Skip to content
BibleKenya

Alkitab Bahasa Ansus

Pi Rasuri Enari 27

Paulusi Donta to Roma

Na awe Gubernuri kong ne nyontarai we empatari paya engkutu awe rama we Paulusi depai to Italia, impaina Paulusi kong nyontarai pe embetotoi we enai na wangkapai etong ya to perwira we anongpei Yuriusi na pimamuna we etongwido Kaisari pai. Interi yau Lukasi tato ekong Paulusi amambeitao kapari we depai na Adramitiumi ma, mae do depai yua tate bendari wata rire na kareng raora Asia pai, interi amatapai. Aristarkusi, nyontarai we riana raora Makedonia na bendari Tesalonika, derua ama. Kamai pai amasua na bendari Sidoni. Yuliusi dosaiwa Paulusi na wepiboki mae rioa we ria piaio neta we endoao Yesusi paya, imbaromi neta yana paya empatari na piwe do nempa. Na bendari Sidoni amatapai topong. Mana tutu wanang we wia na wapong wadi piaya mana amatapai topong rurang kareng nutakutu Siprusi we wido ama warui wanang wadi. Mae amatapai kutu rawanang we na raora Kilikia kong raora Pampilia doai pa, amatapaia amampapa na bendari Mira, na raora Likia.

Na yanapa perwira wadi dedu kapari pei we depai na Aleksanderia ma mae depai to nu Italia. Interi i dedaungweria ama to kapari wadi. Ape bototoi ea amatapai mana wanang pai wia na kapari pompaima impaina parari amatapai na amanduenang ape bototoi. Na amasaseung era ki amangkikeu bendari Kinidusi. Tutu wanang wadi wia era, impaina amatapai rurang kareng nutakutu Kreta rire worewu Sarmonei. Na aseung wa amatapai amatari worewu wadia amampapa na maro pei anompei Awa Weweng, kikeu bendari Rasea. Na a yani pai, a baba we nyontarai Yaudi paya enari wemadori embepuasa pa piana teweri to. Kong amane a madupei nai ampa to, impaina apa maiwa ea we amatapai topong. Tutu Paulusi kewio yua ya doyo, “Maneta pa mia, meto tatapai mana, yau piana erewoa we ingkai tanai rai aino kapari nei kong piwe kapari kione kong tanduainunung nei tato.” Mana perwira wadi rioao weyiru wadi kong wewedung na kapari wadi warui Paulusi kawio pa. Tutu pelabuang wadi mioya wa we kapari pa awoi na yana na ne aidu wanang wia era peina. Impaina madupei yati endoawe etapai topong kong tatuata ki na bendari Feniksi. Imbaro enai nayana pa ki wanang ne aidu pai wia manaing. Bendari Feniksi mamo pelabuang na nutakutu Kreta kong nu we maro dina, nu weweng we wematani mamo kapari dewoi na wemai. Pelabuang yani kekawiri tete do matani kong tete do wanang marai wadi.

Dowara rawanang

Apeana wemadui inte do wiana do matani pai. Esanetatuata we rawanang medori we etapai to. Impaina ya enduwa kamutupai mae etapai rurang kareng nutakutu Kreta paia.

