Ntogozi 25

Kulombeza ulongozi na wamizi wa Chohile

1Kwako weye Zumbe Chohile,

naonyekeza untu wangu,

2ni weye hwikiya msuhi,

Weye Chohile ywangu,

usekunileka ningile soni,

naho usekuleka wankondo wangu welelwe umo wakanihuda.

3Usekumleka hata yumwe akwika msuhi kwako engile soni,

mna nawajelwe soni wadya wakukulemela kasidi.

4Nilagisa izisila zako,

Weye Zumbe Chohile,

nihinya nidamanye viya ukunga.

5Nilongoza mwe ichindedi chako na kunihinya,

kwaviya weye wi Chohile Mwamula ywangu,

msuhi wangu wi kwako mazuwa yose.

6Kumbuka mbazi zilozize na ungi wako mkulu,

weye Zumbe Chohile,

kwaviya vyendaga kukongela chikale.

7Usekukumbuka masa yo ubwanga wangu,

hegu sila zangu za wavu,

nikumbuka kuligana no ungi wako,

kwaviya weye Zumbe Chohile wi ywedi.

8Zumbe Chohile ni ywedi naho kachuma,

elo, awahinya wata masa izisila zakwe.

9Awalongoza wakunyanyaha mwe uwagila,

uyo awahinya awo izisila zakwe.

10Sila zose za Zumbe Chohile ni za ungi no ukanuni,

kwa wadya wakutoza indagano na amalagizo yakwe.

11Weye Zumbe Chohile, kwachausa che idizina dyako, unilekeile amasa yangu, kwaviya ikulisa.

12Chila mntu akumvikila Zumbe Chohile,

Zumbe Chohile namhinye isila yo kujinkila.

13Mntu uyo nachumilwe mo wikazi wakwe,

na awelekwa wakwe nawalisi isi.

14Zumbe Chohile awalongoza wadya wakumogoha,

uyo awagambila yadya yakungwa mwe idilagano dyakwe.

15Meso yangu yamkaula Zumbe mazuwa yose,

uyo ichedu nuyo navyambule iviga vyangu mwe mtego.

16Nihitukila weye Chohile, uniwonele mbazi,

kwaviya miye nichedu naho nabunyanywa.

17Nusiza kwangadika mo umoyo wangu,

nambula kulawa mwe izinkunto zangu.

18Ukaule amasulumizo yangu ne izinkunto zangu,

na unilekeile amasa yangu yose.

19Kaula awankondo wangu ivyo walozize,

naho kaula ivyo wakunihiwa waunga wanilumize.

20Dima uwikazi wangu na kunambula,

usekunileka ningile soni,

kwaviya sisumkila ugombezi kwako.

21Wedi no ukanuni vinidime,

kwaviya msuhi wangu wi kwako.

22Weye Chohile wambule awantu wako wa Izulaeli kulawa mwe izinkunto zawo zose.