Alkitab Bahasa Ansus
Lukasi 2
Yesus nyani dawini
(Matiusi 1:18-25)
A peana to Kaisar Agustusi woretuwara, entoikamang kawasa na nu Roma tantenang. Ninane entoikamana retenang na awe Kireniusi we mananu na raora Siria. Topiana kawasa enda entoikamasa na bendari mantaung enempa.
Topiyana pa Yusupi donda warui bendari Nasareti na Galilea wu Yudea to 1bendari Dauti we anong Betlehemi, tutu i mamo na mandarong aiwawing Dauti, imbaro entoikamani kong Mariai weanombei we piana deyoato. Undara sisu bendari Betlehemi paina, dedu awe Mariai deiwawing. Ma i dawing kumai muangpei, kumai retenang. Yesani na asung rarai mae doni wiana wonyai piaung etampi nai wadi, tutu nu pea wea wa na manu endama etena nai pai.
We etaiwai pieung kong mampang
Na raora Betlehemi mamo, we eteung pieung pea enai na mapang embido taubai pieung eneng na a diru. Interi Seni ne mampangpei doa tantuma kikeu weya, mae Sen ne wedea wido ya, impaina ematai kia. Interi mampang wadi kewio wu ya doyo, “Memataiwa tutu tarai yau eweroana we mia kawio mararising baba we kawasa wepau na nunei A nini weperiri mia piana nyani dawini to na bendari Dauti iwo Kristusi, Seni pina. Mae nini kamang we mia, ingkai metadu kumai mararia pei yesani na asung rarai, mae wiana wonyai pieung etampi nai wadi.” Mae tantuma pandura kong mampang wau pitaubai rai rora we etaparanding Allai etoyo, “Mararising we Allai na rora wetadai, ma piboki na nunei na raora nyontarai we Allai aneoya.”
Interi mampang wauya enda warui ya mae entaweri to rora-marising, weeteung pieung ne engkawio waweria wea etoyo, “Mendama tanda to Betlehemi imbaro tandeo pitoi wepi na wana, parari we Seni weroana we tata pa.”
Interi ya embawoa enda etadu Mariai kong Yusupi kong mararia wadi, we wiana wonyai pieung etampina rarong.
Na awe ya endeoipa, ya emberoang pitoi aino piana mampang emberoana wea tutu mararia wadi. Mae nyontarai pitau we entaraoa paya, etakakaera tutu piwe sopana we weeteung pieung wau entopanapa. Mana Mariai anekakepang kawio pitaubai nina na anerarong mae anetatuata. Mae weeteung pieung wauya entaweri mae etaparanding kong esomi Sen Allai, tutu pitaubai we entaraoa kong endeoapa kai, parari we mampang pai sopana weya pa.
Yesusi esau anongpa oi
Interi Kumaipai ne ape injatoru mamo, ape mai we wesunati mae esawi na anong Yesusi. Anongo mampangpai dona pa na awe Mariai deiyoai wamipa. Mariai ne awau piakodu ra mai we yoikaru, parari Kawio we Musai soi pa. Impaina Yusupi kong Mariai ungko kumai wadi to Yerusalemi mae uroa tuturi we Seni. Na arera we rana Sen Allai dona we Musai soipa riotu tonina, “Na kumai muang retenang paya, eandi engko ya wu Senpai.” Tau we urona nina parari Weraung we Musai soipai. Interi ungko aya mandung kumai pe kodu we pikika parari arerapa. Na a yani na Yerusalemi nyontarai pei anong pei Simeoni. I wo anesarao Allai mae mei. Kong demang a we Allai periri Israeli paya. Duainunung Mamarangpai duari, mae Allai Duainunung piana kewio aroana wei, wo i ingkai kedawa wami kio i reo Mampariri we Sen derekamani we riama pai. Allai Duainunung yiru Simeoni, ria yua na Sen Ne Manu rarongpa. Na a' yani Yusupi kong Mariai ungko Yesusi yua wu Sen ne manu rarongpa kuira, we uroa tuturi we Seni parari kamang weraung Musai soipa. Interi Simeoni yideu kumai wadi mae deparinding Allai doyo,
“Seni, Au piana bong parari arera topana pa to,
impaina pika yau ekada na wemai.
