Markusi 8

Yesus diono pisia maso siniotu siaran at pasia

(Mat. 15:32-39)

1Nana raria pesi pa, siniotu pa sepau vesiri sesorum Yesus ea. Nana rabua jana sembaro pisia, Yesus siau Nie verausari pasia e diojo, 2“Isanemipai maso siniotu vepau nine sia. Senda usara jau woroi pa raria toru, e sembaro pisia. 3E masisi jemiasa sia sembavu so sene anio pasi tutiri sembavisi, nari setawa na ria pai rabua pa, aso esia ma sendama nana uta viaroi.” 4Yesus nie verausari pasia senduar e setojo, “Tanana uta veseja nine, na topina diadi so tasamuai pisia vemasi maso siniotu nine sia vura setasi e semosir pa?” 5Yesus duta maso sia e diojo, “Mene mamami pa toi?” Senduar setojo, “Rim e muandu.” 6Avori Yesus diemiasa siniotu vepau jasia semasoi nana kakopa vavo pa. Manau pa kior mamami rim e muandu jasi, e tiopana vesie maso Allah, avori piosasavuasi tutiri vara pa e dionasi maso nie verausari pasia, ave amamo sembovosi maso siniotu vepau pasia. Apa nie verausari pasia senanari aririasi. 7Sesamuai dia katu pa esasi kota, Yesus tiopana vesie maso Allah nanapi dia jasi, avori diemiasa nie verausari pasia sembovo dia jasi kota. 8E setapi veito semosir. Janama siniotu pasia senduiri pisia tamua pasi, sipau pa kondiomi pa rim e muandu sionu. 9Siniotu viapi pasia sepau pa vare sembe siaran at. Avori Yesus diemiasa sia sembavu. 10Manau pa Yesus siajai so wa pai tutiri nie verausari pasia e setapai so uta Dalmanuta.

Siniotu Farisi pasia sesau Yesus nienari pitandor

(Mat. 16:1-4)

11Avori siniotu Farisi pesia sendama so Yesus e senggavo vavera tutiri. Seto sesotouri. Apavo sesau Yesus nienari pitandor veveruana toapa I ma riama nana Allah.1 12Yesus diemuaus nanapi sane raro pa e diojo, “Aso vitopi kaiwasa vetenam na rabua nine mia, mesau inanari pitandor pa? Vevata mo Ikavo maso mia, inanari pitandor maso mia va!” 13Avori Yesus ria vurusu sia, siajai so wa pai; janama diepai avaru so ruru pai rawesi pa.

Siniotu Farisi pasia sene ragi pai e Herodesi nie ragi pai

(Mat. 16:5-12)

14Yesus nie verausari pasia separo senggor mamami pasi. Sene mamami pa siri vea na wa pai. 15Avori Yesus diono kavo sanepaja so sia e diojo, “Mesanemipai to vesie maso Farisi pasia sene ragi pai e Herodesi nie ragi pai.”2 16Apavo Yesus Nie verausari pasia senggavo vavera e setojo, “Kievo tojana, aso tambaro mamami pana.” 17Vape Yesus ruini sene kavo senggavora pasi. Apa duta maso sia e diojo, “Aso vitopi menggavavo nanapi varo mamami pa? Aja mesajo e menduina varami e? Mene sanepaja pa situp to manau e? 18Membe re, vape mesajo va. Membe taradiau, vape metadiawa va.3 19Apavo mesanemipai ea va e? Nana raria iposasavu mamami rim jasi so siniotu siaran rim jasia setasi pa, mamami tamua menduira pa, kondiomi vionu pa toi?” Senduar e setojo, “Kondiomi pa sura e muandu.” 20“E nana raria iposasavu mamami rim e muandu pasi so siniotu siaran at pasia setasi pa,” Yesus duta ea, “Mamami tamua menduira pa, kondiomi vionu pa toi?” Senduar e setojo, “Kondiomi pa rim e muandu.” 21Avori kievo maso sia e diojo, “Aja menduina varami e?”

