Ntogozi 9

Kumhongeza Chohile kwa uwagilwa wakwe

1Weye Zumbe Chohile nahuhongeze kwa moyo wangu wose,

nanitamwile ntendwa zako zose zikwehela.

2Nanelelwa na kukuchemela weye,

weye Chohile Mkulu,

nanidichemele ntogozi idizina dyako.

3Wize ulaile wankondo wangu wauyaga kunyuma,

kulogozi kwako wekobadika na kusilikila.

4Kwaviya kugombela uwagila wangu

no umwalo wangu,

kwikala mwe ichigoda chako cho uzumbe ukakantila viya vikuwagila.

5Kuwakwahila awantu we izisi ntuhu,

na kuwakoma wehi,

amazina yawo kuyausa mazuwa yose.

6Wankondo wetu wabindwa pele mazuwa yose,

imizi yawo kuibalanga,

lukumbusa lwawo lusika.

7Mna Zumbe Chohile alongoza mazuwa yose,

kekala mwe ichigoda chakwe cho uzumbe vileke akantile.

8Chohile awakantile awantu mwe isi viya vikwagila,

alamula awantu mwe isi kwa ukanuni.

9Zumbe Chohileni sumkilo dya wantu wakuzilwa,

ni nchinga itogile chipindi cha nkunto.

10Wose wamanyize idizina dyako wakwikiya msuhi weye,

kwaviya weye Zumbe Chohile huwasize mpwii wakukulonda.

11Mchemeleni Zumbe Chohile ntogozi akulongoza uko Sayuni,

tambalisani mgati mwa awantu we izisi ntuhu viya adamanye,

12Kwaviya Zumbe Chohile alihiza chikoda kwa wakomi,

hakujeza kujala ndilo ya wadya wakuzilwa.

13Weye Zumbe Chohile,

niwonela mbazi!

Kaula ivyo walozize awankondo wangu wakunisulumiza! Nambula kulawa mwe file,

14vileke nidahe kutambalisa ntogozi zako mwe izinchili za wantu wa Sayuni,

na uko nibwede wambulwa wako.

15Wantu we izisi ntuhu wagwela mwe bome wasimbile,

iviga vyawo vigwizwa mwe lwavu wafisize.

16Zumbe Chohile kamanyika kwa uwagila wakwe,

wantu wavu wagwizwa ni ntendwa zawo wenye.

17Wantu wavu nawahele kwedibome hedine uhelo,

heye wantu wose mwe izisi awo wakumjala Chohile.

18Mna wachiwa hawajalwe mazuwa yose,

hegu msuhi wa wadya wakuzilwa hawage kale na kale.

19Weye Zumbe Chohile inuka usekumleka mntu akubele,

wachisanye wantu we izisi ntuhu uwakantile kulongozi kwako.

20Weye Zumbe Chohile watende wazingize kwa nkama,

wantu we izisi ntuhu wamanye kugamba wowo ni wantu du.