Wo Mampariri ria na Au pa ma nei,
ereuwoi na reukami neu ne to.
Weperiri piana kemani we kawasa we pau na nunei,
parariapi dea we Allai doni wedea we marandang wenari warui Israeli.
Kong kia dea we Nemu nyontarai Israeli paya.”
Mae tamani kong nyani usarokutuya untarao piwe Simeoni sopana we Kumai wadi. Simeoni tendau waro Allai myuang ya, mae kewio we Mariai doyo, “Allai piana diri Kumainei we dona mamo, nyontarai Israeli ne ea ya etadu we moyawa mae eaya etadu we weweng. I perari kamang we rana Allai we disua nyontarai etosara ya, mae ingkai nyontarai peaya embatetari, interi kawasa nei kuira, esaneaoa we pi nyontarai esanetatuapa mamo moyawa. Kong Maria au, anemurarong tekakutu parari sondu diang anemurarompai.” Na yana tato nabi wawing pei Anong pei Hanai. Tamani anompei Fanueli, na mandarong Aseri. Hanai nini wepaituang sera. Didaua ne puda pe boitu, ne muangpai keda warui. Interi nina i ne pudape piamanua ea manua (84) mana wekabong. I wo diru raida mamo, pika Allai Ne Manu wadi wa. Na a yani i ria to yana dong taparanding Allai, mae kewio pararia we kumai wadi we nyontarai tau we etamang we awe Allai periri Yerusalemi pa.
Taweri to Nasareti
Yusupi kong Mariai urong pararia kuira kai, arera we na weraung Musai soi ma etong pararia. Interi entaweri naria ea wu bendari enainai na Nasareti, na raora Galilea. Kumai wadi beba topong mae piaya kaiketara, donung na anetatuatapa kong Allai ne weweng pa wata konti.
Yesus ne pudape uraea kodu na Allai Ne Manu rarong pa
Puda dediru Yesusi inyani, tamani enda to Yerusalemi na a Paska pai, imbaromi etong anani baba esaneao Sen Allai kio rai Israeli paya emati warui raora Mesiri pai. Toyana Yesusi piana ne puda dediru uraya kodu, itongda wu Yerusalemi na a' Paska parari ayanapa. A' wawau ra kai ma itoro itontaweri, mana Yesusi nyai na Yerusalemi. Inyani, tamani undui nariwa. Wo urorato empau paina, andi riadadau dakami we enda kuirapa. Enda a' tantenang pei, interi userai wu uneta mantaung kong aririra wauya. Toyana uraduti wa paina, untaweri wu Yerusalemi ea userai. We pira a botoru uraduti na Sen Ne Manu rarongpa, meoi na kuru akama Yaudi ene rabuang kuira tarao kawio we entopana pa, interi dong autang wu yara. Kawasa tau we entaraoi, esarokutuya na ne weanetatuata kong wesopana wea na weetutanapa. Na yana inyani, tamani undeoi, usarokutuya, interi inyani kewio we ne kumai wadi doyo, “Pitoi dona mamo bongtopi wawau we andu pa? Tamamui kong nyau usarokutuya usera au!”
Riuwara wu asarua doyo, “Pitoi musera yau wei pa? Mundui naria wae yau wo enaipi Yai ne Manu neie?.” Mana usane tatuata ao piwe Yesusi sopana we asaru pawa.
Interi ria kong asaru enda kuira wu Nasaretia, nyai na umbarararong kio beba. Mana inyani anekakepang pitaupa na anerarong. Yesusi beba topong, mae anekurayang kia. Mae Sen Allai kong nyontarai tau esaneoikia.
Source notes (1)
- Footnote Betlehemi esawiwe bendari Dauti wo nyani dawini na peina
Alkitab Bahasa Ansus. Copyright © The Seed Company. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.