Ntogozi 105

Chohile na awantu wakwe

1Mhongezeni Zumbe Chohile,

tambalisani idizina dyakwe,

wagambileni wantu wose viya adamanye.

2Mchemeleni ntogozi Zumbe Chohile,

wagambileni wantu ntendwa zakwe za mpituko.

3Mtogoleni kwaviya nyuwe mwi wakuka wakwe,

wagambileni wadya wose wakumvikila Zumbe Chohile welelwe.

4Mlondeni Zumbe Chohile ne izinguvu zakwe,

londani uso wakwe mazuwa yose.

5Kumbukani izintendwa zakwe zikwehela atendile,

mpituko zakwe na nkanto alavize,

6nyuwe welekwa wa Bulahimu mndima ywakwe,

nyuwe wana wa Yakobo wantu asagule.

7Uyo nuyo Zumbe Chohile ywetu,

nkato zakwe zi mweisi yose.

8Hakujala idilagano dyakwe aikiye kale na kale,

ulosi alagize mwe vyeleko elufu.

9Lagano adamanye na Bulahimu,

cheliso amwelisize Isaka.

10Zumbe Chohile kaiga lagano na Yakobo ditende lagizo,

nadikale mwa Waizulaeli kale na kale.

11Akagamba, “Nahwinke weye isi ya Kanani,

itende yako mwenye.”

12Wantu wa Chohile wendaga wajeche mo uwazwa,

nendile hawamanyikise

naho wendaga wajeni mweisi ya Kanani,

13wadwangayaga kulawa mwesi imwenga kwiya mwesi ntuhu,

kulawa useta umwenga kwita useuta mtuhu.

14Mna Chohile halekile mntu yoyose awazileni,

kwachausa chenyu awakwahilaga maseuta,

15akagamba, “Msekuwalumiza wandima wangu nisagule,

msekuwakufya waoni wangu.”

16Zumbe Chohile egalaga gumbo mwe isi yawo,

na kubalanga inkande yawo yose.

17Mna niyo atuma mntu kulongozi kwawo,

Yusufu uyo atagigwe saviya mtumwa.

18Wamzubula iviga vyakwe kwa minyolo,

isingo yakwe yanyinyagwa kwa chuma,

19kubula yadya akongile kulonga yachinte,

ulosi wa Zumbe Chohile umbunkula ni mchindedi.

20Vikaheza seuta ywa Misili niyo amwiva na kuzumila,

chilongozi ywa awantu niyo amlekeila.

21Kamtenda chilongozi mo ulongozi wakwe,

mkulu mwe ivintu vyose ananavyo,

22awalongoze amasekulu we hasi ha seuta viya akunga,

na kuwahinya wadalahala ubala.

23Izulaeli niyo engila mwe isi ya Misili,

Yakobo niyo ekala saviya mjeni mweisi ya Hamu.

24Zumbe Chohile kawatenda awantu wakwe welekane vitendese,

kawatenda wakankalu kujinka wankondo wawo.

25Nuyo awatendile awantu wa Misili waweihiwe Waizulaeli,

niyo wawadamanya mbuli zihiye awandima wakwe.

26Vikaheza niyo amtuma Musa mndima ywakwe,

hamwenga na Haluni uyo asagule.

27Wantu awo waidi wadamanyaga vilagiso vikwehela mwawo,

vmpituko mweisi ya Misili.

28Chohile ahosaga ziza mweisi,

mna Wamisili hawatimile izisigilizi za Chohile.

29Ahituilaga amazi yawo kutenda sakame,

vyahosa yakoma izisamaki zawo.

30Isi yawo niyo yamema majula chila hantu,

ayo yengilaga kubula kwe ivyumba wakugona ivilongozi wawo.

31Chohile alongaga niyo kwalaila mabunga ya si,

na masawa mweisi yawo yose.

32Fula kaihituila itenda ya mayuwe,

na lumwemwe luhangane na mbaula mweisi yawo yose,

33niyo abalanga imizabibu yawo ne imiti yawo ye imtini,

kagwisa hasi imiti yawo yose mweisi.

34Alongaga, sije niyo zeza,

njeda hezikuwazika,

35niyo wadya chila mani mwe isi yawo,

zitafuna ulozo wose mwe isanga yawo.

36Vikaheza kawakoma awelekwa wawo wose wa nkongo,

mwelekwa ywa nkongo wo ubwanga wawo.

37Niyo awalavya Waizulaeli mwe isi,

wakatenda na hela zilozese na zahabu ilozize,

hahana hata mnyonje yumwenga kulawa mwa amakabila yawo.

38Wantu wa Misili welelwa umo Waizulaeli wakahalawa,

kwaviya nendile wakawogoha.

39Chohile niyo atanda ingu diwagubike awantu wakwe,

na moto uwamulikile nechilo.

40Walombeza, niyo awegaila nkwale,

kawegusa nkande ilaile kwembingu.

41Katula luwe, mazi niyo yajuluzika,

yaguluka kwedijangwa enga mto.

42Kwaviya akumbukaga ulosi wakwe ukukile,

amgambilaga Ibulahimu mndima ywakwe.

43Elo, niyo awalavya awantu wakwe kwa chinyemi,

wantu asagule wachema nchemo za kwelela.

44Awenkaga si za wantu watuhu,

niyo awenka izinkonde za awakaya

zitende zawo,

45chani watoze amalagizo yakwe,

na kutimila izisigilizi zakwe.

Mtogoleni Zumbe Chohile!