Alkitab Bahasa Ansus
Lukasi 3
Arera na Yoanis Pembaptisi
(Matiusi 3:1-12; Markusi 1:1-8; Yohanesi 1:19-28)
Na taumi uraya ring na awe kaisar Tiberiusi riu wemananu na Roma pa, Pontiusi Pilatusi we Gubernuri na Yudea, mae Herodesi wemananu baba na Galilea. Pilipusi, Herodesi netapai wemananu na raora Iturea kong Trakhonitisi, mae Lisaniasi wemananu na Abilene. Na a we Hanasi kong Kayafasi umbe Imami Baba pa, Allai kewio we Yoanesi, Zakariai ne kumai pai na raora wemapang wadi. Interi Yoanisi ria wari raora maria Yordani tantenang kong wiuwu arera na Allai. Yoanisi doyo, “Mesanetaweri warui mene sasaripa mae embebaptisi mia, imbaro Allai dupipira mene sasaripa.” Impaina Yoanesi nini di Allai sopang parari na kawio entoi na weraung nabi Yesayai pa:
“Nyontarai pei yau na mapang wane,
boning rangpai we Seni,
nuari rang pai yeriwang we I.
Berarongpa tuau,
mae wi rewowai bona tabora.
Rang we kapipauri bona ariwang kong
we wekambirirei pa kowung.
Impaina nyontarai paya engkai, ingkai endeo pariri we na Allai pa.”
Nyontarai empau endawu Yoanisi we
webaptisi ya. Yoanisi kewio we ya doyo, “Miawo nyontarai we memamuna! Mana matei sopana we mia we memati warui mambabati na Allaio ingkai riama wane? Impaina meto memati warui mambabati na Allai ingkai riama wane mamo, metanyawa na we metonapa piana mesaneng taweri tarai warui mene sasaripa. Mae mendeo mengkawio na mesanerarongpai, ‘Yau yedu mambabati na Allai wa tutu yauwo erana mandarong Abarami nempai’. Yau ekawio we mia tonina: Allai berui riwang kami nina ra we mandarong Abrami! Tamangnei piana demang na ai rawongpai we etingdowani to. Aipa totoai dong bong we maipea wa mamo, ingkai endowani mae esoi wu adia wadia.” Interi nyontarai nea etutang Yoanesi etoyo, “Impaina pipatotoi ingkai amatonapa?”
Yoanisi daoa weya doyo, “Nyontaraipa matei ne asung pe kodu, mamo dong ei we wekiaripai, mae nyontarai we ne roweang pea mamo wiwo we wekiari roweang pai”.
We esau wiwai we Kaisari wauya endawu Yoanisi konta we webaptisi ya. Etutani etoyo, “Yai Kurue, pipatotoi amatonapa?” Yoanisi daoa wea doyo, “Mendeo mesau raweina warui we piana Kaisari engkutupa.”
Nyontarai pimamuna pea konta, ea etutani etoyo, “Impaina ama mamo, pitoai ingkai amatonapa?” Yoanisi daoa wea doyo, “Mendeo memungtati nyontarai pea ea pe mae mendeo metawa ene ra pa pe, kong metimbu nyontarai pea ya na we maiwa pe, metadu pe na mene gajipa mamo piana maia we mia to!”
Kawasa tau pai etutana waweri ya, we piana Yoanesi nini ene Mananu Mampariri etamamani pai dina pe. Mana Yoanisi daoa weya doyo, “Yau ewe baptisi mia na maria, mae nyontarai we beba rawei nyau nei ingkai riama. Esepa ne wai sapatu pa mamo emaiwa. I ingkai webaptisi mia na Duainunung Mamarang kong adia. Na warangpa riu pirindayang pei we dintiri pasibupa ra mamarang. Pasibu ne enduri kuira na manu pai, mana keang tau pai ingkai enunumi na adia we etayoi wa rarong pa!”
