Ntogozi 56

Kulombeza msuhi kwa Chohile

1Weye Chohile, niwonela mbazi,

kwaviya wantu wanebungisa.

Msi wose wankondo wangu wahikiliza kunisulumiza.

2Wadya wakuniziga wanibasa msi wose,

awo wakunebunga chihigane walozesa.

3Weye Chohile Mkulu, hengilwa ni woga,

msuhi wangu naika kwako weye.

4Sika msuhi wangu kwa Chohile na kutogola ulosi wakwe,

sika msuhi kwa Chohile, sanogohe chintu.

Mntu akugojwa ni file nanitende mbwani?

5Msi wose wahituila imilosi yangu,

mizungu yawo yose ni kunikoma.

6Wadugana kumalanya na kuninyatila,

wazuza chila mbuli hudamanya,

waninyatila vileke wanikome.

7Weye Chohile walihe kuligana no wihi wawo,

wagwise kwa maya yako.

8Weye kumanya ukwiingwaingwa kwangu,

waika lukumbusa lwa amesozi yangu yose.

Togola mbuli zose gamba ziwandikwa mwe ichitabu chako?

9Umo halombeza wambizi kwako,

wankondo wangu wavuzwa kunyuma.

Simanya chindedi Chohile entendele yangu.

10Naika msuhi kwa Chohile na kutogola ulosi wakwe.

Naika msuhi kwa Zumbe Chohile na kutogola ulosi wakwe,

naika msuhi kwa Chohile uyo hutogola ulosi wakwe.

11Naika msuhi kwa Chohile sikogoha.

Mntu akugoja file nanitende mbwani?

12Weye Chohile nanchintize inazili yangu kwako,

nahulavize ntambiko za ntogozi.

13Kwaviya kunambula kulawa mwe file,

kunidima nisekwebaja,

nisekugwa hasi, vileke nikale kulongozi kwako,

weye Chohile,

mwe ung'azi wo ujima.