Skip to content
BibleKenya

Alkitab Bahasa Wondama

Markusi 7

Allah nie pareta pasi e Yahudi pasia sene buai tawawari pasi

(Mat. 15:1-20)

Nana raria pesi pa, siniotu Farisi pesia tutir siniotu veruin sasavu kavo aniau na Torat pa esia, sendama nana Yerusalem e sesamuai Yesus. Sesajo Yesus nie verausari pesia, aja setapi tutiri sembarami veve rariai pasi, aso sendoisi sembarami pasi papo va pana ariri sene buai agama Yahudi pai. Siniotu Farisi pasia tutir kaiwasa Yahudi esi pasia vura ma kasa setapi va, masisi aja sendoisi rurana sembarami pasi varami, aso senggorusara setapumi pasia sene buai tawawari pasi pana. Masisi sembavu na uta sembovo pi nana wasi, sendoisi rurana sene tarai pasi papo pino, setapi pe. Nari senggorusara pareta buai vepau esi pasi nana setapumi pasia, ariri pareta veroisi rurana toki, ajuki e pi saserai siniotu senanari na barawa pasi. Apavo siniotu Farisi pasia tutiri siniotu veruin sasavu kavo aniau na Torat pasia setuta maso Yesus e setojo, “Aso vitopi Nomu verausara nesia setapi tutiri sendoisi sembarami pasi va pa? Aso vitopi senda ariri tatapumi pasia sene buai tawawari pasi va pa?” Yesus ruar e diojo, “Siniotu viawi titituwa vedia mia! Vevata mo Nabi Yesayai tiopana Allah nie arer pai ariri mia to manau, e vui nana nie surat pai tonine,

Kaiwasa jasia ma sesom Jau tutiri kavo vea,

vape sesanemi raro pasi ma, sive kasau vurusu jau.1

Sesom jau saradidioi vea,

aso aniau setaniauwa so kaiwasa pasia ma, siniotu sine pareta sina!

Mia ma menanari ariri Allah nie pareta pasi va, e mendu kepana siniotu sene buai tawawari pasi.”

Avori Yesus kievo ea e diojo, “Menduini vesiri nanapi menggavo pidiara Allah nie pareta pasi pa, ave amamo menda ariri metapumi pasia sene buai tawawari pasi. Musai diono pareta ninesi to manau, ‘Tuetuan tamamui e siniamui sandu, e Teini sioramo so tamani e siniani sandu mamo, nari siemuai kariria voru pai.’2 Vape metaniniau tonine: Masisi siniotu pesi kievo maso nie baba pai e diojo, ‘Vitopi nari jono maso jai e mai mandu pa, kasa jonasi va, aso jonasi ve pi som maso Allah to manau,’ apavo membedioro siniotu jani ave diono piesa maso tamani e siniani sandu. Apa tutiri mene aniau pai, e mesoete Allah nie Kavo pai aso menda ariri buai tawawari nana metapumi pasia pana. E aja menanari pi pa pau vemasi tutiri ninesi rami.”

Avori Yesus siau siniotu vepau pasia riwanea, e kievo maso sia e diojo, “Metadiawa to vesie ave menduina! Pi vitoi vea vera nana vorira e vesua na siniotu pesi, jasi ma kasa sivediajara rariai so i va, vape pi vesuvi nana siniotu jani, asi sivediajara rariai so i. [Teini vie taradiau mamo, diediawa!]”

