Skip to content
BibleKenya

Alkitab Bahasa Ansus

Pi Rasuri Enari 24

Paulusi na Feliki Renawau

Na ape boring we rama wane, imami baba Ananiasi kong we embedung we Yaudi pa embetotoi kong nyontarai we anemanuainung na mamba Roma pai, we anong pei Tertulusi. Ya embia to Kaisarea we esarota Gubernuri Feliki mae ya etong autang we Paulusi. Interi Kubernuri yau Paulusi ma arota ya, kong Tertulusi kewio subakepang Paulusi doyo, “Tuan Gubernuri we moipa au, na nemu mananu pa raora amanenei we madori. Kong na anemukurayang pa piana kawasa amanempai weng kia. Tau yana pa na nupa totoi ea, amantuang we au kong amatong piboki pampang we au. Mana imbaro amampika nemu apa wa, yau yewara we Tuane taramu amane kawio tanang we amatintuba kamani nina pa. Nyontarai ninipai wo nyontarai wememuna dina kia. Na nunei totoi ea amataduti we dong amuna tawa na nyontarai Yaudi nea. Andi wedung we nyontarai etua nyontarai Nasareti pai ne anyau pa. I dong we unawa na Allai ne Manu Mamarang pai mana amantapuri. Amasanetatuata we amatoyo amangkutu kawio parari Kawio Musai soi we amapa. Mana Lisiasi, wewedung we rai mananu paya meraru ma kiori na we barui warui ama. Kong dewara we nyontarai etimburi paya enda we auma. Impaina tuani mantau au butangkakewari imbaro bodu pitoai amatimburi wei pa.” Nyontarai Yaudi wauya engkonta entubakepang Paulusi mae engkawio endoao piwe Tertulusi sopana pa.

Paulusi kewio biawaweri na Feliki renawau

Interi Gubernuri wadi dong kamang we Paulusi we kewio. Impaina Paulusi kewio doyo, “Tuane, yau aneuaoa we tuani au wo kutu kawio na kawasa Yaudi paya puda dediru bototoi manyona to. Ai donane na aneurarong merarising yau yong kawio we yimpata yau na remuna ne. Tuane mantau au ingkai biria we anemuao parari ape ura ea kodu we rampa, erato Yerusalemi we eyomi na pa. Kong nyontarai Yaudi paya etaduta wa we yong amuna we nyontaraipei ete epanduikui nyontarai peaya amatoamuna na Allai ne Manu Mamarang pai, ete na manu esominai pei wa ete na nu pea wa na bendari pa wa. Ya tato etadu pianeawa we etanyawa we tuani au pitoi ai etona etintubakepang yau wea pa. Yau eroa we tuani au, wo yau eyomi we Allai o amantapumi woria esomi wei pai parari anyau Yesusi we etorato anyau wetarai pina wa. Mana yau eroao kawio tau na Kawio we Musai soi pa kong Weraung na nabi paya entoi pa na Weraung Mamarang pai. Parari ya, yau tato aneusara we ingkai Allai dong nyontarai we engkada paya embeng taweri ea, aino nyontarai we emai paya kong nyontarai we emamuna paya. Topiana yau anemai yosaera we imbaromi aneurarong mantaung nei kekawiri we Allai kong we nyontarai paya. Kong piana pudape bototoi ampa yau era taweri to Yerusalemi eko piwe etona etimpata neu kawasa nea pa kong we yong pikika we Allai pa.1 Na awe nyontarai Yaudi embe totoi na Asia endeo yau na Allai ne Manu Mamarang pai pa, yau wo enari kanang parari Kawio Musai soipa we yupi neutarai pai rakai peina. Kong nyontarai pe empau nayana wa, kong yong amuna pea wa. Nyontarai Yaudi embetotoi we enda na Asia ma pa ki. Yatino esarota au na nina kong etubakepang yau na remunawau nina pa keto. Ete wento nyontarai nisa mantau ya entopana we yai au, wemoyawa totoi ai etaduta na yau pa, na awe arouta Majelisi Akama paya pa. Ete tutu kawio we etopana na awe etimbu yau pa yoyo, Yau eroaoa we nyontarai engkada paya ingkai embeng taweri ea ki.”2

Mana Feliki rekamana tarai parari Yesusi ne Rang Waworu pai, impaina i yui sidang pai toura ki mae kewio doyo, “Metamamang na Lisiasi we wedung we rai mamuna pai riama sisu ninapa, yau ingkai ekutu kawio ne ki.” Interi demi perwira pai riukepang Paulusia nyaina wangkapai na wetapia kong kewio weya, imbaro endeo etong widori warui we empanduya paya we enda wurima we empatari pa.

Paulusi doa na Feliki kong ne wawini Dursilai asaru undenapa

Kong piana ape bototoi ea Feliki riama, kio ne wawini Dursirai, nyontarai Yaudi dina. Feliki demi esau Paulusi interi tarao piwe sopana pa parari roaoa we Yesus Kristusi pa. Mana na awe Paulusi kewio parari tanari wetarai pa, parari tantampira warui weunawa pa kong parari mambabati tataduta na awe Seni riama we kiutu kawio we nyontarai ne tata pai, Feliki metai kia impaina doyo, “Manaing na nina to mae ruanto. Ingkai apei kai yemia esau au ea.” Kong Feliki tato anesara Paulusi dong pe pea wei. Impaina apea mamo Feliki yauwi pampang we kewio konti naria ea. Mana na puda dediru kodu we rampa enduwa Perkius Festusi we riwang Feliki. Feliki nini do kio nyontarai Yaudi paya esanerarong pa, impaina pika Paulusi wiata na wangka rarongpai pampang.

Source notes (2)
  1. Cross-reference Kis. 21:17-28
  2. Cross-reference Kis. 23:6

Alkitab Bahasa Ansus. Copyright © The Seed Company. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.