Ntogozi 44

Kulombeza kudimwa ni Chohile

1Weye Zumbe Chohile suwe chiva kwa magutwi yetu,

watati zetu wachigambila,

yadya udamanye,

mbuli udamanye mwe ichipindi chawo,

heye, mbuli zote utendile aho kale.

2Kwamkono wako mwenye kuwabalaza wantu we izisi ntuhu,

mwe ino isi na ahantu hawo niyo wawenka awantu wako,

kuwakantila awantu we izisi ntuhu,

na kuweka kuchumilwa watati zetu.

3Wantu wako hawaguhile isi kwa viziha vyawo,

hegu hawapatile uhuda kwa nguvu zawo wenye,

mna kuwagombela kwa udahi wako mwenye,

kwa kuwalangaziza uso wako,

kwaviya wawaunga.

4Weye wi seuta ywangu na Chohile ywangu,

kuwenka uhuda awelekwa wa Yakobo.

5Kwa udahi wako chawahuda wankondo wetu,

kwa zako chawajata wadya wakuchibela wetu.

6Miye sikuwikiya msuhi uta wangu,

hegu sime yangu haikudaha kunambula,

7Mna ni weye ukuchambula kulawa kwa awankondo wetu,

kuwazaganya wadya wakuchihiwa.

8Mazuwa yose chakutogola weye,

weye Chohile, nachikulavize ntogozi kale na kale.

9Mna haluse kuchasa na kuchileka chihudye,

naho hukujesanya na awagomba nkondo wetu.

10Kuchitenda chiwasumke awankondo wetu,

awo niyo wataha ugoli wetu.

11Kuchitenda saviya ngoto zikwigalwa kwe kuchinjwa,

kuchizagaza mwe izisi ntuhu.

12Kuwataga awantu wako kwa hela njeche,

naho hungile yombe kulu.

13Wehajihi hetu wawona ichisimo udamanye mwetu,

haluse wachitila na kuchiseka.

14Kuchitenda chibelwe ni wantu we izisi ntuhu,

wajeni wasingisa imitwi yawo kwa kuchibela.

15Msi mjima simemwa ni kuhuza,

uso wangu umema soni,

16kwa milosi no ubezi wa wantu wakunihuluta,

kwachausa cha wankondo wangu na wakuniihiwa.

17Mbuli zose izo zichigwela suwe,

hata hegu hachikujaile,

hegu kuvuna idilagano dyako.

18Mna suwe hachikuhituke weye,

hegu kuleka izisila zako.

19Mna kuchasa chibuntika mgati mauzi ya kumbago,

kuchasa mwe ziza.

20Hegu chakwasize weye Chohile ywetu,

na kuvikila mnungu ywa udanti,

21weye Chohile nakuimanya kale imbuli iyo,

kwaviya weye kumanya mbuli zefisize mwe imyoyo.

22Mna kwachausa chako chakomwa chila nkanana,

chawazwa saviya ngoto zikwakuchinjwa.

23Inuka weye Zumbe Chohile!

Ni mbwani wagona?

Chimala! Hampu usekuchidula kale na kale.

24Ni mbwani wafisa uso wako,

na kujala izinkunto na amasulumizo yetu?

25Chigwa hasi ho msanga,

chilagala chifudifudi mwedilumbi.

26Inuka wize uchambize!

Uchikombole kwachausa che izimbazi zako.