Markusi 5

Yesus dietavar wainunu vekariria pai vurusu siniotu Gerasa pai

(Mat. 8:28-34; Luk. 8:26-39)

1Janama Yesus tutiri nie verausari pasia sesirieu na ruru Galilea rawesi pa, na uta Gerasa. 2Erine vori Yesus viar nana wa pai, siniotu mua pesi suvi nana papi pasi riama so I. 3Siniotu jani ma tiere wainunu vekariria e miesoi na papi pasi. Kasa esi piaja so kiesiesi ea va, e kota kasa senggasiesi tutiri wai rante va. 4Aso sembe wanggai e senggasiesi tutiri wai rante pasi ora to manau, vape tawana piotititu wai rante pasi, e dionae wangga pasi sikariria. I ma piaja vesiri apavo kasa esi rut tawani va. 5Diru sasaar ma ria vavera nana papi pasi e na suovavo pasi, tutir dienanar e diono nie tarai pai vie kakapor tutiri rovuki. 6Nana rabua siejo Yesus nana ve kasau pa, diepai buri e disa aebu na Yesus aropo pa. 7Avori dienanar to baba vesiri e diojo, “Yesus, Atuma Allah vetariai mo panau! Vitoini buo buoni maso jau pa? Nanapi Allah sano pa, isau so au, buono marior pai so jau vape moja!” (8Siniotu jani kievo tojana aso Yesus kievo so i e diojo, “Wainunu vekariria panau, suvi vurusu siniotu ninei!”) 9Avori Yesus dutani e diojo, “Sanomu pa teina?” Siniotu jani ruar e diojo, “Sano pa Legion, aso ama pau vesiri pana!” 10Vevata mo siau so Yesus, ave amamo dietavar wainunu vekariria pasi sisuvi vurusu uta jana vape moja.

11Deriaisi uta jana, pimuna tau pimasa pesi asija sira e sisasera pisia na dere wisi pa. 12Wainunu vekariria jasi sisau so Yesus e siojo, “Buemiasa ama e amasua so pimuna tau wai.” 13E Yesus miajar. Avori, wainunu vekariria jasi sisuvi vurusu siniotu jani e sisua na pimuna jasi. Pimuna tau jasi siepai e sikopa nana derewisi pa so ruru pai raro pa avori simarutu e sivoru, pimuna pa sipau pa vare siaran muandu.

14Siniotu viarama pimuna pasia setapai, e setopanusara vava jani na bendar pai e na aniose vederiaisi pasi. Avori siniotu pasia sesuvi ave sesajo vitopi vediadi pa. 15Sendama so Yesus, avori sesajo siniotu vetere wainunu vekariria jani, aja miesoi na jana, dievavar to manau, e nie sanepaja pai tindija kota to manau. Apa sematai. 16Siniotu vesajo vava jana mesari pasia, setopanusara so siniotu verama pasia, nanapi vitoini vediadi maso siniotu vetere wainunu vekariria pai pa, e pimuna pasi pa. 17Avori kaiwasa vemasoi na uta jasia sesau mo ave Yesus vievu vurusu sene uta pai.

18Nana rabua Yesus siajai so wa pa, siniotu erine vetere wainunu vekariria pai siau maso Yesus, ave amamo diadi so dioti. 19Vape Yesus miajar va, kievo e diojo, “Vuevu so nomu anio pai e tuopanusara maso nomu maneta pasia nanapi Syen nienari maso au pa e nie sanepaja pai maso au to manau pa.” 20Janama siniotu jani ria, e tiopanusara na uta Dekapolis, vitoini Yesus nienari maso i to manau pa. Siniotu vura viadiawa vava jana pasia setandor.

Yesus dionae Yairusi atu pai tienam sovera tutir vavi vetere pota veria vavi pesi pienam

(Mat. 9:18-26; Luk. 8:40-56)

21Yesus siovera ea avaru so ruru pai rawesi pa. Na ruru pai dere pa, siniotu vepau pasia sendama e sesorum wawariri Yesus. 22Siniotu veveru nana anio ari agama Yahudi pesi sano pa Yairusi, riama so i. Nana rabua siejo Yesus pa, i ma disa aebu na aropo pa. 23E siau mo maso I e diojo, “Jai, ine atuma vavi wai piota veito vare vioru. Isau mo, ruama e pir varamu pa ajai so i, ave amamo pienam e vioru vape moja!”

