Ntogozi 58

Chohile awakantile wata masa

1Nyuwe masekulu, togolani chindedi mwakantila vikuwagila?

Togolani mwakantila wantu vikuligana?

2Bule! Mwe myoyo yenyu mwatula lulimi,

nyuwe mwadamanya yehiye na unyakwili mweisi.

3Wantu wavu wabanikilwa kukongela kwelekwa kwawo,

ni wadanti, wagilwa kukongela mwe izinda za wamami zawo.

4Wana usungu saviya usungu wa nyoka,

wasita amagutwi yawo saviya myomb usitile amagutwi,

5uwo haukwiva hata chivugo cha mlaguzi,

hegu lungole lwa mgangana.

6Weye Chohile watule ameno yawo,

weye Zumbe Chohile, ng'ola amahasaga yawo.

7Wagile saviya mazi yakunywela mwe isanga,

wakakwesa imisale yawo itende butu.

8Wosike saviya kove dikunyuluka dikajenda,

watende saviya mwana abanikile kundani,

wasekujeza kuwona zuwa.

9Umo izinyungu hezinati kukola moto we izinkuni ze imiwa,

zikatenda zinyala hegu mbisi,

Chohile napempule inyungu nkande heinati kwiva.

10Wakanuni nawelelwe umo wakawona wavu wakakantilwa,

umo wakajata mwe sakame ya wantu wavu.

11Wantu wose nawagambe,

“Taile wakanuni nawenkwe jeleko!

Chindedi kuna Chohile, akuikantila isi!”