Skip to content
BibleKenya

Alkitab Bahasa Wondama

Markusi 4

Kavo sora tarawa nanapi siniotu vetotapa pi mor pasi

(Mat. 13:1-23; Luk. 8:4-15)

Nana raria pesi pa Yesus dieniniau ea na ruru Galilea dere pa. Kaiwasa pa sepau vesiri sesorumi. Aso jana pa siajai so wa viavoi pesi avori miesoi na jana, e siniotu vepau jasia setosa na ruru pai dere pa.1 Avori Yesus dieniniau vava pa pau maso sia nanapi kavo sora tarawa pai. Nanapi nie aniau jani, kievo maso sia e diojo. “Metadiawa! Siniotu viono romi pesi ria tiotapa pi mor pasi. Nana rabua tiotapa pi mor pasi pa, esasi sitawa na ria dere pa. Avori aja pa sirama e siasi to sikai mo. Pi mor pa esasi sitawa na uta veve rovuki vene kakopa pau va, avori pi mor jasi saira sitipu aso kakopa pai mienis pana, vape rabua wor pai sia pa, tuba pasi simaninu avori simasa e sivoru aso nie war pai kasa sua so kakopa pai raropa va. Pi mor pa esasi sitawa ea na rabua samuei waititi veve sinia pasi. Avori sitipu e sisop kepana tuba pasi veito sivoru, apajoma sive buo va. E pi mor pa esasi sitawa na kakopa viate pai, pi mor jasi sitipu e sibaba avori sive buo, Esasi ma sisuvir buo pasi sipau pa siniotu siri e sura, esasi ma sipau pa siniotu toru, esasi ma sipau pa utin siri rawai.” Janama kievo maso sia e diojo, “Teini vie taradiau mamo, diediawa!”

Nana rabua Yesus miesari pa, siniotu viadiawa Nie aniau to manau pa esia tutiri Nie siniotu sura e muandu verausari pasia, sendama so I. Setutani nanapi kavo sora tarawa pai, nie tarai pai. Apa Yesus ruar e diojo, “Allah diono sanepaja ave menduin vava vianiwara pasi nanapi Allah vie pareta ariri Raja pa. Vape maso siniotu vevesiei pasia ma, jeniniau sia tutiri kavo sora tarawa vea, ave amamo

‘Nari tawana sesajo, vape setatara so vitopi setadiawa pa,

nari tawana setadiawa, vape sa senduini va,

ave amamo sesovera sia so Allah e vie ampun sia vape moja.’ ”2

Avori kievo maso sia e diojo, “Masisi menduin kavo sora tarawa jani va, Toanetoi menduin kavo sora tarawa vevesiei pasi vura pa? Siniotu vetotapa pi mor pai miesi ariri siniotu vetopana Allah nie Kavo pai. Pi mor vetawa na ria pai ma miesi ariri siniotu viadiawa Allah nie kavo jani, e Bilis pai riama e diewara kavo vetotapa pai nana sesanemi raro pasi. Pi mor vetawa na uta veve rovuki pai ma miesi ariri siniotu viadiawa Allah nie kavo pai, saira e kiori tutiri sane vesasie. Vape Allah nie kavo pai ma vie war na sesanemi raro pasi va, apajoma sesanemitiar katu vea. Nana rabua jana sesamuai marior pivai kariria pai aso kavo jani, apa saira semanau sene sanetiar pai, pi mor vetawa na uta samuei waititi veve sinia pai ma miesi ariri siniotu viadiawa Allah nie kavo jani, vape sesanemi sasera sia nanapi sene tenam na dunia nei e seto sesamuai pi vepau e sesanemi kariria pi vura. Apavo pi ninesi sisop kepana kavo jani na sesanemi raro pasi, veito sisuviri buo va. Pi mor vetawa na kakopa viate pai ma miesi ariri siniotu viadiawa Allah nie kavo pai e senggorusari avori sesamuai buo vepau mo, esasi ma sipau pa siniotu siri e sura, esasi ma sipau pa siniotu toru, e esasi ma sipau pa utin siri rawai e sisuviri buo.”

Kavo sora tarawa nanapi padamara vesioria tutiri kabesu

(Luk. 8:16-18)

Avori Yesus kievo maso sia e diojo, “Siniotu pesi kiairi padamara pai mamo kukuv tawani nana kabesu pesi va, pivai piri na patar sanevava pa va, vape piri padamara pai nana nie uta vetariai.3 Aso pi borai vianiwara pasi ma nari siveruana, e sa senduini piesa varami, nari siveruana, e senduinasi.4 Teini vie taradiau mamo, diediawa!”

