Ntogozi 104

Mtogoleni mumbi Chohile

1Miye namtogola Zumbe Chohile.

Chohile ywangu, weye wi mkulu vitendese.

Kwevika ntunyo na ung'azi,

2kwegubika ulangazi saviya suche,

kutandaza izimbingu saviya hema,

3na kuzika izinguzo ze izigolofa zakwe mwe mazi.

Ayatenda amaingu yatende lingisha,

atamba mlanga akegalwa ni nkung'unto.

4Awatenda nkung'unto awandima wakwe wa kwembingu,

na awandima wakwe watende myali ya moto.

5Isi kaika mwe ivyegamo vyakwe,

naho haikudaha kusogezwa.

6Isi kuigubika kwa bahali saviya suche,

mazi yagubikaga amagulu.

7Umo uyakwahile amazi niyo yasumka,

yeze yeve umbumo wako yatimula nguluko.

8Yakwela kulanga kwa amagulu,

na kusela kwa amakolongo, kubula ahantu hadya ungile.

9Kuyekiya mhaka heyekudaha kuujinka,

hayajeze kuigubika isi vituhu.

10Azitenda soko zijuluze mazi kwamakolongo,

yaguluka mgati mwa amagulu.

11Awenka mazi awanyama wose wa kumbago,

mpundamiliya zakoma nchilu.

12Wadege wazenga masasa yawo mwe imiti,

wachima mwa amatambi na kuchema.

13Kunyesa fula mlanga mwa amagulu,

ne isi imemezwa vintu udamanye.

14Atenda mani yahote kwachausa cha wanyama,

na mimeya kwachausa cha wantu wahande,

wepatile nkande kulawa mwe isanga,

15na kulavya divai ikuwelela moyo wa mntu,

mavuta ya mzaituni kukuluguta mo uso wakwe

na nkande ikuchinka nguvu.

16Miti ya Zumbe Chohile yanyesezwa vyedi,

heye mielezi ya Lebanoni ahandile mwenye.

17Wadege wazenga masasa yawo umo,

mpungu zazenga masasa yawo mwe miti ikwitangwa misonobali.

18Ngulugulu zekala mwe magulu matali,

nyuwe ni masumkilo ya pelele.

19Kadamanya mnenge uhime imihilimo,

zuwa dimanya ichipindi chakwe cho kuhunga.

20Kwigala chiza kutenda chilo,

wanyama wose wa kumbago wajenda.

21Simba zabuma zikacheseka maingo yawo,

zalonda nkande ilavigwe ni Zumbe Chohile.

22Zuwa dikatontomoka, zauya uko zilaile,

zauya na kugona mwa amalundu yawo.

23Vikaheza wantu wafosa kuse wakudamanya ndima zawo,

wadamanya ndima zawo kubula chisingi.

24Zumbe Chohile kumba vintu vilozese!

Kwa umanyi kuvidamanya vyose!

Isi imema vyumbe umbile.

25Hadya hana bahali nkulu naho nyangalamu,

imema vyumbe hevikuwazika,

vintu vina ujima vikulu na vidodo.

26Uko meli zaita na kuya, numo eli Lewiatani,

umbile asezige umo mndani.

27Wose awo wagoja weye uwenke nkande,

wakatenda na sala.

28Walogota chochose nowenke,

unagubula umkono wako, weguta vinonile.

29Mna unamkanda mgongo, wengilwa ni nkama,

unausa umuye wako, wabanika,

na kuya mwamalumbi umo walaile.

30Ukawenka muye wako, waumbwa,

weye wautenda uhya uso we isi.

31Ung'azi wa Zumbe Chohile wikale kale na kale!

Zumbe Chohile nelelwe mwe izintendwa zakwe!

32Akaula mweisi, iyo yazingiza,

akufya amagulu ayo yalavya mosi.

33Nanimchemele Zumbe Chohile wikazi wangu wose,

nanicheme ntogozi kwa Zumbe Chohile ywangu,

chipindi chose hatenda ni mjima.

34Ubwede ukufanyanya kwangu,

ntogozi zangu zalawa kwa Zumbe Chohile.

35Mna wata masa wamlawe mweisi,

wakudamanya yehiye wasekutendeka vituhu.

Miye namtogola Zumbe Chohile!

Namtogola Zumbe!