Ntogozi 27

Malombezo ya Ntogozi

1Zumbe Chohile ni ulangazi wangu na wambulwa wangu,

nimogohe yuhi?

Zumbe Chohile ni nchinga yo ujima wangu sanogohe mntu yoyose. 2Wehi wananebunga na kujeza kunikoma,

awo awahigani na wankondo wangu nawekobadike na kugwa.

3Hatahegu bunga dya wagomba nkondo dinanebunga ntendele zose,

moyo wangu hawogohe chintu,

hata nkondo ikanilaila,

aho hose nichei na msuhi kwa Chohile.

4Mbuli imwenga humlombeza Zumbe Chohile,

nayo niyo hulonda,

nidahe kwikala mwe Inyumba ya Zumbe Chohile mazuwa yose yo ujima wangu,

niwone utana wakwe Zumbe Chohile,

na kumlonda mwe Inyumba yakwe.

5Mwe zuwa dya nkunto nanifise mo wikazi wakwe,

nanifise mwe idihema dyakwe

nanike mpeho mlanga mwe luwe.

6Elo, kwa uhuda naniwahude,

awankondo wangu wanizunguluke,

mo wikazi wakwe nanilavye ntambiko kwa nchelejele za mbwedo,

nanimchemele na kumtogola Zumbe Chohile.

7Unive, weye Zumbe Chohile,

umo hakwilila niwonela mbazi na kunihitula.

8Umoyo wangu wanigamba, “Soo umlonde Chohile!

Elo, neza kwako weye Zumbe Chohile.”

9Usekunifisiza uso wako.

Usekunilemela kwa maya miye mndima ywako,

weye kutenda wambizi wangu mazuwa yose.

Usekunidula hegu kunasa weye Chohile Mwambula ywangu.

10Hatahegu welesi wangu wakanidula,

Zumbe Chohile nanihokele.

11Nihinya isila yako, weye Zumbe Chohile,

unilongoze mwe sila ichumile,

kwachausa cha wankondo wangu.

12Usekunileka wankondo wanitende viya wakunga,

kwaviya waukuzi wo udanti waninukila,

walonga mbuli za udanti waunga wanilumize.

13Miye nichei na uno umsuhi,

naniuwone wedi wa Zumbe Chohile mwe isi ya wata ujima.

14Mwikiye msuhi Zumbe Chohile!

Udindimale, moyo wako utoge!

Heye mwikiye msuhi Zumbe Chohile.