Ntogozi 45

Nchemo ya ngasu ya chiuseta

1Moyo wangu umema fanyanyi ntana,

namtungila seuta nchemo ino,

lulimi lwangu ni saviya kalamu ya mta kuwandika adahise.

2Weye wi mtana kujinka wantu wose,

milosi yako ni mbazi izodu.

Kwaviya Chohile kakujimbika mazuwa yose.

3Kwenyinye isime yako weye mkankalu,

weye wimkuka na mta ugoli.

4Ukulu wako wenele utende mhuda,

ukatende kukwela falasi ulagise ukanuni, kunyanyahala na kudima uwagila.

Umkono wako wa kulume udamanye mbuli nkulu.

5Mifulo yako yakolesa,

naho yalasa imyoyo ya awankondo wa seuta,

wantu we izisi ntuhu wagwa hasi he iviga vyako.

6Weye Chohile chigoda chako cho useuta chidindimala,

nachikale mazuwa yose saviya Chohile.

Nkome yo ulongozi wako yalongoza awantu wako kwa uwagila.

7Waunga ukanuni na kwihiwa wavu,

elo, Chohile, Chohile ywako kakusagula,

na kukwinka mbwedo kujinka wambuyazo.

8Iziuche zako zapwepweleka mavuta na udi,

wachemi wakuchemela mwe mazumba yahambigwe kwa ugoli wa ntembo,

maizwi ya mazeze ya nyaya yakutenda ubwede.

9Mgati mwa wakudamanya ndima mwe idizumba dyako dye ichiseuta ni wachiche wa maseuta,

malikiya naye kachimala kulume kwako,

kavala mahambo ya zahabu ntana ilaile Ofili.

10Tegeleza weye mchiche, ufanyanye.

Tega gutwi dyako,

jala awantu wako na awantu we ikaya yako ya tati yako.

11Utana wako wamtamila seuta,

uyo ni mgosiwo. Mtunye uyo.

12Wachiche wa Tilo nawakwigaile majeleko,

wagoli nawaunge wahingizwe ni weye.

13Mchiche ywa seuta engila uyo ni mtana vitendese!

Isuche yakwe isumwa kwa uzi wa zahabu.

14Engila akatenda kavala suche ya langi zilozize,

alongozwa kwa seuta,

kuno ajesanya na wambizi wakwe wachiche weyawe,

iviya nawo wegalwa kwa seuta.

15Nawengizwe mndani kwa nchelejele,

wabula uko wakatenda na chinyemi na mbwedo wengila mwe idizumba dya seuta.

16Weye seuta nopate wana walozize wakunga walongoze hantu ha wakale wako,

nowatende walongoze mweisi mazuwa yose.

17Naniditende idizina dyako dikumbukwe mwe ivyeleko vyose,

elo, wantu we izisi zose nawakutogole kale na kale.