Ntogozi 109

Mafuzumo mwe Nkunto

1Nakutogola weye Zumbe Chohile,

usekunyamala,

2kwaviya wantu wavu na wadanti wanebunga,

waniziga mbuli zo udanti,

3naho wanilonga milosi ikuniihiza,

wanebunga hehene luhosa.

4Icho wakuniliha umbuya wangu mwawo ni kunilaha,

mna miye nawalombezeza wajimbikwe.

5Waniliha yehiye kwa wedi,

wihi kwa umbuya wangu.

6Wankondo wangu wagamba, “Sagula mntu mwavu amhige,

mlahi ywakwe mwenye amkantile mwe chitala.”

7Umo akantilwa abwilwe na mlema,

na amalombezo yakwe yakantilwe.

8Mazuwa yakwe yo ujima yasunguze kusila,

ulongozi wakwe enkigwe mntu mtuhu.

9Wanawe wasigwe hewene tati yawo,

mkaziwe atende mwasigwa!

10Wanawe wangadike wakalombeza,

wabalazwe mwa amahame ye izinyumba zawo.

11Mntu akumdai atahe iviya vyakwe vyose,

naho wajeni watahe chila chintu apatile mwe izindima adamanye.

12Asekutendeka hata yumwenga ywa kumdamanyiza yedi,

hegu ywa kuwawonela mbaza wana asize umo akabanika.

13Cheleko chakwe chisile kufa luhombwa,

mazina yawo yajalwe mwe icheleko chikwiza.

14Wavu wa wababa zakwe usekujalwa kulongozi kwa Zumbe Chohile,

masa ya mami yakwe yasekujeza kulekeilwa.

15Zumbe Chohile masa yawo yakumbuke mazuwa yose,

vileke wasile kufa luhombwa wajalwe mwe isi.

16Kwaviya hawajezaga kudamanya yedi,

mna kambalaza mchiwa msokezi,

kawakoma wachiwa na wafile chevu.

17Kaungisa kuligita, ligito niyo dyampata,

haungile kujimbika,

elo, uijimbiko utende hale naye.

18Aligitaga wantu watuhu saviya akuvala izisuche zakwe,

ligito niyo dyamwingila mo mwili wakwe saviya mazi,

mwa amavuha yakwe saviya mavuta.

19Naitende saviya suche azingigwe,

saviya msipi atalizwe mazuwa yose.

20Zumbe Chohile wakantile awankondo wangu mwe isila iyo,

wose wakulonga mbuli zihiye seizo mwangu!

21Elo, weye Zumbe Chohile nambiza saviya walongaga,

nambula kwachausa cha wedi wako.

22Kwaviya miye ni mchiwa msokezi,

moyo wangu ulumizwa mndani.

23Najinka enga chizuli chikukonga kwagila,

sifiliswa saviya sije.

24Mavindi yangu yalegela kwa kuleka kudya,

umwili wangu uhwahwatila kwa kuswesa mavuta.

25Wantu wakanisinya wanibela,

wakaniwona wasingisa imitwi yawo ko ubezi.

26Zumbe Chohile ywangu nambiza,

nambula kuligana no ungi wako!

27Wankondo wangu wamanye,

kugamba ni weye unambule.

28Wadaha waniligite, mna weye wanijimbika,

wananebunga nawajelwe soni,

mna mndima ywako nelelwe.

29Walahi wangu wahayuswe,

na kugubikwa ni soni saviya suche.

30Nahuhongeze weye Zumbe Chohile kwa milomo yangu,

nahumtogole mwe wantu walozize,

31kwaviya wawagombela wachiwa,

na kuwambula ujima wawo mwa wadya wakuwakantila.