Ntogozi 103

Ungi wa Chohile

1Miye namtogola Zumbe Chohile,

vyose vimndani mwangu vitogole idizina dyakwe dikukile.

2Miye namtogola Zumbe Chohile,

naho nisekujala wedi wakwe wose.

3Anilekeila amasa yangu yose,

anihonya amanyonje yangu yose.

4Ambula ujima wangu mwe mbila,

anijimbika kwa ungi na mbazi.

5Akumemeza viya vyose ukunga kwa vintu vyedi,

vileke ubwanga wangu uvuzwe uhya saviya gushu.

6Zumbe Chohile adamanya uwagilwa,

awenka uwagila wadya wose wakuzilwa.

7Alagisaga izisila zakwe kwa Musa,

niyo awaleka Waizulaeli wawone ntendwa zakwe zikulise.

8Zumbe Chohile ni mta mbazi na ungi,

hakusunguza kwihiwa, kamema ungi.

9Uyo hachikwahile mazuwa yose,

naho hakuchiwonela maya kale na kale.

10Uyo hachikantile kuligana na amasa yetu,

naho hachilihize kuligana no wihi wetu.

11Saviya izimbingu zikulanga vitendese ne isi,

nivyo uwedi wakwe ulozese kwa wadya wakumvikila.

12Saviya ulailo wa zuwa wili hale na uswelo wa zuwa,

nivyo Chohile aikiye hale amasa yetu na suwe.

13Saviya tati yamtu eli na mbazi kwa wanawe,

nivyo Zumbe Chohile akuwawona mbazi wadya wakumvikila.

14Kwaviya kavimanya ivyo chumbigwe,

akumbuka kugamba suwe chimalumbi.

15Wikazi wa mntu nisaviya mani.

Chachakula saviya luwa dya kwenkonde,

16mpungile yadinyulusa, vikaheza dyausika,

ahantu dyendile hadiwoneke vituhu.

17Mna kukongela kale na kale,

ungi wa Zumbe Chohile wimwawadya wakumvikila,

uwagila wakwe mwa awelekwa wawo wose,

18kwa wadya wose wakutoza Idilagano dyakwe,

na wakanuni wakutimila sigilizi zakwe.

19Zumbe Chohile kaika ichigoda chakwe cho useuta kwembingu,

useuta wakwe walongoza mwe vyose.

20Mtogoleni Zumbe Chohile, nyuwe wandima wakwe wakulu wata nguvu wa kwembingu,

nyuwe wakankalu mkutimila sigilizi zakwe,

nyuwe mkutimila ulosi wakwe.

21Mtogoleni Zumbe Chohile, nyuwe vyumbe vyose vya kwembingu,

nyuwe wandima wakwe wose mkudamanya viya akunga.

22Miye namtogola Zumbe Chohile, nyuwe vyumbe vyakwe vyose,

chila hantu hakwe akulongoza.

Miye namtogola Zumbe Chohile!