Ntogozi 106

Wedi wa Zumbe Chohile kwa wantu wakwe

1Mtogoleni Zumbe Chohile! Mhongezeni Zumbe Chohile,

kwaviya ni ywedi,

ungi wakwe ni wakale na kale.

2Ni yuhi akudaha kutamwila ntendwa nkulu za Zumbe Chohile?

Na kutambalisa vichintile ntogozi zakwe?

3Wajimbikwa wadya wakutimila sigilizi zakwe,

wakudamanya vikuwagila mazuwa yose.

4Zumbe Chohile, nikumbuka umo ukawambiza awantu wako,

unambize umo ukawambula.

5Vileke nelelwe kuchumilwa kwa awantu wako usagule,

nidahe kwehenga mwe chinyemi che isi yako,

na kweduvya hamwenga na awantu wako.

6Chikola masa, saviya watendile wakale wetu,

chibananga naho chidamanya wihi.

7Umo wakale wetu wendaga Misili,

hawakombaganyaga izintendwa zikwehela za Chohile,

wajala nkanana zilozize ivyo uwalagise ungi wako,

mna wamhitukaga Mta nguvu zose kwe ibahali ya Shamu.

8Hata ivyo Chohile saviya alongaga,

vileke alagisa inguvu yakwe nkulu.

9Aikwahilaga ibahali ya Shamu,

niyo yanyala,

kawalongoza awantu wakwe wadeluke saviya hantu hanyaile.

10Awambulaga mwe imkono ya wehi wawo,

awakombolaga kulawa mwa awankondo wawo.

11Mazi yawagubikaga awankondo wawo,

hachulupuke hata yumwenga.

12Niyo awantu wakwe wazumila viya alongaga,

na kuchema ntogozi zakwe.

13Mna niyo wasunguza kujala ivyo awatendele,

wedamanyiza mbuli hawagojize ulangilizi wakwe.

14Kwedijangwa wamemwa ni tama zawo,

wamjezaga Chohile kwenyika,

15elo, niyo awenka chiya walombeze,

mna niyo awegaila unyonje wihise.

16Uko kwedilago wawadila finju Musa na Haluni,

wandima wakukile wa Zumbe Chohile.

17Isanga niyo yagubuka na kummela Dasani,

iwafinankiza Abilamu na awantu we idibunga dyakwe.

18Moto niyo wawalaila awatimizi wawo,

ni wawatikimya awantu awo awavu.

19Uko Sinai waumbaga tukulu dya ndama,

na kudivikila iditukulu idyo dilawane na zahabu itile kulujulwa,

20wahituilaga Ung'azi wa Chohile,

nakuwinka tukulu dya njeku ikudya mani.

21Wamjala Chohile awambule,

uyo adamanye ntendwa nkulu uko Misili,

22mpituko mwe isi ya Hamu!

Na mbuli za kutisa uko kwe Ibahali ya Shamu!

23Chohile agambaga nawakome awantu wakwe,

hata ivyo, Musa mndima ywa Chohile engilaga hagati,

niyo achinda amaya ya Chohile asekuwakoma.

24Vikaheza niyo waibela idya isi intana,

hawazumile ulosi alongaga.

25Wang'ung'uzikaga mwa amahema yawo,

naho hawamwetegeleze Zumbe Chohile.

26Elo, niyo elisa akawagamba vino,

nawakome kwedijangwa,

27nawazagaze awelekwa wawo mwa awantu,

na kuweneza mwe isi yose.

28Vikaheza uko Peoli wantu wa Chohile niyo welunga mwe kumvikila Baali,

na kudya ntambiko zilavigwe kwa milungu heine ujima.

29Wamsonga maya Zumbe Chohile kwa ntendwa zawo zihiye,

Chohile niyo awegaila unyonje wihise.

30Mna Finehasi niyo achimala na kumlihiza yudya akoile amasa,

unyonje uwo niyo wachindwa.

31Imbuli iyo yakumbukwa kwa ntunyo yakwe,

kukongela ichipindi icho ne imihilimo yose.

32Kwa amazi ya Meliba, wamjelaga maya Zumbe Chohile,

mabuli yehiye niyo yamgwela Musa kwachausa chawo.

33Kwaviya waihituka iloho ya Chohile,

Musa niyo alonga milosi heikuwagila.

34Hawawakomile awantu hewemmanyize Chohile,

saviya Zumbe Chohile awalagize,

35mna niyo wehanganya nawo,

na kutimila izimbuli zawo.

36Wavikila matukulu ye imilungu yawo,

ayo niyo zatenda mtego wa kuwakoma.

37Niyo wawalavya ntambiko wana wawo wa chilume,

na wachiche kwa amatukulu ya Kanani.

38Wakoma wantu hewene lema,

wana wawo na wachiche wawo,

wawalavyaga ntambiko kwa amatukulu ya Kanani,

isi niyo yengila uzavu kwa isakame yawo.

39Wejela uzavu wenye kwa mbuli za wavu watendile,

kwa ntendwa zo uchilanga wadamanya.

40Elo, Zumbe Chohile niyo ewemukila maya awantu wakwe,

kaweihiwa awantu wakwe asagule.

41Niyo awenkiza kwa awantu hewemmanyize Chohile,

awo wakuweihiwa niyo wawalongoza.

42Wankondo wawo niyo wawafinyankiza,

na wawenka ndima za kuwakunkusa chinguvu.

43Nkanana zilozize Chohile awambulaga awantu wakwe,

mna wowo niyo wasagula kumhituka,

niyo wajendeleza mo uwavu wawo.

44Mna niyo akaula amasulumizo yawo umo eze eve indilo yawo.

45Kwachausa chawo niyo akumbuka Lagano dyakwe,

na kulawana no ungi wakwe utendese niyo aselwa ni maya yakwe.

46Niyo awatenda wawonelwe mbazi ni wose wawatahile.

47Zumbe Chohile ywetu chambule,

chichisanye vituhu kulawa mwa awantu hewekumvikila Zumbe Chohile,

vileke chihongeze na kutogola idizina dyako dikukile,

na kweduvya mwe izintogozi zako.

48Atogolwe Zumbe Chohile, Chohile ywa Izulaeli,

kukongela haluse na kale na kale!

Wantu wose wagambe, “Taile!”

Mtogoleni Zumbe Chohile!