Ntogozi 55

Malombezo ya mntu ahitukwe ni wambuyaze

1Weye Chohile, tegeleza amalombezo yangu,

naho usekubela imilosi yangu!

2Unive naho unihitule,

kwaviya nangadiswa ni fanyanyi zangu.

3Nna nkama kwa vitiso vya wankondo wangu,

na kwa kubunyanywa ni wantu wata wavu.

Wantu wavu wanitumbwadisa,

kwa maya wanidamanyiza wihi.

4Moyo wangu umema chinyulu,

nkama ya file inebunga.

5Nazingiza kwa nkama itendese,

sebungwa ni kutiswa kutendese.

6Hegu nendile,

na mawawa saviya kasuwamanga!

Nasipuluka nite hale hatwete.

7Nasitamba hale vitendese,

na kwika wikazi kwedijangwa.

8Nasisumkila hantu he ugombezi,

hale na nkung'unto na luzimu.

9Weye Zumbe Chohile wazaganye wavu wasekwivana mwe idilonga dyawo!

Nawona unyakwili na nkumbizi mo umzi.

10Chilo na msi vyazunguluka mwe iviwambaza vyakwe,

wavu na ubunyanyi wimndani mwakwe.

11Ubanasi umema chila hantu mo umzi navyo havyusike,

kutisana no udanti havikusila mwe izinkwikwi zakwe.

12Hegu mnkondo ywangu anihulute,

nasijijimiza, hegu mhigani ywangu anibeile,

nasefisa hale naye.

13Mna kumbe ni weye mbuyangu,

ni weye mbuyangu na mnjama mnyangu.

14Suwe nachizwele kutamwila chimbuya,

umo nachikaita mwe bunga dya wantu nachilongozana kwita kwe Inyumba ya Chohile.

15Leka file isunguze kuwalaila awankondo wangu,

wasele hasi kwedibome hedine uhelo wachei wajima,

kwaviya wavu uwamema mgati mwawo.

16Mna miye nanimwitanga Chohile,

uyo Zumbe Chohile nanambule.

17Nafuzuma na kwila chisingi na mtondo na msi,

uyo neve idizwi dyangu.

18Nanambule nikale mpeho mwe inkondo imalanywe kwachausa changu,

hata hegu wantu walozize wanihiga.

19Chohile hekuhitukila akulongoza mazuwa yose,

naweve na kuwakantila, wantu hewekuhituila izisila zawo,

naho hawana nkama ya Chohile.

20Mnyangu awebunga wambuyaze,

naho atula idilagano dyakwe.

21Milosi yakwe ideleka kujinka mabongo,

mna fanyanyi zakwe zegala nkondo.

Milosi yakwe itondowala saviya mavuta,

mna yasenga saviya bamba dikukolesa.

22Mwasize Zumbe imizigo yako,

uyo nakudindimaze,

hamleke mpwii mkanuni ywakwe ahundwe.

23Mna weye Chohile, nowaseleze wavu kwedibome dyo ubanasi.

Wantu awo wakomi na wadanti,

awo hawabule inusu yo uwikazi wawo.

Mna miye nahwikiye msuhi weye Zumbe.