Ntogozi 59

Lombezo dya kudimwa ni Chohile

1Weye Chohile, nambula kulawa mwa awankondo wangu,

unidime kulawa mwa awo wakunebunga!

2Unikombola na awantu wakudamanya yehiye,

unambule mwa awo awakomi!

3Kaula ivyo waninyatila vileke wanikome,

wantu awo manyakwili wechisanya hamwenga wakamba wihi mwangu,

miye sibalange hegu kukola masa,

4miye sibalange, mna wekamba wanebunge.

Inuka unambize, uwone ivyo nikailwe vihiye.

5Weye Zumbe Chohile, Mta Nguvu zose,

Chohile ywa Izulaeli!

Inuka uwakantile awantu awo hewekumanyize,

usekuwaleka awo wakudamanya wihi.

6Chila chisingi,

wauya wakabuma saviya makuli,

wakachochola mo umzi.

7Tegeleza chiya chikulawa mwe imilomo yawo ni mahuluto du,

milosi yawo yasenga saviya sime ikukolesa,

naho wafanyanya hahana akuweva.

8Mna weye Zumbe Chohile, wawaseka,

wawatila awantu awo wose hewekumanyize.

9Weye wi nguvu yangu nahugoje,

kwaviya weye Chohile, wingome yangu.

10Chohile ywangu anungisa neze kwangu,

nonitende niwawone wankondo wangu wakahudwa.

11Mna weye Chohile usekusunguza kuwakoma awankondo chani awantu wangu wanase kujala,

mna wangadise kwa udahi wako na kuwaseleza hasi.

Weye Zumbe niweye nchinga yetu.

12Awo wegaila masa wenye kwe imilosi wakulonga kwa milomo yawo,

waleke wagwizwe mo kweduvya kwawo!

Kwachausa cha maligito yawo no udanti wawo wakulonga,

13wabalangwe kwa maya yako,

wabalangwe wasekutendeka vituhu,

vileke wantu wamanye kugamba weye Chohile,

walongoza welekwa wa Yakobo kubula uhelo we isi.

14Chila chisingi,

wauya wakabuma saviya makuli,

wakachochola mo umzi.

15Wadwangaya wakalonda nkande,

wacheleza kubuma hawanegute.

16Mna miye nanicheme ntogozi ze izinguvu zako,

mtondo nahutogole kulanga ungi wako,

kwaviya weye kutenda ngome,

na sumkilo dyangu mwe izinkunto zangu.

17Weye wi nkongelo ye izinguvu zangu,

nahuchemele ntogozi,

mtondo kwa mbazi zako,

kwaviya weye Chohile wi ngome yangu,

Chohile ukunungisa.