Ntogozi 92

Nchemo ya kumtogola Chohile

1Ni vyedi kumhongeza Zumbe Chohile,

na kudichemela idizina dyako, Weye Wikulanga Vitendese,

2kutambalisa ungi wako mtondo,

ukanuni wako chipindi cha chisingi,

3kwa limba dina nyuzi mlongo,

na kwa izwi dya kilangu.

4Zumbe Chohile, kwaviya ntendwa zako zinelela,

nanizicheme kwa chinyemi izindima zako udamanye.

5Ntendwa zako zikulisa, weye Zumbe! Kaula ivyo zili nkulu izifanyanyi zako,

Fanyanyi zako zizamisa!

6Mhezi hakumanya,

humbwinya hadikukombaganya,

7hata hegu wantu wavu watima saviya mani,

na wata masa wachumilwa,

nawabalangwe kale na kale,

8mna Zumbe Chohile, wimkulu kale na kale.

9Zumbe Chohile, chindedi wankondo wako nawakomwe,

wose wakudamanya yehiye nawahumwe.

10Weye unanguvu enga mbogo,

kunijidila mavuta matana yakusangalaza.

11Meso yangu yawona awankondo wangu wakahudwa,

magutwi yangu yeva indilo yawo wakudamanya wavu.

12Wata uwagilwa nawadindimale saviya mti wa mtende,

nawatende saviya miti ya mwyelezi ya Lebanoni.

13Awo ni saviya miti ihandigwe mwe Inyumba ya Chohile,

nawadindimale mwe izinyuwa ze Inyumba ya Chohile ywetu,

14awo nawajendeleze kweleka ntunda mo udalahala wawo,

nawatende wabisi naho wamema nguvu.

15Wadahe kutambalisa kugamba Chohile kachuma,

luwe lwangu, mndani mwakwe hamna ubunyanyi.