Lukasi 5

Yesusi diri we etuaripa ya we retenang

(Matiusi 4:18-22; Markusi 1:16-20)

1A peana Yesusi doa na kareng ruru na Genesareti, interi nyontarai we empau enduaidora ya we entarao Allai ne Arera pai. 2Yesusi reo wa kodu wana kareng yani, we emumpi wauya piana embia warui wa wau to mae enai endoipi ene erangpa. 3Yesusi wieita wu wawau ei, Simoni wa nempai, mae demi imbaromi sui wa wadi woroi katea warui kareng wau. Interi I meoi mae denyau nyontarai we empau paya.

4Interi I denyaua kai, kewio we Simoni doyo, “Wo wu wekaria wane, interi muna erangpai we topu diang.”

5Simoni doyo, “Kuruie! Piana diru karapai amamariwa taweriwa mana amatadu piewa, mana Yai bomi ama paina ingkai yau emuna erang nei naria ea.” 6Mae interi ya etongpararia mamo ya entapu diang pitaubai, donane erangpai wateabu. 7Interi ya engkamang we weempandu ya na wa ea wauya, imbaro ya endama empata ya. Mae ya endama paina, empandura esoni diang to wa kodu wau ra kikeu awira. 8Inte Simon Petrusi reopa, suang na Yesusi renawau mae doyo, “Sen rua warui yau, tutu yau wo nyontarai wesasari.”

9Tutu i kong nyontarai tau we empandura kongti embekaeng tutu pitaubai diang we entapu pa. 10Zebedeusi ne kumai Yakobusi kong Yoanesi, we urarua Simoni urongbekaeng tato. Yesusi kewio we Simoni doyo, “'Remo motaipe, na aneito au ingkai yonau mung erang we topu nyontarai.”

11Mae interi ya entui wa wau torei, ya tato empika pitaubai enempa mae etua Yesusi.

Yesusi dong panang we nyontarai we yui pado

(Mat. 8:1-4; Mrk. 1:40-45)

12Na a peana Yesusi nyai na bendari pei rarong, na yana nyontarai muang pei netarai donung na ui pado. Inte reo Yesusi, suang yomi wei na renawau mae dewara konti doyo, “Tuane muaya mamo, bong yau epanang.”

13Interi Yesusi suwa warang waua riu nyontarai nei inte doyo, “Yau emaya, ingkai ponang.” Na peina to ui pado nyai warui. 14Yesusi yua we nyontarai wadi, remo wuwua we eaya pe, interi doyo, “Ruanto, bonyau au we imami pai, inte bong pikika we ponang pa, pikika parari we Musai woretuwarapa. Pikika ninane we kamang weya tutu ponangto.”

15Mana Yesusi ne arera pa muna woroi, impaina dakami tau enda wurima imbaro entaraoi, ma dong panang na ene uipa. 16Interi Ria wu nu we mananopi, imbaro tendau.

Nyontarai piaya we penang

(Matiusi 9:1-8; Markusi 2:1-12)

17Na a peana na Yesusi denyau, nyontarai embe Farisi pitau kong kuru akama Yaudi wau ya emayoi entaraoi. Enda na awa na nu Galilea, na nu Yudea kong na bendari Yerusalemi. Sen ne paya deruari impaina, dong we esui empanang. 18Interi nyontarai peaya, engko nyontarai wepiaya na piwe denanaipai, esera imbaro engkori esua etoni wiana Yesusi renapa. 19Mana engkori esua wa tutu kawasa tau, impaina engkori embeita na tei wadi wu manu wawongpei.

Interi esepa randaung pei, interi empiri na piwe denanapai, na nyontarai pitau enerabuang randana tate Yesusi renapa. 20Mana Yesusi reo piwe etona wau impaina Yesusi rebau endoaoa wau, mae riuwara wei doyo, “Manetai ye! Nemu sasaripa piana epariri to.” 21Mana nyontarai kuru akama Yaudi, kong nyontarai embe Farisi esanetatuata na esanerarong etoyo, “Nyontarai mateidi kengkani Allai nini ne? Mateidi ne paya we periri sasari warui Sen mantauni ne?”

