Ntogozi 107

Kumtogola Chohile kwa Wedi Wakwe

1“Mhongezeni Zumbe Chohile kwaviya ni ywedi,

ungi wakwe ni wa kale na kale!”

2Wadya wakombolwe ni Zumbe Chohile,

wavuzagize kulonga imlosi ino, nyuwe nyose mwambulwe.

Kawambulani kulawa kwa awankondo wenyu,

3wadya achisanye kulawa kwe izisi ze chijeni,

kulawa ulailo wa zuwa na uselo wa zuwa,

kulawa chenya na kwamwenyemzi.

4Awo wangadikaga kwedijangwa,

hawawone sila ikuwabuza kwe mzi wakudaha kwikala.

5Wendaga na sala na nchilu,

niyo waswesa nguvu.

6Niyo wamwilila Zumbe Chohile mwe izinkunto zawo,

uyo niyo awambula mwa amatumbwaziko yawo.

7Niyo awalongoza mwe sila iligane,

kubula kwe mzi wadahile kwikala.

8Elo, wamhongeze Zumbe Chohile kwa ungi wakwe hewine udumo,

na kwa ntendwa zakwe zikuwehela wantu.

9Kwaviya awanywesa wata nchilu,

na kuwegusa wata sala kwa vintu vyedi.

10Watuhu wekalaga mwe chiza na mwe ziza ditendese,

wafungwa wasulumizwa mwe minyolo,

11kwaviya nendile wayakanda mgongo amalagizo ya Chohile mta nguvu,

na kulemela sigilizi za Uyo Ekulanga.

12Kawakunkusa mwe ndima ndala,

wekobadika mna hahana yoyose awambize.

13Niyo wamwilila Zumbe Chohile mwe izinkunto zawo,

uyo niyo awambula mwe ichinyulu chawo.

14Niyo awalavya mwe ichiza ne ichinyulu chikulu,

na kukanta imnyolo yawo.

15Elo, wamhongeze Zumbe Chohile kwa ungi wakwe hewine udumo,

na kwa ntendwa zakwe zikwehela atendile kwa wantu.

16Kwaviya katula izinyivi ze shaba,

na kukanta imihindo ye chuma.

17Awo watenda wahezi kwachausa cha amasa yawo,

wasulumizwa kwachausa cho uwavu wawo,

18hawaungile kudya nkande yoyose,

wasigala hadodo wabanike.

19Niyo wamwilila Zumbe Chohile mwe izinkunto zawo,

uyo niyo awambula mwa amasulumizo yawo.

20Awahonyaga awo kwa ulosi wakwe alagize,

na kuwambula mwe file.

21Elo, mhohongezeni Zumbe Chohile kwa ungi wakwe hewikusila,

na ntendwa zikwehela adamanye mwawo.

22Walavye ntambiko za kuhongeza,

watamwile ntendwa zakwe zose kwa nchemo za kwelelwa.

23Wadya watambaga mwe ibahali kwa meli,

na kudamanya mayombe yawo mwe mazi yazize,

24wawonaga izindima adamanye Zumbe Chohile,

ntendwa zakwe zikwehela mwe ibahali.

25Kwaviya alagizaga,

na kwinula luzimu lwinule mawimbi kulanga.

26Wadulagwa ko ulanga,

vikaheza hasi kwe imizimilizo,

ukankalu wawo ni wasila mwe imbuli iyo,

27wasebedukaga na kuyumbadika saviya wakozi,

ubala wawo nio waduma.

28Niyo wamwilila Zumbe Chohile mwe inkunto yawo,

uyo niyo awambula mwa amasulumizo yawo.

29Niyo atondowaza nkung'unto kwa kutakalisa,

mawimbi mwe ibahali niyo yatondowala.

30Nendile welelwa kwaviya naitondowala,

uyo niyo awalongoza kubula kwe bandali nawakaunga.

31Elo, wamhongeze Zumbe Chohile kwa wedi wakwe hewine udumo,

na kwa ntendwa zakwe zikuwehela wantu.

32Wamtunye uyo mwe mdugano wa wantu,

na kumtogola mwe chitala cha wadalahala.

33Zumbe Chohile ahituilaga imito itenda jangwa,

naho anyazaga soko za mazi zitenda hantu hanyaile.

34Sanga ikulavya ulozo itenda chihala cha munyu,

kwachausa cha masa ya wantu wendile wakekala umo.

35Ahituilaga majangwa yatenda mabwawa ya mazi,

hantu hanyaile hatende soko za mazi.

36Aletaga wantu wata sala wekale umo,

awo niyo wazenga mzi na kwikala umo.

37Walimaga na kuhanda mizabibu,

iyo yelekaga ntunda zilozese.

38Awajimbikaga awantu wakwe niyo watenda na wana walozese,

naho hahunguze amafyo ye imifugo yawo.

39Elo, uwazwa wawo wize uhunguke na kuhwelesa kwa kuzilwa,

file na kusulumizwa na chinyulu,

40uyo awalagisaga ubezi awakulu wa awankondo wawo,

kawatenda wangadike mwe nyika heine sila.

41Mna uyo awahonyaga wachiwa mwe izinkunto zawo,

na kujenyeza awantu we izikaya zawo saviya mafyo ya ngoto.

42Wachumi wa moyo nawawone na kwelelwa,

mna wavu wose nawanyamazwe imilomo yawo.

43Yoyose mta ubala akuziva izimbuli zino,

afanyanye ungi mkulu wa Zumbe Chohile.