Pi Rasuri Enari 26

Paulusi Biawaweri na Agripai renawau

1Mananu Agripai kewio we Paulusi doyo, “Yong a ne we au mantau au kowio we buawaweri au to.” Impaina Paulusi riuwa warangpa dong kamang. Interi kewio sopang piwe dimbo waweri pa doyo, 2“We moi yai mananu Agripa au, yau eruradiduina we yedu piboki kia, wo a nini ekawio ebawaweri yau na yai remuna ne tuturapi pitaubai we nyontarai Yaudi pa etimbu yau tutura ne, 3retenang peino piana mantau au remoaroang nyontarai Yaudi amambeng toane pa kong we dona amamberi waweri ama pa. Impaina yewara kong tuani au, imbaromi taramo aiwarao piwe etopana ne.

4Nyontarai Yaudi neya engkai endearoang yau kong esaneo yau parari topitotoi ewengpa na awe ewe aimiomangpai. Wo na ewe aimiomang pa, yau piana enai kong kawasa tau neu waneya mae na Yerusalemi pa to.1 5Piana manyona pei to endearoang yau. Impaina esanewea mamo, ya engkawio parari yau wo na retenang pa nyontarai embe Farisi. Ama we amambe Farisine amatong parariapi kawio we Musai soipa na wemai kia warui nyontarai Yaudi ea wauya pa.2 6Kong nina ne yau yoa na nina ne we entubakepang yau tutu yau aneusara we arera Allai doni we tantapumi woriai paya pa. 7Arera yani tato andi marandang ura ea kodu Israeli paya esanesari kong etamang we Allai dong parari ne arera yani pai. Impaina ya diru raida esomi we Allai pampang nina pa. Yai Mananu Agripa au, arera yani yau tato eroaoi, aidonane nyontarai Yaudi nea entubakepang yau nina pa. 8Pitoi dona mamo mia mendoaoa wa we Allai dong nyontarai we engkada paya embeng pae? 9Topitotoio mantau yau na pampong aneutatuata we yorato yau andi yemuna kangkuna we ebateta we etua Yesusi nyontarai Nasareti pai ya.3 10Kong piyana pa piana yonato na Yerusalemi. Na weraung we dong paya we yau na we embedung we imami etoni pai, piana yong nyontarai emamarang paya madupei esua to wangkapai. Piyana pa meari wa, yau tato eroaoa we ya engkutu mambabati oya we engkada. 11Yau emungtati we empau wauya na manu entandau napa, imbaro etairora ya we empora pitoai endoaoa pa. Kong na aneurarong dotara oya pa, impaina to bendari ea wauya warui nu Israeli pai yepaia yedawa ya na wana.”

Paulusi kewio parari anetaweri pa kong topitotoi Seni yawi pa.

12Paulusi kewio pampang ea doyo, “Na piyana pa we embedung we imami paya etong airora we yau kong etong weraung we dong paya pei we yau ekori erato bendari Damsiki.4 13Mana Yai Mananu Agripa, na a yani, a we ena na rang rabuang pa piana wo doatera, yau erowo pianei dea wieria wiana rora pai dea raweing wo pai. Dea wadi wieria wari yau kong nyontarai we endakonta wauya. 14Amang kai amantawa to kakopa wadi. Interi yau etarawo nyondaupui pei kewio we yau na kawio Iberani doyo, ‘E Saulus, Sauluse! Pitoandi bongkangkani Yau pae? Au piana bong aseung we mantau au tutu buateta Allai ne awiapa, impaina au ingkai bong uira we mantau au.’ 15Mana ekawio yoyo, ‘Matei au, Tuane?’ Seni kewio doyo, ‘Yau Yesusi we kongkani pai. 16Mana nina ne, yoyo towa mae boa! Yau yenyawa neutarai nei we au we eruwa au we mampata we Yau. Au andi kowio kakera we nyontarai peaya parari piwe anei remoa na Yau pa kong parari pitoai ingkai yenyawa na awe ramawane. 17Yau ingkai empika au warui kawasa Israeli paya kong kawasa peaya we embe Yaudi wa paya. Yau ingkai yemi au ruawu yara, 18we wepa endekami pa imbaro ya entori warui berorangpai wu wedeapai kong entori warui paya Nyombatang pai wu Allai. Imbaro na endoao Yau pa ene sasaripa Yupirandenia mae eruwa ya we neu nyontarai we yirii ya.’ ”

19“Aidonane, Yai Mananu Agripai aune, yau eyerai kangkuna we nukepanao pianyawa we yeduta na Allai pa. 20Kong piana yau ekakera to, retenang we nyontarai na Damsiki, na Yerusalemi kong na raora Yudea tantenang, kong we kawasa we embe Yaudi peaya wa tato, wo andi esanetaweri kong entaweri we Allai mae ya etanyawa na pi etonapa we tarai esanetaweri warui ene sasaripa to. 21Tutu yanapa donane nyontarai Yaudi entapu yau na Allai ne Manu Mamarang pai mae eto emung yau. 22Mana naina Allai ne paya derua yau, impaina yedu eweng ma sisu a nini mae yoa ekakera wu nyontarai we empau paya baba kong maia. Pitoai etopana nina weia wa warui piwe nabipa engkawio kakerapa kong we na Kawio we Musai pa; 23aino Mananu Mampariri we Allai derekamani pai, wo I andi yuira mae Andi we retenang suwi warui kaida pai, imbaro kewio wedea pai we kawasa Yaudi nini kong we kawasa ea ya we embe Yaudi wa pa.”5

Paulusi kewio we Agripai imbaro rioaoa

24Awe Paulusi kewio rai we biawaweri pa, Festusi kewio kangkuna doyo, “Pauluse wowawi! Anyau pitau we boduti pai piana dong aua wowawi!” 25Mana Paulusi kewio doyo, “Festusi we moi pa au! Yau eawawi wa. Kawio we etopana nina tarai kong mati na we aneutatuata mai pa! 26Mananu Agripai tato retawang pinina neto, aidonane ekawio na barui wa wei pa. Yau aneusara we pitoiai etopana nina pa mananu Agripai rearoana to, tutu piwe etopana nina pa tawa na nu anyuingpa wa, mana pi kawasa tau endearoana pina. 27Yai Mananu pa au, roaoa we kawio nabi paya entoi ninae? Yau erewoaroana we au roaoa!” 28Interi Mananu Agripai kewio we Paulusi doyo, “Au borato mawa we bong yau ewe Kresteng na awe wemararue?” 29Paulusi kewio doyo, “Yau etandau we Allai imbaro na awe mararu ete manyonae, Yai au momeari roaoa wa mana tau we mempandu mia na nina ne kong mentarao piwe etopana nina pa, ingkai memparari yau ki, aino wai besi weetawi yau nini pai.” 30Interi Mananu Agripai, gubernuri Festusi kong Bernike, kong we engkai emayoi kuira paya etoa enda tori. 31Na emati toripa, ya engkawio waweria weya etoyo, “Nyontarai ninipai wo dong sara piea wa we dedu mamba baba we kedapa ete dedu wangka pai pa.” 32Interi Agripai kewio we Festusi doyo, “Nyontarai nini kio ne kawio pa wieita to Kaisari, wereria mamo piana empikari to.”