Ntogozi 10

Kulombeza kwachausa cha uwagila

1Weye Zumbe Chohile, ni mbwani wachimaila hale?

Ni mbwani wefisa chipindi cha nkunto?

2Mo wefenyi wakwe mntu mwihi amsulumiza mntu mchiwa,

mna mchiwa agwizwa mwe wihi udamanywe ni mntu mwavu.

3Mwavu eduvila tama zihiye zo umoyo wakwe,

amligita na kumlemela Zumbe Chohile.

4Mntu mwavu mo kweduvya kwakwe afanyanya hahana Chohile,

mwe izifanyanyi zakwe Chohile hanitende niwajike, hakujali.

5Sila za mwavu zachumilwa mazuwa yose,

eduvya ne izisinkanto zako zihale naye,

awaseka ko ubezi awankondo wakwe wose.

6Egamba mwenye, “Hahana chikunga chinisingise,

mazuwa yose nanitende na mbwedo,

sanijeze kutenda na nkunto mpwii.”

7Milosi yakwe imema maligito,

udanti na kutisa,

lulimi lwakwe lwalonga milosi ikwihiza.

8Wefisa mwe izikaya,

wakagoja wakome wantu hewene lema,

watenda chani wanyatile wantu hewene lema,

9anyatila saviya simba ikongola.

Akweta agwile mntu ahwele,

agwila na kuwabuluza mwe lwavu lwakwe.

10Wasokezi wahondwa na kugwiswa hasi,

wantu wahwele wagwizwa ni mntu mwavu mta guvu.

11Mntu mwavu elongela mwenye, “Chohile kajala,

afisa uso wakwe naho hakona chintu.”

12Inuka weye Zumbe Chohile!

Inuka uwakantile.

Usekuwajala wantu wakubunyanywa.

13Weye Chohile kwambwani mntu mwavu akubele?

Kwambwani alonge mwenye, “Hanikantile?”

14Mna weye Chohile,

wawawona wantu wata nkunto na chihovu,

kuzumila kuwakantila kwa mkono wako,

msokezi asumkila kwako,

weye wi wambizi ywa wabanikilwe ni welesi wawo.

15Tula izinguvu za mntu mwavu,

mkantile uwavu wakwe wose usekutendeka vituhu.

16Zumbe Chohile ni seuta kale na kale,

wantu we izisi ntuhu hewemmanyize yeye nawosike wamlawe mweisi yakwe.

17Weye Zumbe Chohile,

wahokela lombezo dya msokezi wamjela moyo na kumtegela gutwi.

18Nowajeseze uwagilwa wabanikilwe ni welesi wawo

na wakubunyanywa,

vileke wantu awo wombigwe ko ulongo du wasekogofya vituhu.