Ntogozi 108

Kulombeza wambizi ukebungwa

1Zumbe Chohile umoyo wangu ukulumbala,

nanicheme na kutogola kwa moyo wangu wose.

2Inuka weye gunda na zeze!

Naniyasetule mavukuvuku.

3Zumbe Chohile, nahutogole mgati mwa awantu.

Nahutunye mwa awantu we izisi.

4Kwaviya ungi wako ni mkulu, ubula kulanga kwembingu,

ukanani wako wabula ko ulanga.

5Zumbe Chohile utogolwe, kulanga kwe mbingu,

ung'azi wako utendeke mwe isi yose.

6Uchambule na kuchambiza kwa udahi wako,

vileke wadya ukungisa wadahe kukombolwa.

7Chohile kalonga kulawa ahantu hakwe hakukile, kugamba,

“Haluse naniisange vihande Shekemu kwa uhuda,

idikolongo dya Sukoti nanidihime vihande hande.

8Giliyadi ni yangu, Manase ni yangu,

Efulaimu ni nkofia yangu ya chuma,

na Yuda ni nkome yangu yo useuta.

9Moabu ni zungu dyangu dya kunawila,

umo Edomu nanidule kwapa dyangu,

na uko Filisiti nanitowe lukunga lwa uhuda mwe nkondo.”

10Ni yuhi akunga anigale kubula kwemzi una ngome?

Ni yuhi akunga anilongoze kubula Edomu?

11Suyo weye Chohile, uchilemele?

Wenawe hukujesanya vituhu na wagomba nkondo wetu?

12Chambize mokuhigana na awankondo wetu,

kwaviya wambizi wa mntu ni wa bule.

13Kwa wambizi wa Chohile nachihude,

kwaviya uyo nawahume awankondo wetu.