Ntogozi 29

Izwi dya Chohile dyaluluma

1Mtogololeni Zumbe Chohile nyuwe vyumbe vya kwembingu,

tunyani ukulu wakwe ne izinguvu.

2Ditogoleni idizina dya Zumbe Chohile dikulisa.

Mvikileni Zumbe Chohile mwa ahantu hakwe hakukile.

3Izwi dya Zumbe Chohile dyevika mlanga mwe mazi.

Chohile mng'azi alulumiza mbaula,

izwi dya Zumbe Chohile dyevika mlanga mwe mazi yalozize.

4Izwi dya Zumbe Chohile dina nguvu,

izwi dya Zumbe Chohile dimema ung'azi.

5Izwi dya Zumbe Chohile dyatula miti ya myelezi,

Zumbe Chohile atula vihanehande imiti ikwitangwa myelezi ya Lebanoni.

6Apilisa amagulu ya Lebanoni saviya ndama,

naho atenda ulugulu lwa Helimoni lupilike saviya mwana mbogo.

7Izwi dya Zumbe Chohile dyalavya lumwemwe.

8Izwi dya Zumbe Chohile dyasingisa jangwa,

Zumbe Chohile asingisa Jangwa dya Kadeshi. 9Izwi dya Zumbe Chohile dyasingisa miti ya mivule,

dyahanyula mani ye miti kumbago,

mwe Inyumba yakwe wose wagamba,

“Ung'azi kwa Zumbe!”

10Zumbe Chohile alongoza mlanga mwe mazi,

Zumbe Chohile alongoza saviya seuta mazuwa yose.

11Zumbe Chohile awenka nguvu awantu wakwe,

Zumbe Chohile awajimbika wantu wakwe kwa kuwenka utondowazi.