Nana rabua Yesus vievuru siniotu vepau jasia e sua apui so anio pesi pa, nie verausari pasia setuta maso I nanapi kavo sora tarawa jani nie tarai pai. Apa Yesus kievo maso sia e diojo, “Avo aja menduini varami e? Pi vura siniotu pesi dian e dunu pasi ma kasa sivediajara rariai maso siniotu jani na aropo Allah va. Aso pisia pasi ma, sisua so sane raro pa va, vape sisua so sane kara pasi, avori sisuvi nana tane tarai pasi.” Tutiri kavavo jasi Yesus vieruana toapa pisia pasi siete vura. Avori Yesus kievo ea e diojo, “Pi vesuvi nana siniotu jani nie sane raro pai ma, nari sivediajara rariai so i. Aso nana siniotu pa sane raro pasi sisuviri sanepaja vekariria. Sanepaja jani viediajarae siniotu pai senanari kavo vavi, setamanana pi, semun siniotu, setena tutiri siniotu vevesiei sine vinie pivai sine sawa, setawi titituwa, sesisiajara, tutiri senanari vava saserai vekariria, setoso pi vepau, setatuan va, sane kariria pi, sesanandiki sia, senanari nganggau pai aso sendumi pasi sikarakuai pai pana. Pi vekariria jasi vura ma sisuvi nana sane raropa, e jasi sivediajara rariai so siniotu.”

Vavi pesi nie sanetiar pai

(Mat. 15:21-28)

Janama Yesus ria vurusu uta jana e ria so uta Tirus. I ma sua apui so anio pesi e kiembarai esia senduina so niana jana pa. Vape i ma kasa dieniwa va. Vavi pesi nina, wainunu vekariria pai sua nana nie atuma vavi pai. Nana rabua vavi jani diediawa nanapi Yesus pa, riama so I e tietuani na aropo ae pasi. Vavi jani ma siniotu Yahudi nina va, vieva nana Siro-Fenisia. E siau so Yesus ave amamo dietavar wainunu vekariria pai vurusu nie atuma vavi pai. Yesus kievo maso i e diojo, “Tatonae atuma pasia nari setapi to semosir papori. Vesie va so tanggor pisia vurusu atuma pasia e tasosi raso wona pasi.” Vape vavi jani ruar e diojo, “Syen, kuevo pa tindija. Vape wona venana dora pai sanevava pasi ma sian atuma pa sene pisia moma vetau avav pasi kota!” Avori Yesus kievo maso i e diojo, “Aso nomu ruar jana pa, vuevu vea; wainunu vekariria jani suvi vurusu nomu atuma vavi pai to manau!” Janama vavi jani vievu so nie anio pai e siejo nie atuma vavi pai viata nana patar pai, e wainunu vekariria jani suvi vurusui to manau.

Yesus diono panam so siniotu vene taradiau poja to vesoremi mumuja pesi

Janama Yesus ria vurusu uta Tirus, e ria kara Sidon tutir uta Dekapolis maso ruru Galilea. Na jana esia senggor siniotu vene taradiau poja e vesoremi mumuja pesi maso Yesus. Sesau maso I e piri vara pa pa ajai so siniotu jani. Yesus kior siniotu jani e sumbe kasau vurusu siniotu vepau pasia, janama siosara varakia pai susa siniotu jani taradiau pai. Avori Yesus kienisu e dieka siniotu nei tapare pai. Janama Yesus siejo so rora wa, avori sierap sasie to woroi e kievo so siniotu nei e diojo, “Efata,” nie tarai pai ma, “Tuesieva!” Kasau jana kota taradiau pasi sitasieva e tapare ve marabat pai tiepisa janama kievo to vesie. Avori Yesus dierandu sia ave setatopa usara kavo jani maso siniotu vevesiei vape moja. Dierandu sia vei vea tojana, vape setatopa usari vei vea. E siniotu vura viadiawa kavo jani pa setandor vesiri. Senggavo e setojo, “Pi vura nienari nesi ma siete vesiri! I ma dionae siniotu vene taradiau poja pai diediawa e siniotu vesoremi mumuja pai kievo!”

Source notes (2)
  1. Cross-reference Yes. 29:13
  2. Cross-reference Kel. 20:12, 21:17; Im. 20:9; Ul. 5:16

Alkitab Bahasa Wondama. Copyright © The Seed Company. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.