Mana woroi wami mae dowara wadi wia na nutakutupai ma, esawi we “Dowara Murang Rawanang.” Dowara wadi miung kapari wadi tutu ama. Mae kapari wadi ne mambiri pea wa we depai topong yoa wanang wadi pa, impaina amampika kapari wadi mae wanangpai yowaweri. Impaina amatawoi ya sisu kareng nutakutu kumai pei anong Kaudai, na yana wido ama katea impaina na esaseung enduwa sawadoi pa to kapari wadi. Enduwa sawadoi wadi wu kapari wadi apong, ya engko wai pa we empauwari kapari wadi we piata wido kaparipai. Tutu ya ematai embatia na ruwuang takutu na Sirtisi, impaina empi arawi pa mae empika kapari wadi dewoi wanangpai kiori. Tutu wanang wadi wiaera kong tarowapa yo ama, impaina kamai wadi nyontarai we endupi na kapari wadi engkayai piwe kapari kiopa ea to rawanang wadi. Na awe botoru wadi ya engkayai papusi na kapari wadi na mantau embarami pa. We ape bototoi eampa amandeo wopai wa kong piori koiri wa, mae dowara wia pampang. Impaina amasanesara we amambempa nai. Tutu piana ape bototoi etampi wa, impaina Paulusi tewa doa na enemadupa mae kewio doyo, “Maneta pa mia! Na ayani meto mentarao piwe etopana we mia yanapa kong tatapai warui Kreta wa, mamo dowara yiraibu kapari neia wemunamunai wa kong piwe na kapari nei nai wa. Mana ninane yisua mia wo imbaro mendeo mematai pe, tutu koiri tato na mia ingkai ei nyai ete keda wa, mana kapari nei ki. Tutu diruampe Allai we eyomi wei pai kong we ne yau nei ne mampang pei riama doa rurang yau, mae i kewio doyo, ‘Pauluse remo motai pe! Au andi rua aronta Kaisari. Tutu na Allai ne weweng dona pinoma we au pa, impaina nyontarai we enai na kapari nei kong au, mia mengkai membeng.’ Impaina maneta pa mia, mematai pe mana mesanekangkuna! Tutu yau eroaoa we pitoai Allai sopana we yau pa ingkai tawa pararia. Mana ingkai andi tambatia na kareng pei na nutakutu pei ki.”

Kapari pai kikeu we reipeto

Na diru pe uraya manua to mamo tarowa pa yo ama towana tonina na Rawanang Adriai. Mana piana wake diru rabuang to nyontarai we endupi na kapari wadi amanduradiduina we piana amangkikeu we rei pea to. Interi ya empi wai tatua pei we etintua rawanangpai mamo wa meteri pe piakodu. Woroi wa mae entuati ea mamo wa meteri pe piareia ura. Tutu amamatai amambatia na kami awaing pe, interi ya engkai kamutu pe manua na kapari pui wadi, mae amasanekangkuna we ayaria dea meraru waro. Mana we endupi na kapari wauya aididisi we embawu warui kapari wadi. Ya empi sawadoipa na kapari wadi, etosayara we empi kamutu pei na kapari pom pai. Mana Paulusi kewio we perwira Yuriusi kong ne pimamuna wauya doyo, “Parari ya enai na kapari nei wa mamo, mia metadu membeng pa wa.” Interi pimamuna wauya engkutu wai na sawadoi wadi mae empikari dewoi.

A we ayari do ketuapa, Paulusi pera nyontarai nea we etampi, kewio weya doyo, “Piana ape uraya manua metangpi wa, metanona na mesaneaera miapa. Topiana yau ekawio eyua mia, imbaro mia metangpi wo. Pininane weapi membengpa. Wo na mia nyontarai pei duandaung pa koiri nyai warui dukami pai wa.”

Piana kewio toyana ra kaipa, i kio roti pa mae tendauoa sopang piboki we Allai na engkai endenawau, interi piobabau roti pa interi wiwo we etang. Impaina nyontarai nea engkai emararising taweri ea mae ya etampi tato. Nyontarai we amanai na kapari wadi amampau pa piaura ea piatoru ea ura ea wonang (276). Piana amatampia amamoi to, ya engkai pasibu we engkori na kapari wadi wu rawanang wadi imbaro kapari tepia.

Kapari wiatia

Piana raida to, ya endeo maro pei kong ne kareng we tebora. Ya endearoang rei yani wa, mana ya engkutua we andi engko kapari wadia wiatia na yana. Interi ya empika wai kamutu pa, mae ya esoa to rawang wadi. Nayana ya empika wai bo-iru pai mae entara arawipa ea, imbaro wanang wia mamo kio kapari wadi to kareng reia. Mana ya embatia na ruwuang takutu pei, impaina kapari wadi pompai wiatia na ruwuang pai, mana puipai tawora weitaoia menaing. Na a yani pimamuna pa esanewe emung nyontarai we wangka riuya paya, imbaro nyontarai pea embawua esarosoi pe. Mana perwira wadi anewe dongwido Paulusi. Impaina yowe yana esanewe emamunapa mae deirora imbaro nyontarai esaroesoi yuara paya esaro pampong we empapa to reia, mae nyontarai we esoi uarawapa esoi na wongkia we tababau pa tuwa ea wauya. Na yana ya engkai embeng embeita torei reia.

Alkitab Bahasa Ansus. Copyright © The Seed Company. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.