Alkitab Bahasa Ansus
Lukasi 4
Nyombatang aneangkari' Yesusi
(Mat 4:1-22; Mrk 1:12-13)
Na awe Yesusi teweri warui maria Yordani, Sen Allai ne Duainunung Mamarang yumaoi tantenang. Mae Duainunung Mamarangpai kiori to raora we mapang pai. Na yana Nyombatangpai aneangkari Yesusi we a pe piakodu. Na a yani I dampi katea wa, impaina wewi kia. Interi Nyombatang wadi kewio wei doyo, “Au wo Allai Antung diauto? Impaina bomi kaminei we roweang” Yesusi kewio doyo, “Na Weraung Mamarang wadi soi kamana doyo, ‘Nyontarai wau embeng na roweang pa meari wa.1’” Interi Nyombatang wadi kio Yesusi to raora wetedai pei, na yana na katangkawio Nyombatang wadi suba anyau mananu taubai we enai na nunei, raora enempa wei. Nyombatang wadi kewio we Yesusi doyo, “Mananu taubai ene raora wau kong piwe enempa yona kai we Au, tutu taubai ninane etona we yau kong eyona we nyontarai pa matei ea we aneuweni pai. Impaina Au womi we yau mamo, tau ninane ingkai yona we nemu.” Mana Yesusi kewio doyo, “Na Weraung Mamarang entoi kamana etoyo, ‘Auwo tuang weapi Sen Allai, mae mantauni auwo womiwei ki!2’” Interi Nyombatang wadi kio Yesusi to Yerusalemi mae doni nyaina Allai ne Manu wadi wawuang mae kewio wei doyo, “Au Allai Antung di Au e? Pikara tuawa na nina toungna. Wo entoikamana na Weraung Mamarang wadi tonina, ‘Allai ingkai demi ne mampang paya enduwawing Au na embaramipa na wemai,’ mae ya ingkai enduwawing Au na embaramipa, imbaro aemupa ra diang tuba kami wau wa.’” Yesusi kewio doyo, “Na Weraung Mamarang soikamana tonina, ‘Remo anemuangkari Allai pe.’3” Interi Nyombatang wadi aneangkari Yesusia kai na pipatotoi ea, i yutopui warui Yesusi mae demang we a' pea weiya.
Yesusi teweri to Galilea riuwa mariwa nempa
(Mat. 4:12-17; Mrk. 1:14-15)
Interi Yesusi teweri to Galilea, mae Allai Duainunung Mamarang yuma oi. Mae embuwua Yesusi na raora yani tantenang. Na yana Yesusi denyau na nyontarai Yaudi ene manu esomi nai kong nyontarai paya engkai etaparandini.
Nyontarai we empau entampi Yesusi na Nasareti
(Mat. 13:53-58; Mrk. 6:1-6)
Interi Yesusi riato Nasareti, raora we beba nai wadi. Na a sabati Yaudi pai, parari anemai pa, I riato manu nyontarai Yaudi esomi nai pai. I doa we deto Weraung Mamarang, mae etong Weraung na Nabi Yesayai wei. Yepa weraung we esakoyari wadi, I dedu waya we entoi kamana tonina:
“Sen Duainunung Mamarang nyai kong Yau,
wo I piana riuwa Yau we ewuwu arera weweng we nyontarai weengkiaripi.
I demi Yau we ewuwua,
we nyontarai we embana bui ingkai entapira,
mae yong panang we nyontarai endekabe imbaro endeoa naria ea,
kong yong rang we nyontarai we esaseung.
Mae ewuwua a we Sen periri ne kawasa nea, piana ramaneto”.
