Skip to content
BibleKenya

Alkitab Bahasa Wondama

Markusi 6

Siniotu Nazaret pasia senggavo pidiara Yesus

(Mat. 13:53-58; Luk. 4:16-30)

Avori Yesus tutir nie verausara pasia senda vurusu uta jana e sendama so matauni Nie aniose pa. Nana raria Sabat pai pa dieniniau na anio ari agama Yahudi pai. Siniotu pa sepau senana jana. Nana rabua siniotu jasia setadiawa Yesus nie kavo aniau pasi pa, senggavo usara e setojo, “Dieniau pi borai jasi pa nana topina? Toanetoi vori siemuai sanepaja vetindija ninei? Toanetoi diadi so nienari pitandor pasi pa? Tanduini I ma siniotu venanari ai nina, Maria atu paina. E Yakobusi tutir Yoses, e Yudasi tutir Simoni neta pasia na. E nie raruo vavi pasia semasoi tutiri tata na nine kota.” Aso jana pa senggavo pidiari. Avori Yesus kievo maso sia e diojo, “Nabi pesi ma siemuai tatuana nana aniose vevesiei pasi, vape nana matauni nie aniose pai, e nie neta pasia tutiri nie anio raro pasia, kasa siemuai tatuan va”1 Na uta jana Yesus kasa nienari pitandor pa pau va, vape dionae siniotu vepota pa sembe toi sepanam vea tutiri pir vara pa ajai so sia. I ma tiendor aso sesanemitiari va pana.

Yesus diemiasa nie siniotu sura e muandu verausari pasia

(Mat. 10:5-15; Luk. 9:1-6)

Janama Yesus ria wawariri aniose esi pasi vura, e dieniniau kaiwasa pai. Yesus siau nie siniotu sura e muandu verausari pasia, avori diemiasa sia sembe muandu-muandu e diono paja maso sia ave amamo setatavara wainunu vekariria pasi. E diono arer ninei maso sia, “Kasa menggor pi nana mene rara pai va, vape menggor aitato pai vea. Kasa menggor pisia, rota sua e pipi va.2 Diadi so mesasa ae vasor, vape kasa menggor sasu pa muandu va.” Avori kievo ea so sia e diojo, “Masisi mesua so anio pesi mamo, memasoi na jana, veito mesuvi ea na uta jana. Vape masisi menda so uta pesa, e siniotu venana jasia senggavo pidiara mia e senggambarai setadiawa mene kavo pasi, mesuvi vurusu uta jana. E mendora upisi wabu venana mendaemi pasi, ave amamo sive pi reu maso sia toapa sembe sasara.”3 Apavo Yesus nie siniotu sura e muandu verausari pasia sesuvi e senda, setopanusara Allah nie kavo pai toapa siniotu pasia nari semanau sene tatar pasi. E setatavar wainunu vekariria pa pau, sesokiara mani zaitun pai maso siniotu vepota pasia e setonae sepanam.4

Yohanesi viono kambu masi pai vioru pa

(Mat. 14:1-12; Luk. 9:7-9)

Raja Herodesi kota diediawa kavo nanapi Yesus, aso Yesus sano pa senduini na uta vetutira to manau. Esia senggavo e setojo, “Yohanesi viono kambu masi pai, andi tienam riwanea na rabua siniotu vevoru pasia! Apajoma paja pai niana so nienari pitandor jasi.”5 Vape esi pasia senggavo e setojo, “I ma nabi Eliai.” Esi pasia ea senggavo e setojo, “I ma nabi pesi nina masi ariri nabi vepapo pasia.” Nana rabua Herodesi diediawa kavo jana pa, kievo e diojo, “Ariria mamo ninei ma Yohanesi viono kambu masi paina, jemiasa ine verut pimamuna pasia setaratu ru pai to manau. Nine ma tienam riwanea!”

