Ntogozi 24

Seuta Mkulu

1Isi ne ivintu viyumo mndani ni vyakwe Zumbe Chohile,

si na wose wakwikala mndani mwakwe ni ugoli wakwe.

2Kwaviya kaika ivyegamo vyakwe mwe ibahali,

iyo aidindimaza mlanga mwe mito ya mazi.

3Ni yuhi akudaha kulukwela ulugulu lwa Zumbe Chohile?

Ni yuhi akudaha kuchimala ahantu hakwe hakukile?

4Ni yudya mta ntendwa zedi na moyo wedi,

ni yudya hekuhingiza umoyo wakwe mwe uhezi,

hegu kwelisa kwa udanti.

5Uyo nahokele ujimbiko kwa Zumbe Chohile,

na nkanto ikuwagila kulawa kwa Chohile mwambula.

6Awo nawo icheleko cha wantu wakumlonda Zumbe,

wakwiza ko uwiyaho wako, Weye Chohile ywa Yakobo.

7Inulani imitwi yenyu, nyuwe nyivi,

vugukani nyuwe nyivi za chikale,

chani Seuta akukile engile.

8Uyo Seuta akukile ni yuhi?

Ni Zumbe Chohile mta nguvu na udahi,

ni Zumbe Chohile mkankalu ywa nkondo.

9Vugukani nyuwe nyivi,

vugukani nyuwe nyivi za chikale,

chani Seuta akukile engile.

10Ni yuhi uyo Seuta akukile?

Ni Zumbe Chohile Mta Nguvu zose,

uyo nuyo Seuta akukile.