Njelo 12

1Mntu akunga ntunyo aunga umanyi,

mna hekunga kufundwa ni mhezi.

2Zumbe Chohile awagilwa ni wantu wedi,

mna awaligita wata mwalo wihiye.

3Mntu hakutunywa kwa kudamanya wavu,

mna mntu mkanuni hakudaha kuswa.

4Mvyele ywedi ni chilemba cha kweduvya kwa mgosiwe,

mna akumjela soni mgosiwe ni saviya nkwenje mwa amavuha yakwe.

5Mwalo wa mntu achumile wawagila,

mna ulangilizi wa mntu mwavu ni wa udanti.

6Milosi ya wantu wavu mwalo wakwe ni kukoma hewene lema,

mna milosi ya wantu wachumile yawakombola wadya wakutiswa.

7Wantu wavu wabindwa kwa kukomwa kuno wakatenda hawana lukolo,

mna lukolo lwa wantu wachumile lwekala lutogile.

8Mntu atogolwa kuligana no ubala wakwe,

mna mntu mhezi abelwa kwa fanyanyi zakwe zihiye.

9Viwagila utende mntu akwehufya mna hukwegamila mntu,

ukaleka mntu akweduvya mna aswesa hata nkande.

10Mntu ywedi adima awanyama wakwe,

mna mbazi za mntu mwavu ni unyakwili.

11Mlimi atogile ana nkande ilozize,

mna akutimila mbuli za chihezi kaswesa akili.

12Wantu wavu wabesa chongezeko cha kubunyanya,

mna mkanuni achimala atogile.

13Mntu mwavu egwiza kwa udanti wakwe mwenye,

mna mkanuni enega nkunto.

14Jeleko dyako dyalawana neivyo ukulonga ne ivyo ukudamanya,

nowinkwe viya vikukuwagila.

15Sila ya mhezi yawoneka iligana ha ameso yakwe mwenye.

Mna mntu mta ubala etegeleza ulangilizi.

16Mntu hezi hakukawa kwelagisa amaya yakwe.

Mna mbala abela mahuluto.

17Mlavyanya ywa chindedi alonga chindedi,

mna mlavyanya ywa udanti alonga udanti.

18Mbuli za chihezi zalumiza saviya sime,

mna milosi ya mta umanyi yahonyeza nkwenje.

19Udanti una wikazi mguhi,

mna chindedi chekala mazuwa yose.

20Wadya wakwika mwalo wihiye wamema udanti mwe myoyo,

mna wakufanyanya utondowazi wapata chinyemi.

21Wachumile hawakubwilwa ni mbuli ihiye,

mna wavu wamema nkunto.

22Zumbe Chohile awehiwa walulimi,

mna elelwa wantu wakanuni.

23Mntu mta umanyi adima ubala wakwe mwenye,

mna mhezi elavyanya uhezi wakwe.

24Ndima ndala yakwinka nguvu ya kulongoza,

mna ubwa wakutenda mtumwa.

25Nkama mo umoyo yakutenda usekutenda na chinyemi,

mna milosi ya chisekwesekwe yakutenda usangale.

26Mntu mkanuni enega wavu,

mna sila ya mntu mwavu yamwaza mwenye.

27Mntu mbwa hakupata icho akongola,

mna mntu akuhikiliza ana ugoli ulozize.

28Ukanuni ni sila ya ujima,

mna wavu ni sila ya file.