Ntogozi 91

Chohile ni mwamizi ywetu

1Akwikala hantu hatondowale hakwe Uyo Ekulanga Vitendese,

nasigaile mwe kudimwa ni Chohile Mta Nguvu Zose,

2nanidahe kumgamba, “Weye wi mwamizi ywangu ne ingome yangu,

Chohile ywangu, hwikiya msuhi wangu.”

3Kwaviya uyo nanambule mwe mtego,

na manyonje yehise.

4Nakugubike kwa mazoya yawe,

hasi ha amawawa yakwenopate sumkilo,

ukanuni wakwe nautende nchinga na ngome yako.

5Nechilo hawogohe kutiswa,

hegu kwebungwa kwa chipumpa nomsi,

6hawogohe buli dikulaila nechilo,

hegu file ikulaila nomsi.

7Hata hegu wantu elufu imwenga wanagwela hampezo hako,

mlongo elufu mkono wako wa kulume,

mna weye hawakulumize.

8Weye nokaule du ivyo wantu wavu wakukantilwa.

9Hegu unamtenda Zumbe Chohile nchinga yako,

Uyo Ekulanga Vitendese kutenda wikazi wako,

10elo, hopate ubanasi wowose,

naho file haisogele he ikaya yako.

11Kwaviya nawalagize awandima wakwe wa kwembingu,

wakwamile mwe izisila zako zose.

12Nawakuguhe mwe imikono yawo,

chani usekwekowadika chako mwe yuwe.

13Nojate simba nkali na nyoka zina sumu,

nosiginte simba nkulu na nyoka zina usungu.

14Chohile agamba, “Naniwambule wadya wose wakununga miye,

naniwadime wadya wose wanimanyize kugamba miye ni Zumbe.

15Umo ananitanga, miye nanimwitike,

nanitende hamwenga naye mwe nkunto,

nanimwambule na kumtunya.

16Nanimjeleke ekalise wikazi mtali,

miye nanimwambule.”