Alkitab Bahasa Wondama
Markusi 3
Yesus dionae siniotu pesi pienam nana raria Sabat pai
(Mat. 12:9-14; Luk. 6:6-11)
Avori Yesus siovera ea so anio ari agama Yahudi pai. Siniotu vevarami marera rawa siri pesi andija niana jana. Siniotu pa esia senana jana e sesajo vedioro Yesus, masisi dionae siniotu pai pienam nana raria Sabat pai, ave amamo setono sasaar a so I. Yesus kievo maso siniotu vevarami marera rawa siri pai e diojo, “Ruama, buosa na dopo nine!” Avori Yesus duta maso siniotu venana jasia e diojo, “Ariri tane agama pai, vitoini diadi so tananari nana raria Sabat pai? Tananari viate pai te tananari kariria e? Tatono vesie so siniotu te tamu sia e?” Vape sepeja vea. Yesus kiesiou e siejo wawariri sia, vape sane pa kariria aso sendumi pasi sikarakuai pana. Manau pa, Yesus kievo so siniotu jani e diojo, “Buora varamu pa!” E diorai, apa vara pai pienam. Apa siniotu Farisi pasia sesuvi vurusu anio ari agama Yahudi pai, avori saira e senduir tutiri Herodesi nie siniotu verausari pasia, ave amamo setato kavo ave sesamuai ria so semu Yesus pa.
Kaiwasa pai piau nana ruru pai dere pa
Yesus tutir nie verausari pasia sembavu vurusu uta jana e senda so ruru Galilea. Apavo siniotu pa sepau senda usara Yesus, sendama nana Galilea, e kota nana Yudea, nana Yerusalem, nana Idumea, nana uta rawa mura maria Yordan, e nana uta Tirus tutir Sidon. Siniotu vepau jasia sendama so Yesus, aso setadiawa vava nienari to manau pasi. Yesus diemiasa nie verausari pasia sembe masis wa pesa so I, ave amamo siniotu jasia sesorum kobari vape moja.1 Aso dionae siniotu vepau pasia sepanam, apajoma siniotu vepota jasia vura sesorum maso I e setakara seto senduti. Nana rabua siniotu vetere wainunu vekariria pasia sesajo Yesus pa, setisa sene aebu pasi na aropo pa e setananar e setojo, “Allah Atu ni Au!” Vape Yesus dierandu wainunu vekariria pasi to karakuai ave amamo sitopanusari vape moja.
Yesus diri siniotu sura e muandu pasia ave sembe rasul so I
(Mat. 10:1-4; Luk. 6:12-16)
Janama Yesus siajai so suovavo pesi, e siau siniotu miajara pasia e sendama so I. Avori diri siniotu pa sembe sura e muandu nana rabua sia ave sembe rasul so I e diemiasa setopanusara Kavo Vesie pai. E diono paja ave setatavar wainunu vekariria pasi. Yesus diri siniotu sura e muandu pasia: Simoni (siau ve Petrusi kota), Yakobusi e Yohanesi neta pa sandu, Zebedeusi atu pa sandu na (siau sandu ve sano Boanerges, nie tarai pai ma atuma kuruja), e Andreasi, e Pilipusi, e Bartolomeusi, e Matiusi, e Tomasi, e Yakobusi Alpeusi atu pai, e Tadeusi, e Simoni (siniotu ninei mienawar so Israel sesuvi nana kerajaan Romawi), e Yudas Iskarioti, andi nari viovo Yesus maso siniotu vekambarai pasia.
Yesus e Beelzebul
(Mat. 12:22-32; Luk. 11:14-23)
Janama Yesus sua na anio pesi. Siniotu pa sepau sendama e senduir riwan ea, veito Yesus e nie verausari pasia diadi so setapi va. Siniotu pasia senggavo e setojo, “Vie pisavi to manau!” E nana rabua Yesus nie anio raro pasia setadiawa vava jana pa, sendama so I ave senggori. E siniotu veruin sasavu kavo aniau na Torat pasia sendama nana Yerusalem senggavo e setojo, “Beelzebul sua so I! Veveru na wainunu vekariria pasi diono paja maso I ave dietavara wainunu vekariria pasi.”2 Apa Yesus siau siniotu vepau jasia, e tiopanusara maso sia, nanapi kavo sora tarawa pesi e diojo. “Bilis pai kasa dietavar Bilis pai vurusu siniotu va. Masisi negara pesi miesasavu aso vie marova vavera tutiri matauni, negara jani nari kieriria e niai. E masisi anio raro pesi, sesanemi siri va e sembaririwi, anio raro jani nari kieriria e niai. Toapa jana kota masisi kerajaan Bilis vie marova tutiri matauni e miesasavu, amamo nie kerajaan jani kasa diosa to woroi va, nari kieriria e niai. Masisi siniotu pesi dio riama so siniotu vepaja pai nie anio pai raro pa e diewara pi pa, nari kiesie siniotu vepaja jani papori. Manau na jana avori diadi so diewara pi nana nie anio pai. Vevata mo, ikavo so au tonine, siniotu pasia senanari tatar e senggavo sisiajara, diadi sesamuai ampun so sene tatar pasi. Vape masisi siniotu pesi kievo sisiajara Wainunu Sren pai mamo, i ma kasa siemuai ampun va to woroi-woroi mo, aso nienari tatar vesamuai ampun va to woroi-woroi.”3 Yesus kievo tojana, aso senggavo toapa wainunu vekariria pai sua nana pana.
Yesus siniani tutiri nie neta pasia
(Mat. 12:46-50; Luk. 8:19-21)
Avori Yesus siniani tutiri nie neta pasia sendama. Setosa na vorira pa e setamiasa siniotu pesi siau Yesus. Nana kasau jana siniotu pa sepau semasoi wawariri Yesus. Senggavo maso I e setojo, “Guru, siniamui tutiri nemetapi sia senana vorira wa e seto sesamuai Au.” Yesus ruar e diojo, “Teini ine mai pa? Teisia ine neta jasia pa?” Avori Yesus siejo maso siniotu vemasoi wawariri pasia e kievo e diojo, “Ninei ma ine sinia tutiri neta pasia na! Teini kiorusara ariri Allah nie majar pai mamo, andi ine neta mua nina, neta vavi nina, e sinia nina.”
Source notes (3)
- Cross-reference Mrk. 4:1; Luk. 5:1-3
- Cross-reference Mat. 9:34, 10:25, 12:24; Luk. 11:15
- Cross-reference Mat. 12:32; Luk. 12:10
Alkitab Bahasa Wondama. Copyright © The Seed Company. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.