yong parari Allai ne awiapa na wemai.” 2Na awe Paulusi kewio toyana pa, Imami Baba Ananiasi demi nyontarai we doa rurangni pai biananoang Paulusi woreng. 3Mamo Paulusi kewio we Imami Baba pai doyo, “Ingkai Allai riora au, nyontarai we bongayara we moipa au. Au moyoi nayana we bimbu yau na Kawio we Musai soi pa, mana mantau au tato tuarobang mamba pai mae bomi nyontarai nei bia yau.”1 4Nyontarai we engkiria Paulusi wauya engkawio we Paulusi etoyo, “Au totipa Allai ne Imami Baba pai!” 5Paulusi kewio weya doyo, “Yo neta pa mia, yau wo eruinariawa we iwo Imami Baba dina pa. Tarai, we na Weraung Mamarang pai ea entoi topinina: ‘Remo kowio moyawa we embe mananu we kawasa pai ya pe!’ ”2

6Paulusi reoa we nyontarai emayoi na Majerisi Akama paya mamo, eaya na nyontarai embe Saduki kong ea ya tato nyontarai embe Farisi. Impaina kewio weya doyo, “Maneta pa mia, yau wo nyontarai embe Farisi erana mandarong Farisi di yau, mesarota yau to Majelisi Akama pai we entutangkakewa yau nina ne tuturapi aneusara we nyontarai we engkada pa ingkai embeng taweri ea.”3 7Na entaraoa we Paulusi kewio toyana pa, nyontarai embe Farisi paya engkong nyontarai embe Saduki paya embawaweri ya impaina mayoi pandura yani entabau we kodu. 8(Wo nyontarai embe Saduki paya endoaoa we nyontarai we engkada paya embeng taweri ea wa, mampang peaya wa kong duainunung pea wa. Mana nyontarai embe Farisi paya wo endoao piyana pa kuira.)4 9Ai donane entawa etaminduya baba. Nyontarai embe Farisi pe embetotoi yawo embe kuru akama Yaudi, etoa engkawio embaireri we embe Saduki paya etoyo, “Parari ama mamo nyontarai nini pai nyariara pa katea wawiria! Naina duainunung ete mampang pei di kewio wei pa pe.” 10Ya etong amuna baba kia, donane we wedung we pimamuna paya metai we dona emung Paulusi pe. Impaina i demi pimamuna paya enda engko Paulusi warui nyontarai paya ene rabuangpa to ene markasi paia. 11Diru eipa ea mamo Sen Yesusi doa rurang Paurusi kong kewio wei doyo, “Anemurarong pai meitui! Wo parari au piana topang kakera yau na Yerusalemi pa, Au tato ingkai andi topang kakera Yau na bendari Roma pai tato pa.”

Nyontarai Yaudi paya esanerarong koiri we emung Paulusi

12Na kamai eampai nyontarai Yaudi paya epandu ya, kong engkutua we ingkai emung Paulusi. Impaina ya empapora we Allai we emung Paulusi wami mamo, etampi kong etunung wa. 13Nyontarai Yaudi we engkutua we emung Paulusi paya mamo embe piakodu raweina. 14Ya endawu imami we embedung paya kong we embedung na Yaudi paya engkawio etoyo, “Piana amampapora kuirato we amamung Paulusi wami mamo amatampi kong amatunung pianea wa. 15Impaina ninane maneta pa mia kong Majelisi Akama pa mia, mentoi arera pea we metanatua we we wedung we raimamuna pai, metewara imbaro kio Paulusi ria tuturi tewerima arota mia, pianeaketo meto metutangkakewari tuturapi piwe dona pa. Kong amawo amatamani we amamuni na rang rabuangpa.”

16Mana Paulusi anong muang pei na ne rarowawin pai tarao piwe entopana pa. Impaina i ria sopang piana pa we Paulusi na markasi pai. 17Impaina Paulusi yau perwira pei doyo, “Ko aimiomang nini pai wu we wedung we raimamuna waneia, wo do sopang pianea wuria.” 18Perwirapai kio aimiomangpai wu we wedung we raimamuna paia mae doyo, “Paulusi wewe nyaina wangkapai yau kong dewara we yau doyo eratutu aimiomangnei wu iyai auma, i do sopang pianea we au.” 19We wedung we pimamuna pai riuna aimiomangpai warang, undato wararei pa interi dutani doyo “Bo topang pitoi we Yau pa e?” 20Aimiomang pai doyo, “Nyontarai Yaudi embe totoi piana engkawio mai we etewara we yai au, imbaro kamai mamo au aronta Paulusi wu Majelisi Akama paya, parariapino eto etutani aiwara ea. 21Mana yaie remo bongparari piwe etewarapa pe, wo waketo empiakodu raweina yati etanyuing na rang rabuangpa we etoaweti. Ya kuira piana empapora we etampiwa kong etunung wa, ki emung Paulusi wo. Nina mamo piana etamamang to kong etamamang kawio kong mananu pa au.” 22We wedung we raimamuna pai doyo, “Remo topana we ei eampe wo piana ruama topana we yaune to.” Interi demi aimiomangpai teweri ea.

Paulusi etanatui wu Kaisarea

23Interi Komandangpai yau ne perwira pa kodu mae kewio we asaru doyo, “Munduasasoni pimamuna pea we enda kong Paulusi na saraka pe enjatang diru nini pai to Kaisarea. Yatino empiaura kong pimamuna we etapai kudapa piatoru ea ura kong pimamuna we endu wondua pa piaura tato, 24Metong kuda pa ea tato we Paulusi yanai kong mengkori na wemai wu gubernuri Felikia.” 25We wedung we pimamuna pai soi kawio we rotu topinina,

26We wemoi Gubernuri Feliksi au, piboki we au. Na yau Komandang Kaladius Lisiasi.

27Nyontarai nini nyontarai Yaudi paya piana entapuri mae eto emuni, mana yau era emararu kong neu rai mamuna neya ra amatong widori, tutu yau tarawoa we iwo nyontarai Roma dina.

28Yau tato yo etarakamang pitoi donama etintubakepani oapa, Ai donane ekori wu ene Majelisi Akama paya ra. 29Ya etimburi tutura pi we rana Kawio we Musai soipa meari, kong yedu pisarara pea wa we dona mamo dedu mambabati kaida pai ete yua wangka pai pa. 30Interi nyontarai pei sopana we yau, we nyontarai Yaudi paya esanerarong we eto emuni. Aidona ne emararu yemi engkori wu iyai Gubernuri auma nina pa. Mana we nyontarai entubakepani paya piana entopana weya we engko ene kawio entubakepani ea pa wu iyai au. 31Impaina pimamuna paya etong parari kawio we ene komandangpai sopana pa. Interi engko Paulusi warui wangkapai kong engkori na diru yani pai sisu bendari Antipatrisi. 32Kamai pai rai we empau paya empika rai we etapai kuda paya enda topong tutu Paulusi mae mantau ya wo entaweri to ene markasi pai ea. 33Na rai we etapai kuda pa enda sisu Kaisarea mamo engko weraung anatua pai wu gubernuria, kong empika Paulusi wuria. 34Gubernuri deto weraung anatua pai rakaipa mamo, i dutang Paulusi we ria na raora totoi pa. Paulusi sopana wei we i riana raora Kilikia. 35Impaina Gubernuri pai kewio doyo, “Wento! Yau ingkai yiri nemu kawio ne ki, na awe nyontarai etimbu aupa endama sisu nina pa.” Interi i demi endukepang Paulusi na Herodesi ne manupai.