Ntogozi 57

Lombezo dya wambizi

1Uniwonela mbazi, weye Chohile niwonela mbazi,

kwaviya nasumkila kwako nikale mpeho.

Mwe ichizuli cha amawawa yako,

nanisumkile kubula ubanasi ujinke.

2Namwitanga Chohile mkulu,

Chohile akuchintiza viya akunga kwangu.

3Nanigaile wambizi kulawa kwembingu na kunambula,

nawajele soni awo wakuhikiliza kunegona.

Chohile nanilagise mbazi zakwe no ukanuni wakwe.

4Miye sitandamwa ni wankondo,

wata sala saviya simba,

meno yawo yesaviya maguha na mapelege,

malimi yawo nisaviya bamba dikukolesa.

5Weye Chohile utogolwe kulanga kwembingu,

ung'azi wako wenele mweisi yose.

6Wankondo wahinda lwavu vileke wanigwize,

miye nasungulumanya kwa chinyulu.

Wanisimbila bome mwesila yangu,

mna watolobele wowo wenye.

7Weye Chohile, moyo wangu udindimala,

heye moyo wangu udindimala,

nahuchemele na kukutogola weye.

8Inuka weye moyo wangu!

Inukani nyuwe vilangu na mazeze!

Naniyasetule amachelo.

9Weye Zumbe nahutogole mwa awantu we izisi izintuhu,

nahuchemele ntogozi mwa awantu we izisi izintuhu.

10Kwaviya ungi wako wenela kubula kwembingu,

ukanuni wako ubula ko ulanga.

11Weye Chohile utogolwe kulanga kwembingu,

ung'azi wako wenele mweisi yose.