Aso aja pi ninesi sive diadi varami pa ma, Herodesi diemiasa nie verut pimamuna pasia setapu Yohanesi, e setoni e sua na bui pa raropa. Herodesi nienari to jana aso Herodesi riaut Herodiasi, andina neta Pilipusi vinie paina.6 Yohanesi kievo suara Herodesi tonine, “Kasa ruaut tutiri nemetapi vinie pai va!” Aso jana pa Herodiasi pir kasiou so Yohanesi e dio mu Yohanesi, vape i ma kasa diadi va, aso Herodesi mietai maso Yohanesi, aso ruina toapa Yohanesi ma siniotu ve tindija e veve sren nina. Apavo diemiasa siniotu pasia setarama vedior Yohanesi to vesie. Nana rabua diediawa Yohanesi kavo kievora pasi mamo sane vavera, vape sane vesie diediawa Yohanesi kavo kievora pasi.

Manau pa, Herodiasi siemuai kasau viate pesi. Nana rabua jana Herodesi nie raria vie diadi pai pa, diono mei pesi so veve baba nana pareta pasia, veveru nana verut pimamuna pasia e siniotu veve sano na Galilea pasia. Nana mei pai pa, Herodiasi nie atuma karavi pai sua e miejai, e dionae Herodesi tutiri nie siniotu verama pasia sesanemi vesie vesiri. Apavo Herodesi kievo maso karavi pai e diojo, “Vitoni sane vesieni e suawi vea mamo, nari joni so au!” Avori Herodesi siauwora maso karavi pai e diojo, “Suau pi vitoi vea, nari jono maso au, veito diadi so jono ine kerajaan nei savaru esa!” Apavo karavi jani ria e duta siniani e diojo, “Mai, vitoini nari isauwi pa?” Siniani ruar e diojo, “Suau Yohanesi viono kambu masi pai nie ru pai.” Janama karavi pai sawawara e siovera so Herodesi e kievo e diojo, “Imajar, saira buono Yohanesi viono kambu masi pai ru pai, tini nana pitina pesi vavopa maso jau!” Herodesi diediawa kavo jana, sane pa vesai vesiri. Vape i ma kasa dioipidiara va, aso siauwora to manau na aropo nie siniotu verama pasia pana. Apa sawawarae diemiasa siniotu viarama pesi ave amamo kior Yohanesi viono kambu masi pai ru pa. Apa siniotu viarama jani ria so bui pai, avori pieratu Yohanesi ru pai. Avori kior ru jani e tini nana pitina pai vavopa e dioni raso karavi jani. E karavi jani dioni ea raso siniani.

Nana rabua Yohanesi nie verausari pasia setadiawa vava jana pa, sendara senggor Yohanesi nie wominggo pai avori sepiri na papi pasi.

Yesus diono pisia maso siniotu siaran rim pasia

(Mat. 14:13-21; Luk. 9:10-17; Yoh. 6:1-13)

Janama rasul pasia sesovera ea, e senduir tutir Yesus. Setopan usara pi senanari tutiri setaniauwa to manau pasi vura maso I. Avori kievo so sia e diojo, “Mendama tanda so uta veseja pesa, ave tamesari, e tamanau marior katuri.” Aso kaiwasa pai piau vera e verama, apavo sembaro kasau so setapi. Apa setinda e sesajai so wa pai e setapai so uta veseja pesa. Vape siniotu vepau pasia sesajo sesuvi vurusu uta jana pa, e senduina sia ma teisia na. Apa sesuvi nana aniose pasi vura e setapai usara sia nana dorei pai e sepapo Yesus tutiri nie verausari pasia. Nana kasau Yesus viar na wa pai, siejo siniotu vepau jasia, apa sanepai sia, aso sembava ariri domba vevaro gembala. Avori dieniau vava vepau maso sia.7 Nana rabua ravinena to manau pa, nie verausara pasia sendama so I e setojo, “Uta nine ma seja e deriaisi diru pa wana. Vesie mamo buemiasa kaiwasa nine sia e senda, ave amamo diadi sembori pisia seta, na aniose vederiaisi ninesi.” Vape Yesus ruar maso sia e diojo, “Mia nari metono pisia so sia.” Apa senggavo so I e setojo, “Apavo, nari amanda amambori mamami, e amambaiti na dinar8 utin muandu ave amatitaum sia e?” Avori Yesus duta sia e diojo, “Mene mamami pa toi? Ite menda mesajo,” Senda e sesajosi to manau pa, senggavo so I e setojo, “Mamami pa rim e dia pa muandu to.” Avori Yesus diemiasa kaiwasa pasia semasoi nana samue vekake pa vavopa e sembe kuaruvi. Apa semasoi e sembe kuaruvi, esia sembe utin siri, e esia sembe siniotu muandu e sura. Janama Yesus kior mamami rim pasi tutiri dia muandu pasi, avori siejo sasana so rora wa e tiopana vesie maso Allah. Manau na jana, piosasavu mamami pasi e dionasi so nie verausari pasia, ave amamo sembovosi maso kaiwasa vepau jasia. Toapa jana kota, dia muandu pa sandu sembovosi usara sia vura. Kaiwasa pasia vura setapi to semosir. Janama Nie verausari pasia senduiri mamami e dia tamua pasi pa, kondiomi pa sura e muandu. Siniotu mua vian mamami pasia sepau pa sembe siaran rim.

