Ntogozi 102

Malombezo ya mntu mta nkunto

1Zumbe Chohile, wive amalombezo yangu,

ndilo yangu ya kulombeza wambizi ikubwile!

2Usekwefisa hale na miye chipindi cha nkunto!

Unitegele gutwi dyako,

usunguze kunihitula umo hakulombeza.

3Kwaviya amazuwa yangu yomboka saviya mosi,

mavuha yangu yahya saviya kala dya moto.

4Sihondwa mo umoyo enga mani yanyaile,

sina nkwina ya nkande.

5Kulawana ne chinyulu mo umoyo wangu,

sisigala mafuha ne nkanda.

6Sitenda saviya kungwi dya kwedijangwa,

saviya kungwi kwe mahame.

7Hagona sikupata ntongo,

sitenda saviya kadege kechedu kwe hala dya nyumba.

8Wankondo wangu wanitila msi wose,

waniihiwa enga kugamba ni wachilalu,

wakaditanga idizina dyangu mwa amaligito yawo.

9Maivu yatenda niyo ikande yangu,

mesozi nayahanganya na chiya hunywa,

10kwachausa cha amaya yako yatendese,

kwaviya kuninula na kunidula hale.

11Amazuwa yangu ni saviya chizuli cha chisingi,

nanyuluka saviya mani.

12Mna weye Zumbe Chohile, wi seuta kale na kale,

ntogozi zako zo ukulu zajendeleza mwe ivyeleko vyose.

13Nowinuke na kuiwonela mbazi Sayuni,

kwaviya ni chipindi cha kulagisa wedi,

chipindi chizumilike chibula.

14Kwaviya mayuwe yakwe ni ya yombe kulu kwa awandima wako,

idilumbi dyakwe dyenye wadiwonela mbazi.

15Wantu wose nawadyogohe idizina dya Zumbe Chohile,

maseuta wose mweisi nawautunye ukulu wako,

16umo Zumbe Chohile naizenge uhya Sayuni,

na kwelaviza ung'azi wakwe,

17umo netikile amalombezo ya wachiwa,

hayalemele amalombezo yawo.

18Wandikani imbuli ino kwachausa che icheleko chikwiza,

vileke awo hewenati kwelekwa wadahe kwiza kumtogola Zumbe Chohile.

19Zumbe Chohile kakaula hasi kulaila ahantu hakwe hakukile he kulanga,

asinyaga isi kulawa kwembingu,

20etegeleze ndilo yo usungu ya awafungwa,

na kuwalekeila wadya wakantilwe file.

21Elo, zina dya Zumbe Chohile naditambaliswe uko Sayuni,

ne izintogozi zakwe uko Yelusalemu,

22umo awantu wose ne iziseuta nawadugane hamwenga,

wamsankanile Zumbe Chohile.

23Chohile kanihuza izinguvu nichei mwesila,

wikazi wangu kautenda mjihi.

24Naho nilongile, Chohile usekuniguha nichei sinati kudalahala.

Weye Zumbe Chohile wekala vyeleko na vyeleko.

25Waumbaga isi chikale chijinkile,

kwa mikono yako mwenye kudamanya imbingu.

26Vyose ivyo navyusike, mna weye nosigaile,

vyose navisakale saviya suche.

Weye novihituile saviya suche,

navyo navyusigwe.

27Mna weye nuyudya,

mihilimo yako haina udumo.

28Wana wetu nawekale,

na kwa wamizi wako,

welekwa wawo nawekale mpeho kulongozi kwako.