Ntogozi 46

Chohile ehamwenga na suwe

1Chohile ni sumkilo dyetu na nguvu yetu,

uyo ni mwambizi ywetu mazuwa yose chipindi cha nkunto.

2Elo, hachogohe,

hata hegu isi ikazingiza,

na amagulu yakasingiswa kulawa kwe ibahali,

3hata hegu amazi ye ibahali yakajumbwanika kwa mawimbi,

na amagulu nayo yanazingiza kwa nkulujumbu yakwe.

4Kuna mto amazi yakwe yaubwedeza umzi wa Chohile,

wikazi ukukise wa Chohile Mkulu Ekulanga Vitendese.

5Chohile eyumo mndani mo umzi, uwo haukudaha kusingiswa,

Chohile nawambize mtondo chilochilo.

6Wantu we izisi ntuhu wogohesa na seuta nazisingisike,

Chohile analonga, isi yalujuka.

7Zumbe Chohile Mta Nguvu zose ehamwenga na suwe,

Chohile ywa Yakobo ni sumkilo dyetu.

8Soni muwone ntendwa za Zumbe Chohile,

kauloni chilozo adamanye mweisi.

9Achindiza nkondo hohose mweisi,

avunavuna myuta na maguha,

atikimya nchinga kwa moto.

10Agamba, “Nyamalani naho mmanye kugamba miye ni Chohile.

Miye natunywa mwe izisi zose,

miye natogolwa mweisi yose.”

11Zumbe Chohile Mta Nguvu Zose ehamwenga,

Chohile ywa Yakobo ni sumkilo dyetu.