Avori Yesus kievo ea e diojo, “Mesanemipai to vesie mo pi vitosi metadiawasi pa! Ariri aitato metono maso siniotu vevesiei pai, nari Allah dionasi so mia kota, e vevata mo dioni rawai ea.5 Aso teini siemuai to manau pa, nari siemuai to pau rawai; vape teini siemuai va pa, katu venana i rami pasi, nari vekosi vurusui kota.”6

Kavo sora tarawa nanapi pi mor vetipu

Avori Yesus kievo e diojo, “Allah vie pareta ariri Raja pa, miesi ariri siniotu pesi tiotapa pi mor na kakopa. Diru mamo diena; sasaar mamo siobatai e nienaripi. E pi mor pasi sitipu e sibaba, vape siniotu jani ruini va so toanetoi pi mor jasi sitipu e sibaba pa. Kakopa jani matau viediajara pi mor wasi sisuviri buo: retena pa kua pai, e kai pai, avori resapupa, sisuviri buo pasi sive samuri. E masisi buo jani mierai to manau, siniotu jani sawawarae kutusi, aso raria pai miesi to manau so vekorsi.”7

Kavo sora tarawa nanapi sawi mor

(Mat. 13:31-35; Luk. 13:18-19)

Avori Yesus kievo ea maso sia e diojo, “Nanapi Allah vie pareta ariri Raja pa, vitopi diadi so tatonae sumasi vaveri pa? Kavo sora tarawa vitopi diadi so tanggor ave tatopani pa? Allah vie pareta ariri raja pa ma miesi ariri sawi mor vetotapa na kakopa. Sawi mor jani bieba mo va nana mor esi pasi vura na dunia nei. Vape masisi tiotapa sawi mor jani to manau mamo, tipu e bieba rawai vurusu rau esi pasi vura. E suviri arawa vebaba, apajoma aja pasi diadi so sinanari karai na arawa pasi.”

Nanapi kavo sora tarawa pa pau ariri ninei, Yesus tiopana Allah nie Kavo pai maso sia, ariri tutiri sene ruina pasi. Yesus tawana kievo nana kavo sora tarawa ave dieniniau siniotu jasia. Vape nana kasau miesari tutiri nie verausari pasia, tiopa sasaar a kavo sora tarawa jani nie tarai pasi vura maso sia.

Yesus dionae diobara pai mieri

(Mat. 8:23-27; Luk. 8:22-25)

Nana raria jani, ravinena to manau pa, Yesus kievo maso nie verausari pasia e diojo, “Mendama ve tatapai avaru so ruru nei rawesi wa.” Nie verausari pasia sembavu vurusu siniotu vepau pasia na ruru pai dere pa e sesajai so wa pai. Yesus miesoi na wa jani to manau. Janama Yesus tutiri nie verausari pasia setapai. Wa esi pasi siepai usara sia kota. Janama diobara pai sio to karakuai. Bata pimasa pai riora e sua so wa pai raropa, veito wa pai vare dionu tutiri kambu pai. Nana kasau jana Yesus ma andija diena nana wa pui pa tutiri pir ru pa na nora pai. Apavo nie verausari pasia sembauni e senggavo maso I e setojo, “Guru, nari tanggariria, au ma sanepai tata va e?” Yesus biatai, avori kievo suara wana pai tutir ruru pai e diojo, “Pueja! Mueri!” Avori wana pai mienau e ruru pai mieri vesiri. Avori Yesus kievo maso nie verausari pasia e diojo, “Aso vitopi mematai pa? Aso vitopi mesanemitiar maso jau va pa?” Apavo sematai e senggavo vavera e setojo, “Siniotu ninei ma teinina mo, apajoma wana tutir bata pa sunggorusari pa?”

Source notes (7)
  1. Cross-reference Mrk. 3:9-10; Luk. 5:1-3
  2. Cross-reference Yes. 6:9-10
  3. Cross-reference Mat. 5:15; Luk. 11:33
  4. Cross-reference Mat. 10:26; Luk. 12:2
  5. Cross-reference Mat. 7:2; Luk. 6:38
  6. Cross-reference Mat. 13:12, 25:29; Luk. 19:26
  7. Cross-reference Yl. 3:13

Alkitab Bahasa Wondama. Copyright © The Seed Company. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.