24Apavo Yesus ria tutiri Yairusi. Siniotu vepau pasia senda usari e sesorum kobar sia e sederiaisi Yesus.

25Na rabua siniotu vepau jasia, vavi pesi tiere pota veria vavi, woroi pa taun sura e muandu to manau. 26I ma mierior mo, nie pi vepau pasi sikai so viaiti dokter pasia pana, vape siemuai panam pai va, e nie pota pai dinggariria rawai ea. 27Vavi jani diediawa to pau nanapi Yesus to manau. Apavo na kasau rabua siniotu vepau jasia, ria dieriaisi Yesus nana karupa e diekara rut nie sasu viaroi pai, 28nienari tojana, aso nie sanepaja ma diojo, “Masisi jekara irut na nie sasu viaroi pai mamo, nari isamuai panam pai!” 29I ma diekara rut Yesus nie sasu viaroi pai, e na jana kota nie veria pai sioeta. Sane riruina nie tarai pai mana, pienam nana nie pota pai to manau. 30Nana rabua jana kota, Yesus sane riruina toapa paja venana nie tarai pa esa suvi to manau. Apavo diarai e duta maso siniotu vepau jasia e diojo, “Teini dieka ma rut na ine sasu viaroi pai pa?” 31Nie verausari pasia senduar e setojo, “Jai suejo siniotu pa sepau e sesorum kobara au. Aso vitopi buta e buojo, teini dieka ma rut au pa?”

32Vape Yesus siejo so viosa wawariri pasia ave amamo siesera siniotu teini dieka ma ruti pa. 33Vavi jani ruina toapa vitoini vie diadi nana nie tarai pai pa, tutiri mietai veito titiat apa disa aebu pasi na Yesus aropo pa e tiopa sasaar a jasi vura. 34Avori Yesus kievo maso vavi pai e diojo, “Ine atuma panau, aso sanetiar maso jau, puenam! Apavo vuevu tutiri vesie pai. Vevata puenam nana nomu pota pai to manau!”

35Nana rabua Yesus andija kievo rami, e esia sendama nana Yairusi nie anio pai, veveru na anio ari agama Yahudi pai. Senggavo maso Yairusi e setojo, “Nomu atuma vavi pai vioru to manau. Buo vaveri Gurui ea vape moja.” 36Vape Yesus kior usara kavo senggavora pasi va. Apavo kievo maso Yairusi e diojo, “Muetai va, sanetiar vea!” 37Yesus dierandu siniotu vevesiei pasia senda usari. Vape Petrusi, Yakobusi tutiri Yohanesi sandu ma neta ni sandu. Setoru senda usari vea. 38Nana rabua sendama so Yairusi nie anio pai, Yesus siejo siniotu venana jasia sesawau, sesai e senggavavo tutiri raupui vebaba. 39Avori Yesus sua e kievo maso sia e diojo, “Aso vitopi mesawau e mesai pa? Atuma vavi ninei ma vioru va, vape diena vea!” 40Vape semari Yesus.

Apa diemiasa siniotu jasia vura sesuvi nana anio pa. Avori kior atuma vavi nei siniani e tamani sandu tutiri nie verausari pa setoru, sesua so andiraro atuma jani. 41Yesus diekara rut na atuma jani vara pa avori kievo maso i e diojo, “Talita kum,” nie tarai pai ma, “Kavi, ikavo maso au e jojo, suobata au!” 42Atuma karavi jani saira biatai, e ria. Nie tenam pai taun sura e muandu to manau. Siniotu vesajo vava jasia vura senggavo usara mo! 43Vape tutiri karakuai Yesus dierandu setopana vava jana maso teinina kota. Avori kievo e diojo, “Metono atuma karavi jani diapi.”