Yesus dionae siniotu veremi kaber pai pienam na Betsaida

22Janama Yesus tutir Nie verausari pasia sendama so aniose Betsaida. Na jana siniotu pasia senggor siniotu veremi kaber pesi maso Yesus, e sesau maso I ave amamo pir vara pa ajai so siniotu veremi kaber jani ave dioni pienam. 23Yesus diekara rut siniotu veremi kaber jani vara pa e kiori so aniose pa vorira pa. Avori kienisu na siniotu jani re pai e pir vara pa ajai so i, duta e diojo, “Apavo diadi so suejo piesa e?” 24Siniotu jani siejo topo, avori kievo e diojo, “Isajo siniotu pasia senda pa, vape sembava ariri airavo.” 25Yesus pir vara ajai so siniotu pai re pa sandu ea. Apa siniotu pai re pa sandu sutasivu e pienam, e siejo pi jasi vura to vesie mo. 26Avori Yesus diemiasi vievu so nie anio pai e diojo, “Surapui so aniose jani ea vape moja!”

Petrusi tiopa nanapi Yesus ma Raja Vekor Vesie paina

(Mat. 16:13-20; Luk. 9:18-21)

27Yesus tutiri nie verausari pasia senda so aniose vederiaisi pasi na Kaisarea Filipi. Na ria pa rabua pa Yesus duta maso sia e diojo, “Ariri kaiwasa pai senggavo pa, teini Jau?” 28Senduar e setojo, “Esia setojo au ma Yohanesi viono kambu masi paina; esia kota setojo nabi Eliai, e esia setojo nabi pesi ni au.”4 29Duta maso sia e diojo, “Vape ariri mia mamo, teini jau?” Apavo Petrusi ruar e diojo, “Au ma Raja Vekor Vesie paina!”5 30Avori Yesus dierandu sia to karakuai ave setopanusari maso esia vape moja.

Yesus kievavo nanapi Nie marior pai tutir voru pai

(Mat. 16:21-28; Luk. 9:22-27)

31Janama Yesus dieniniau Nie verausari pasia toapa Atuma Siniotu pai nari siemuai marior to pau, e veveru pasia, imam baba pasia, siniotu veruin sasavu kavo aniau na torat pasia nari senggavo pidiari. Avori nari semuni, vape nana raria veve toru pai nari tienam riwanea. 32Yesus tiopa sasara pi jasi vura maso Nie verausari pasia. Apavo Petrusi sierap Yesus so dere pa, kievo maso I e diojo, “Kuevo tojana vape moja, Syen!” 33Vape Yesus diarai e siejo Nie verausari pasia, avori kievo suara Petrusi e diojo, “Bilis panau, rua vurusu Ine aropo ne! Aso au ma sanepai ariri sanepaja Allah va, vape ariri sanepaja siniotu vea.”

34Janama Yesus siau siniotu vepau pasia tutir Nie verausari pasia e kievo maso sia e diojo, “Teini dio ria usara Jau mamo, nari piorasa riwani, sieriou nie aitabat pai e ria usara Jau.6 35Aso teini dio rut tawana nie tenam pai, nari nie tenam pai niai. Vape teini siwi nie tenam pai aso ria usara Jau e tiopana Kavo Vesie pai mamo, nari siemuai tenam woroi-woroi mo pai.7 36Varo vesie maso siniotu pesi, masis siemuai dunia nei vetutira, vape nie tenam pai niai. 37Aso, kasa nienari piesasi ave siemuai sovera nie tenam va. 38Nana raria ninesi kaiwasa pasia senggambarai senggorusara Allah e senanari tatar. Apa masisi teini miemaja tiopa sasara Jau tutir Ine kavo pai. Atuma Siniotu pai kota nari miemaja tiopa sasara siniotu jani, na kasau riama nana Tamani nie sasaar pimasa pai pa, tutiri siniotu rora veve sren pasia.”