Pi Rasuri Enari 25

Paulusi kewio we kio ne kawiopa wieita to Kaisari

1Na awe Gubernuri Festusi dedu bendari Kaisarea pa, a pe botoru ea mamo donta warui Kaisarea to Yerusalemi. 2Nayana we embedung we imami kong nyontarai Yaudi we empampong paya endama we esarota Festusi mae engkawio entubakepang Paulusi. 3Etewara na kangkuna we imbaro Gubernuri anerarong pai sawa weya imbaro demi nyontarai engko Paulusi to Yerusalemi; wo ya piana etapa we emuni na rang rabuang pa. 4Mana Festusi kewio doyo, “Paulusi erukepani na Kaisarea wo, kong woroi wa yau ingkai etaweri to wana. 5Impaina metami nyontarai we empampong na mia, enda kuira kong yau to Kaisarea mae entubakepani nayana. 6Festusi nyai a pe injatoru ete ura na Yerusalemi, interi i tewerito Kaisarea ea. Kamaipai do kiutu kawio parari Paulusi impaina demia we engko Paulusi wurima. 7Awe Paulusi piapa na yana pa, nyontarai Yaudi we enda na Yerusalemi ma paya etoawari, kong ya etong kawio we mambapa oi. Mana pi etimburi ea pa etanyawa pianea we denyawa parari pi etimburi ea pa wa.”

8Interi Paulusi Kewio biawaweri doyo, “Yau yong sara pianeawa we Yaudi pa amane Kawio we Musai soi pa ete we Allai ne Manu Mamarang pai ete we Kaisari wa.” 9Mana Festusi do kio nyontarai Yaudi esanerarong pa impaina kewio doyo, “Au boyo ruakonta to Yerusalemia imbaro ekutu nemu kawio pa na wana e?” 10Interi Paulusi kewio doyo, “Yau yoana nina na Majelis Kaisari Roma endena ne kong na nu nini pai, andi metiri yau pa to. Au piana remoaraona we yau yosara pianea wa we nyontarai Yaudi neya pa. 11Impaina tarai wo yau yosara mamba nei kong yong piwe unapa wa ea we yedu mambabati kaida pa, piana yemang to. Mana piwe entubakepang yau wea pa tarai wa mamo, matei tato ne barui pea we dong yau weya wa. Impaina yau yewara we eweita to Kaisari Roma pai we kiutu neu kawio ne napa!” 12Impaina Festusi kewio kong ne we empatari etong anyau wei paya, interi kewio we Paulusi ea doyo, “Au buewara we wueita we Kaisari we kiutu nemu kawio pa, toyana au andi rua aronta Kaisari.”

Paulusi na Agripa kong Bernikei undena wau

13Ape bototoi ea mananu Agripai kong Bernikei unda to Kaisarea we untopang tabea we Festusi. 14Tutu unai ape bototoi na yana, impaina Festusi kewio parari Paulusi ne kawio pa we mananu Agripai doyo, “Na ninane nyontarai pei wangka riuti na awe Feliki we kubernuri pa. 15Na awe enai na Yerusalemi pa mamo we embedung we imami paya kong we embe mananu we nyontarai Yaudi paya etong autang we entubakepang nyontarai wadi mae etewara kong yau imbaro yong mambabati wei. 16Yau etopana weya topino na mamba Roma wadi wo, nyontarai pei etoni dedu mambabati pa wami mamo nyontarai yani dedu awe kewio biawaweri i kong arota we entubakepani paya. 17Impaina awe ya endama mamo nyontarai yani arota nyontarai we entubakepani paya a pai yemang woroi wa ea, kamai wadi yau yeirora nyontarai wauya imbaromi engko Paulusi ma we engkutu ene kawiopa. 18Mana awe we entubakepani wauya etoawari pa, ya engkawio kawio peawa we etimburi napa, tutu yorato dong we moyawa pea parari we aneutatuata pa. 19Ya embatetari pa mamo parari ene anyau akama pai ki kong parari nyontarai we anompei Yesus pai. I wo kedato, mana Paulusi kewio kangkuna we iwo wieng. 20Tutu yau ereukamana wa we topitotoi ingkai yiri parakara ninipai pa, impaina yutang weia we do anewe riato Yerusalemi imbaro yiri parakara wadi na wana. 21Mana Paulusi dewara we kio ne kawio pa wieita to Kaisari, impaina dewara imbaro nyaina wangka pai kio Kaisari kiutu parakara wadi. Impaina yau yeirora imbaro endukepani topong ki yau yedu rangpea we yenatui to Kaisari.” 22Agripai kewio we Festusi doyo, “Yau aneuwe mantau etarawoi.” Festusi doyo, “Kamai kai taramoi ki.”

23Kamai wadi Agripai kong Bernike undama na anang baba usua to rerawuani pengadilan pai, engkuira kong wewedung na pimamuna pai kong nyontarai we empampong na bendari wadi, Festusi deirora imbaro Paulusi arotari. 24Interi Festusi kewio doyo, “Mananu Agripai kong tau we mendama pa mia! Nyontarai nini pai di nyontarai Yaudi nea kuira entubakepani we yau, yatino we na Yerusalemi paya kong we enai na nina paya. Ya etewara kong etanana we i reo wieng woroi eampe. 25Mana yau yeduta wa we i dong pi we moyawa ea we dedu mambabati kaidapa. Kong i memeari kiutua we kio ne kawiopa wieita we Kaisari, impaina yau ekutu we yenatuia arota Kaisari. 26Mana yedu pi moyawa pea wa parari pi etimburi ea pa imbaro etoi pararia wu Kaisaria. Aidonane yau yoni arota mia mengkai, retenang peino we Mananu Agripa au, imbaro piana na aubiri pa, yau tato yedu pianea we etoi pararia. 27Tutu we yau mamo maiwa we yenatu nyontarai wangka riuti pei we Kaisari, napei etoi pisarara we etubakepani ea wa na kawio anatua pai pa.”