Ntogozi 60

Lombezo dya kwambulwa

1Weye Chohile kuchilemela na kuchihonda,

kuchifila maya, haluse hampu chivuze kwako.

2Kusingisa isi na kuitula,

haluse sita amawawi yakwe chani isekubogozoka.

3Kuwajela mwe nkunto awantu wako,

chayumbadika enga chikolwa.

4Wenke chilagiso wadya wakukiya msuhi,

vileke wenege ubanasi.

5Chambule na kuchambiza kwa mkono wako wa kulume,

chani wadya ukungisa wadahe kwambulwa.

6Chohile kalonga kulawa ahantu hakwe hakukile akagamba,

“Haluse naniisange Shekemu kwa mbwedo,

na kuhima Idikolongo dya Sukosi.

7Isi ya Giliyadi ni hantu hangu, na Manase ni yangu,

Manase ni nkofiya yangu ya chuma,

na Yuda ni nkome yangu ya kulongozeza.

8Moabu ni champa changu cha kunawila mazi,

idikwapa dyangu nanididule Edomu chani niiguhe,

nanitowe hugu dya uhuda mwa Wafilisiti.”

9Ni yuhi akunga anigale komzi una ngome?

Ni yuhi akunga anilongoze kubula Edomu?

10Weye Chohile, togola kuchilemela?

Weye hukujesanya vituhu na wagomba nkondo wetu?

11Chambize vituhu mwa awankondo wetu,

kwaviya wambizi wa wantu ni wabule.

12Kwaviya chinatenda hamwenga na Chohile nachipate uhuda,

uyo nawahude awankondo wetu.