Ntogozi 28

Lombeza dya wambizi

1Nakwitanga weye Zumbe Chohile weye luwe lwa ugombezi wangu,

usekutenda saviya hukuniva,

hegu sivyo huna nambize

nanitende mwa wadya waseile kale kwedibome dya wabanike.

2Tegeleza indilo yangu unifile mbazi,

hakwitanga kwachausa cha kunga wambizi,

henula mikono yangu

kuhinga hantu hako he Inyumba Ikukile.

3Usekunikantila hamwenga na wantu wehi wakutenda wavu,

wantu wakulonga na weyawe mbuli za utondowazi,

mna mwe myoyo yawe wamema wihi.

4Wakantile kuligana ne izintendwa zawo,

kuligana na ntendwa zawo zihiye,

walihe kuligana ne izitendwa ze imikono yawo,

walihe viya vikuwawagila.

5Kwaviya hawakutunya izindima za Zumbe Chohile,

hawakukombaganya mbuli atendile,

elo, kwachausa icho nawakome mazuwa yose.

6Atogolwe Zumbe Chohile,

kwaviya keva lombezo dyangu dya kunga wambizi.

7Zumbe Chohile aninka nguvu na kunidima,

namwikiya msuhi wo umoyo wangu wose.

Kanambula moyo wangu umema mbwedo,

nanimhongeze kwa nchemo ya chinyemi.

8Zumbe Chohile awenka nguvu awantu wakwe,

uyo amdima na kumwambula seuta ywakwe asagule.

9Weye Zumbe Chohile wambule awantu wako,

wajimbike wano awantu wako,

tenda mdimi ywawo na kuwegamiza mazuwa yose.