Ntogozi 26

Malombezo ya mntu ywedi

1Weye Zumbe Chohile nigombela,

kwaviya nadamanya yedi,

naho sikwikiya msuhi weye hehena kudegadega.

2Weye Zumbe nijeza na kunihima,

uzuze umoyo wangu ne izifanyanyi zangu.

3Kwaviya ungi wako wi kulongozi kwangu mazuwa yose,

nami nekala kulawana no ukanuni wako.

4Sikwikala hamwenga na wantu wakulonga udanti,

naho sikutimilizana na wantu wakusezenga.

5Nehiwa mabunga ya wantu wehi,

naho nalemela kwikala hamwenga na wavu.

6Elo, nasunta imikono yangu kulagisa kugamba sina mlema,

na kusogela hajihi ne imazabahu yako, weye Zumbe Chohile,

7chani nitambalise kukuhongeza kwa izwi kulu,

na kutamwila ntendwa zako zose zikwehela.

8Weye Zumbe Chohile, nayungisa inyumba yako hantu ukwikala,

hantu hakwikala ukuka wako.

9Usekunikoma hamwenga na wantu wata masa

naho usekunidula hamwenga na wakomi,

10wantu awo ntendwa zawo ni wavu mazuwa yose

wantu wamemile kufumbaswa.

11Mna miye nekala wikazi hewine mlema,

niwonela mbazi naho unambule.

12Miye sichimala hantu hakulumbale,

nahutogole Zumbe Chohile mwe bunga dikulise.