Interi Yesusi kiapa weraung wadi taweri, mae doni we weenkawio kamani dosaiwari pai, interi meyoi. Nyontarai tau we na manu Yaudi esomi nai wadi esayori kong entaraoi tutu kawio we sopana waupa. Yesusi denyau ya mae doyo, “Rirang we nabi Yesayai sopana na pampompa interi mentaroa na a ninane piana yona maito.” Impaina nyontarai paya kuira esaneato Yesusi mae esaneaeraya tutu kawio we sopana pa weng, impaina etoyo, “I wo Yusupi ne kumai pina ma e?” Impaina kewio weya doyo, “Nina mamo miawo piana mentopang kawio metingtatuata we Yau tonina, ‘Dokteree! Amantarao bong panangpa we nyontarai peaya to, toyana mamo bong panang we mantau nentaraipai. Pitau we amantarao piwe boni tawa tantuma na bendari Kapernaumi pai, bona na nu mantau nemunei tato’”. Interi Yesusi kewio ea mae doyo, “Etopana we mia, tarai nabi pei andi endoaoi na nu nempai wa. Impaina ekawio we mia, tutu kawio we etonapa nina mai. Na pampong yana na Eliai wiengpa mamo, mamang miunawa na nunei puda pe toru, yembai bowonang ma sisu piwawi baba miungkui raora Israeli pai. Na a yana wawing kabongpa madupei na Israeli. Toyanapa tato, Sen Allai demi Eliai we Yaei mieari na yanawa. Mana demi ria wu wawing kabong pai na Sarfati na nu Sidoni pai. Na a pampong Elisai wiengpa mamo nyontarai na Israeli madupei esuipado, mana Elisai dong koiri na ya dedu panangwa, mae Namani nyontarai Siria pai ki andi doni penang pa”. Nyontarai weempandura na manu esomi nai pai entarao Yesusi kawiopa mamo engkayouwi antumba. Impaina entawa etoa mae etadawa Yesusi tori mae engkori wu wepampeng pei na nu bendari yani, we engkayai Yesusi na pampengpai. Mana Yesusi ria na ene madu kuira ria warui ya.
Yesusi dong panang we nyontarai we piwiwiowi esapopari.
(Mrk. 1:21-28)
Interi Yesusi riato bendari Kapernaumia na raora Galilea, waro denyau na a sabati Yaudi pai. Nyontarai paya esaneaera ya tutu kawio anyaupa, tutu kawiopa donung na paya. Na manu esomi nai pai nyontarai pei andi piwiwiowi esapopari, impaina iwo denana kangkuna. Boe! Yesusi nyontarai Nasareti pa au, pitoi boni we ama na ninapa? Auwo ruama borandeni ama e? Yau wo ereu Au: Auwo Kumai Mamarang ruana na Allai ma pa.” Mana Yesusi dedawa piwiwiowi pai doyo, “Aidinau motitori warui!” Impaina piwiwiowi warateta nyontaraipai awau wiata na ene madu kuira, interi metitori mae doni yui wa. Impaina nyontarai paya kuira esarokutuya, mae engkawio waweria weya etoyo, “Katu taraie! Kawiopa totoai tonina! Wo paya pa nainai paina, kewio dintadawa piwiwiowi paya ematitori.” Topiana kawio parari Yesusipa embuwua na raora yani tantenang.
Yesusi dong panang we nyontarai empau
(Matiusi 8:14-17; Markusi 1:29-34)
Interi Yesusi ria warui manu esomi nai pai mae ria wu manu Simoni nempai ya, na yana Simoni neoni netarai kewawora kangkuna impaina etewara we Yesusi imbaro doni penang. Impaina Yesusi ria doa rurang wawing wadi interi dedawa kawaworapai waruia, toyana uipai menaing warui. Wawingpai tewa kaparia ema wesarawiri ya. Piana wopai ria do diruto, nyontarai paya kuira engko nyontarai esui ui pampinoma paya wu Yesusi ma, interi riuwa warampa dupiya kaikoya dong ya empanang. Semi-semi paya emati warui nyontarai we empau paya mae esayau etoyo, “Auwo Sen Allai Antung di Au.” Mana Yesusi kewio miarang ya kong yua ya doyo engkawio wa. Tutu ya endeo we andi wemampariripa.
Yesusi wiuwu Kawio Wewengpa we Yudea tantenang
(Markusi 1:35-39)
Piana raidato interi Yesusi ria wu nupei we menanopi. Mana nyontarai weempau esera Yesusi interi etaduti impaina eto etanangkai Yesusi imbaro reo ria warui ya pe. Mana Yesusi kewio weya doyo, “Anyau Mamarang parari Allai riu we mananupa, ewuwua na bendari pea tato wo aidona mamo Allai demi Yauto nuneima pa.” Na yana Yesusi kewio kakera Kawio Mamarang na manu esomina pa na nu Yudea.
Source notes (3)
- Footnote Ulangan 8:3
- Footnote Ulangan 6:13
- Footnote Ulangan 6:16
Alkitab Bahasa Ansus. Copyright © The Seed Company. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.