22Mana piana Yesusi aneao piwe esanetatuata, inte kewio wu yara doyo, “Pitoai mesanetatuata na mesanerarongpa?. 23Totoi mawapa joyo, ‘Nemu sasaripa eparirito,’ ete joyo, ‘Towa ruwa andaung buenanaipai mae rua!’ 24Mana imbaro mendeoa na nunei, 1Kumai Nyontarai nei, ne paya we dingperiri sasari.” Impaina Yesusi kewio we nyontarai piaya wadi doyo, “Towato! Ruwa piwe buenanapa, mae toweri wu manu nemupai.”

25Na yanapa, nyontarainei tewa na dakami endenawau, interi riuwa piwe denana mae ria wu ne manu wanea mae deparanding Allai.

26Nyontarai tau kuira esarokutuya, interi etaparanding Allai. Kong emataikangkuna mae etoyo, “A nini amandeo pitaubai we dona amasarokutuya.”

Lewi we yau pe we mananu Kaisari dua Yesusi

(Matiusi 9:9-13; Markusi 2:13-17)

27Topiyana Yesusi meti ria warui nu yani mae reo nyontarai pei, nyontarai weyau wiwai we Mananu Kaisari anong pei Lewi, meyoi na manu weyau wiwai nai pai. Yesusi kewio wuria doyo, “Bua Yau.” 28Toyana Lewi tewa doa ria warui pitaupai, interi duari.

29Interi Lewi dong anani baba we Yesusi na ne manu wadi. Nyontarai tau we esau wiwai kong we enda kontama empandura etampi kuira kongti. 30Nyontarai embe Farisi engkong kuru akama Yaudi etatuwaya we Yesusi ne manarua wauya etoyo, “Pitoi di metampi metunung kong nyontarai esau wiwai kong nyontarai we embesasaripa.”

31Interi Yesusi riuwara weya doyo, “Topino nyontarai we esuiwa, eserai we dosa empanangwa mae nyontarai we esui yati esera we dosa empanang. 32Era manina era eyau nyontarai we emai wa, mae nyontarai wesasari imbaromi esane taweri warui ene sasaripa.”

Yesusi ne anyau we tampo we tatampiwa

(Matiusi 9:14-17; Markusi 2:18-22)

33Nyontarai embe Farisi etutang naria wu Yesusi etoyo, “Nyontarai we etua Yoanisi, ea mamo etampiwa kong esomi mantaung, topiana tato we weetua nyontarai Farisi paya, mae we nemu manarua paya etampi kong etunung.”

34Yesusi riuwara weya na sosiau wadi doyo, “Mia wo metami dakami etampiwa na munara didau wadi, mae muang we ne munara didau wadi nyai konta e? Toyana wa! 35Mana ingkai a wane rama we ne munara nei engkori warui ya, na yana mamo interi etampi wa.”

36I sopang nari sosiau pei ea wu yara doyo, “Nyontarai pei wa, we pioabu asung awarung na asung waworu we dingkapioi na asung tawanei. Toyana mamo, asung we waworunei teabu, kong meiwa na asung we tewanei. 37Topiyana tato, nyontarai pei yoni angguri waworu wu kaketa we tewa wadi, wo ingkai toyana mamo angguri waworu wadi ingkai yai ma dona kaketa wadi teabu, kong angguri wadi tewowu mae kaketa wadi tekakutu. 38Mana angguri we waworu wau wo etoni wiata na kaketa sapi rerawa waworu pino. 39Ma nyontarai pei wa, we dunung angguri tawa, kong ane we dunung angguri we waworu, wo ingkai doyo, ‘Angguri tawa pai wieng raweina.’”