Impaina Yoanisi denyau nyontarai paya na piwe pau ea, na a we wiuwu arera we mai pa. Mana mananu Herodesi, mananu Galilea wadi, Yoanisi yuari tutu riauwo Herodiasi, neta baba pai wawini, kong we dosaepi pau pea ea. Impaina Herodesi mananu wadi keou ya, mamo dosaepi memba naria ea na demi ne rai paya entapu Yoanesi mae engkori to wangka rarong pa.
Yoanisi webaptisi Yesusi
(Matiusi 3:13-17, Markusi 1:9-11; Yohanesi 1:32-34)
Yoanesi engkori to aitamu rarongpa wami mae, i webaptisi kawasa tau kong Yesusi tato. Mae na a we Yesusi tendau na yana pa, rorapai dererai. Mae Allai Duainunung Mamarang perari aya mandung pei wiama meoi na waradara wadi. Interi yondapui pei wiana rorapai doyo, “Neu Kumaipa Au, Au anewo Au. Kong Au aneurarong wieng we Au.”
Yesusi ne Mandarong pina
(Matiusi 1:1-17)
Na a retenang we Yesusi meriwapai, tintatuata mamo ne pudape piarea ura. Parari nyontarai etingtatuata wei, mamo tamani di Yusupi. Yusupi tamanidino Eli, Eli tamani di Matati, Matati tamani di Lewi, Lewi tamani di Marki, Marki tamani di Yanai, Yanai tamani di Yusupi, Yusupi tamani di Matatiasi, Matatiasi tamani di Amosi, Amosi tamani di Nahumi, Nahumi tamani di Esiri, Esiri tamani di Nagai, Nagai tamani di Mati, Mati tamani di Matatiasi, Matatiasi tamani di Semei, Semei tamani di Yoseki, Yoseki tamani di Yodai, Yodai tamani di Yoanani, Yoanani tamani di Resai, Resai tamani di Zerubabeli, Zerubabeli tamani di Sealieri, Sealieri tamani di Neri, Neri tamani di Marki, Marki tamani di Adi, Adi tamani di Kosami, Kosami tamani di Ermadani, Ermadami tamani di Eri, Eri tamani di Yosuai, Yosuai tamani di Erieseri, Erieseri tamani di Yorami, Yorami tamani di Matati, Matati tamani di Lewi, Lewi tamani di Simoni, Simoni tamani di Yehudai, Yehudai tamani di Yusupi, Yusupi tamani di Yonami, Yonami tamani di Eriakimi, Eriakimi tamani di Mereai, Mereai tamani di Matatai, Matatai tamani di Natani, Natani tamani di Dauti, Dauti tamani di Yesi, Yesi tamani di Obeti, Obeti tamani di Boasi, Boasi tamani di Salmoni, Salmoni tamani di Nahasoni, Nahasoni tamani di Aminadapi, Aminadapi tamani di Admini, Admini tamanidi Arni, Arni tamanidi Eseroni, Eseroni tamani di Peresi, Peresi tamani di Yehudai, Yehudai tamani di Yakupi, Yakupi tamani di Isaki, Isaki tamani di Abrahami, Abrahami tamani di Terai, Terai tamani di Nahori, Nahori tamani di Seruki, Seruki tamani di Rehui, Rehui tamani di Perehi, Perehi tamani di Eberi, Eberi tamani di Serahi, Serahi tamani di Kenani, Kenani tamani di Afahati, Afahati tamani di Semi, Semi tamani di Noaki, Noaki tamani di Lameki, Lameki tamani di Metusaraki, Metusaraki tamani di Henoki, Henoki tamani di Yereti, Yereti tamani di Mahalaleri, Mahalaleri tamani di Kenani, Kenani tamani di Enosi, Enosi tamani di Seti, Seti tamani Adami, Adami tamani di Sen Allai.
Alkitab Bahasa Ansus. Copyright © The Seed Company. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.