Njelo 11

1Zumbe Chohile ehiwa vihimo vyo udanti.

Mna elelwa ni vihimo vikuwagila.

2Wantu wakwefenya wasunguza kwingilwa ni soni.

Mna kunyanyahala kwalagisa ubala.

3Uchumi wa wantu wedi wawalongoza.

Mna wantu sawo wakanuni wabanikilwa unkani wawo.

4Ugoli haukuwagila mwe zuwa dya file,

mna unyanyahala wadaha ukombole ujima wako.

5Ukanuni wa wantu wakanuni wachulusa isila yawo,

mna wantu wavu wagwa kulawana no uwavu wawo.

6Wata uwagila wawakombola wadya wakunyanyahala,

mna hewene ukanuni wegwiza wenye mwe tama zawo zihiye.

7Umo mwavu akabanika msuhi wakwe nawo waga,

mizungu ya mntu hekumvikila Chohile wahela ni ya bule.

8Mntu achumile ambulwa kulawa mwe nkunto,

mwihi engila umo hantu hakwe.

9Mntu hekumvikila Chohile akoma watuhu kwa milosi yakwe,

mna mkanuni akombolwa kwa uwagila wakwe.

10Mzi watenda na chinyemi umo wantu wachumile wakachumilwa,

mna kwatenda na chizumo umo wavu wakabanika.

11Mzi wachumilwa kwa ujimbiko wa wakanuni,

mna mzi wabalangwa kwa milosi ya wantu wavu.

12Mntu mhezi ambela mnyawe,

mna mntu mta fanyanyi enyamaila.

13Mntu msongaganyi hakudaha kwika chinyele,

mna mntu mkanuni mo umoyo afisa chinyele.

14Hantu hehena ulongozi isi yagwa.

Mna henye walangilizi walozize hana utondowazi.

15Akumwikiya zamana mjeni engila mwe lwavala,

mna akulemela zamana emwe utondowazi.

16Mvyele mta chisekwesekwe atunywa,

mna mgosi hena mbazi apata ugoli.

17Mta mbazi achumilwa mwenye.

Mna mntu nyakwili elumiza mwenye.

18Mntu mwavu apata maliho yo udanti,

mna akudamanya yedi napate jeleko dya chindedi.

19Mntu yoyose nadamanye yachumile nekale,

mna akusagula kudamanya yehiye nabanike.

20Zumbe Chohile awehiwa wata fanyanyi zihiye,

mna awaunga wadya wakudamanya yachumile.

21Utende na chindedi kugamba wavu nawakantilwe,

mna wadya wachumile nawambulwe.

22Mvyele mtana hene ubala,

ni saviya mpete ya zahabu mwe mpula ya nguluwe.

23Msuhi wa mntu achumile waduma mwe yedi,

mna tama ya mntu ehiye yaduma mwe maya.

24Akulavya kwa chisekwesekwe atendesa mgoli,

Mntu hekulavya ajendeleza kutenda mchiwa.

25Mntu mta chisekwesekwe nachumilwe,

akwambiza wantu watuhu naye nambizwe.

26Wantu wamligita yudya akufisa uhule akagoja yombe kulu,

mna wamjimbika yudya emalanye kutaga.

27Uneva ukalonda yedi notunywe,

mna uneva ukalonda nkumbizi, icho nicho nopate.

28Akwegamila mwe ugoli nagwe saviya zani dinyaile,

mna achumile najimbale saviya zani bisi.

29Mntu akwigala nkunto kwa awantu we ikaya yakwe mo uhelo hatende na chintu.

Mntu mhezi chila zuwa natende mtumwa ywa wata ubala.

30Uwagola wenkiza ujima,

mna wavu wausa ujima.

31Uneva mkanuni apata majeleko hano he isi, chindedi hata wantu wavu nawalihwe.