Pi Rasuri Enari 28

Paulusi Na Maltai

1Na awe amampapa na kareng pa na we piboki pa, nayana amatadu we rei nini pai anong nutakutu Maltai. 2Nyontarai we enai na nutakutu wauya etosaiwara we ama na wemai kia, ya enduri adia baba pei mae empara ama towana tutu piana do myuna kong we madui deaa. 3Na awe Paulusi riurikui ai arirawani pea mae tetuwara wu adia wadia, tutu adia wadi riata paina piara pimamuna pei meti interi keri warakea wadi. 4Nyontarai we enai na nu yani endeo piara wadi yeroi na Paulusi warakea wadi paina, engkawio waweria weya etoyo, “Nyontarai nini pai miungbemuna, tutu i tepira warui wemoya wa na rawanangpai mana tane sen we kiutu kawio na wemai pai pikari wa, impaina demi piara pai keripi imbaro keda.” 5Mana Paulusi kepateta piara wadi to adia wadi rarong mae i ruradiduing ui katea wa. 6Ya etorato Paulusi ingkai warang wadi bebara ete keda tantuma. Mana ya etanona woroi katea mae pianea tawa nai wa, ya esanetaweri ea interi engkawio topino Paulusi wo sen dina. 7Woroi wami warui nu yani pai gubernuri na nutakutu yani ne kakopa pea. Gubernuri yani anongpei Pubriusi, kong I dewa ama na anerarong we piboki we amanai konti na ne manupai ape botoru. 8Na a yani Publiusi tamani wiata tutu yui deninuanang kong yari. Paulusi yua to mandarong nempaia; i tendau kong riuwa warangpa warawawuri kong doni penang. 9Tutu piwe Paulusi nyari we nyontarai yui pai yana, donane nyontarai we esui peaya na nutakutu yani enda wu Paulusi ma kong dosa empanang tato. 10Ya entuang we ama mae na awe amantampira amatapai pa, ya etong pitaubai we amasanewea pa.

Paulusi donta na Malta piapa na Roma

11Yembaipe botoru rakai na nutakutu yanipai pa, interi amasa na kaparipei we depai na Aleksanderia ma, we neaidu we wanang wia era pai piana dewoi na nutakutu wadi. Kapari wadi pompai enduru nyombatangnai Kastori kong Poruksi nai. 12Amampapa amasua na pelabuang bendari Sirakusa mae amanai ape botoru nayana. 13Nayana amatapai rurang kareng pa ki amampapa na bendari Regiumi. Kamai wadi wanang matani wia, impaina amatapai amamararu na ape kodu amampapa na bendari Putioli na raora Italia. 14Na yana amatadu nyontarai we endoao Yesusi peaya, impaina ya etewa ama we amanai ape boitu kong ya. Interi amatapaia amampapa na bendari Roma. 15Maneta we na bendari Roma we endoao Yesusi entarao kawio parari ama, impaina ya endama etamang ama na bendari Manu Awayang Apiusi kong na bendari Hoteri Toru pai. Na awe Paulusi reo ya pa, i dewa piboki we Allai mae anerarongpai piaya ea.

16Awe amampapa na bendari Roma pa, Paulusi empikari nyai meari na manu pei kong pimamuna pei we maninuing oi.

Paulusi kewio kong nyontarai Yaudi na Roma

17Piana a pe botoru ea, Paulusi yau nyontarai we empampong na kawasa Yaudi nayana pa mae ya empandura. Interi Paulusi kewio doyo, “Maneta pa mia! Yau yong sara pianea wa we kawasa tanenei ete we kanang we wia na tantapumi woriai paya ma pai wa, mana entapu yau na Yerusalemi kong etong yau we nyontarai Roma wauya. 18Na awe etiri neu parakara pai pa, ya eto empika yau, wo yau yosara pianea wa we yedu mambabati kaida pa. 19Mana nyontarai mananu Yaudi embateta piyana kia, donane yau yerura parakara wadi we eweita to Kaisari Roma pai ma nina. Yau yong toyana pa tutu we yoyo yerura neu kawasa mantau wadi wa.1 20Aidonane yau yewara kong mia, imbaro erewo mia mae ekawio kong mia. Wo etawi waraune na wai besi pai nina ne tutu eroao Mampariri nyontarai Israeli nei tasanesari we riama periri tata pai pa.”

21Interi ya engkawio wei etoyo, “Amawo amandu arera pei wa na Yudea we entoi parari neta pa au wa. Kong nyontarai pei wa ria na wana ma we kewio kawio we moyawa parari neta pau tato. 22Mana amasane we amantarao parari neta pa au anemuaoa pa, wo ama amangkai piana amantaraoa nyontarai entatipa anyau we neta womi weapa.”

23Interi ya engkutu a pei we empandura kong Paulusi. Na awe engkutui yani pai, nyontarai paya empau kia enda wu Paulusi ema, empandura na nu we Paulusi nyainai pai. Na ayari pai ki rawandeng pa, i kewio suba anyauwa weya parari Allai ne riu we Mananu pa; mae na Kawio we Musai soi pa kong na weraung nabi pa entoi na Weraung Mamarang pai, i tato dosaera we dongsa endoaoa we Yesusi. 24Eayati endoao pitoai Paulusi sopana pa, mana eaya tato endoaoa wa. 25Interi pandura yani esanerarong koiri wa, embateta ya mae interi entatera warui nu yani. Impaina Paulusi sopang kawio nina doyo, “Tarai kia pitoai Duainunung Mamarangpai kewiora na nabi Yesayai we mentapumi woriai paya pa. 262

Allai kewio doyo,

‘Mendara mentopana we kawasa nini metoyo,

Mia ingkai mentaraoa kong mentaraoa, mana mesanebaua wa;

Mia ingkai mendeoa kong mendeoa, mana menduinaria wa.

27Wo kawasa nini esanerarong pa meitui eampa to,

kong engkawung entarakambirei pa eampa,

kong endekamipa engkawung eampa.

Nina tawa imbaro ya embe endekami mana endeoa wa

kong embe entarakambirei mana entaraoa wa,

kong esanetatuata na esanerarong pai mana etong parari Allai wa,

interi ya esanetaweri warui sasari enempa impaina yong ya empanang.’ ”

28Impaina Paulusi kewio weya doyo, “Mentarama! Wo Allai ne Arera Weweng pa parari periri tata pa dona wu kawasa Yaudi wa paya, kong ya ingkai etaraoa mae etong pararia.” [29Paulusi kewio toyana ra kaipa, nyontarai Yaudi paya empika nu yani na esorewaweri ya.]

Paulusi wiuwu Allai ne we Mananupa na Roma

30Paulusi nyaina yana pudape kodu na manu we mantau biaiti pai; i merarising demang nyontarai tau we endawurima paya. 31Na anyuing wa kong aseung pea wa i wiuwu Allai ne riu we Mananupa kong parari Sen Yesus Kristusi we ya.