Yesus ria na kambu pa vavo pa

(Mat. 14:22-33; Yoh. 6:16-21)

Manau na jana pa, Yesus saira e diemiasa nie verausari pasia sesa so wa pai e setapai papo vurusui so Betsaida nana ruru pai rawesi wa, avori diemiasa siniotu vepau jasia e sembavu. Manau na jana, Yesus vievuru siniotu jasia, diauta ajai so suovavo pesi, ave vie nadi. Nana rabua jana diru to manau, nie verausara pasia sene wa pai niana ruru pai rabua pa to manau, vape Yesus miesari niana dorei wa. Siejo sia mana setosasera vesiri semboso wa jani aso wana pai sio sunu sene wa pai nana dopo pa. Apa vare oras toru bera pai, ria nana kambu pa vavopa maso sia, e dio ria kara sia. Nana rabua sesajori toapa ria nana kambu pa vavo pa, semamo I ma wori nina, apa setananar, aso sia vura sesajori e setandor vesiri. Vape sawawara e Yesus kievo maso sia e diojo, “Memanasi vea! Ja nine, mematai vape moja!” Janama siajai so wa pai, e wana pai mieri. Avori Nie verausara pasia setandor vesiri. Aso, aja senduini varami nanapi Yesus nienari pitandor nana rabua diono mamami rim e dia muandu pa sandu maso kaiwasa siaran rim pasia pa, e sesanemi pasi aja situp rami.

Yesus diono panam maso siniotu vepota na Genesaret pasia

(Mat. 14:34-36)

Na kasau Yesus tutir nie verausari pasia sesirieu na ruru pai rawesi pa, setavoi na uta Genesaret. Nana rabua sembiar vurusu wa pai, sawawara kaiwasa pasia sesajo riruin Yesus. Avori setapai vavera na uta jana vetutira, e setinggoro kaiwasa vepota pasia nana andiau pasi vavopa maso Yesus. Masisi setadiawa toapa Yesus niana uta pesa, senggor kaiwasa vepota pasia maso jana. Nana uta topina vea Yesus ria so bendar pasi, na aniose baba to aniose katu pasi, siniotu pasia tawana sendama e sepiri siniotu vepota jasia na uta vevovo pi pasi. Avori sesau so I, ave amamo siniotu vepota pasia setakara sendut Yesus nie sasu viaroi pai dere pa. Apa siniotu viekara verut nie sasu pasia vura sesamuai panam pai.

Source notes (8)
  1. Cross-reference Yoh. 4:44
  2. Cross-reference Luk. 10:4-11
  3. Cross-reference Mat. 10:14; Kis. 13:51
  4. Cross-reference Yak. 5:14
  5. Cross-reference Mat. 16:14; Mrk. 8:28; Luk. 9:19
  6. Cross-reference Mat. 14:3-4; Luk. 3:19-20
  7. Cross-reference Bil. 27:17; 1Raj. 22:17; 2Taw. 18:16; Yeh. 34:5; Za. 10:2; Mat. 9:36
  8. Footnote dinar Vait so siniotu venanaripi na raria vura.

Alkitab Bahasa Wondama. Copyright © The Seed Company. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.