Markusi 9

1Yesus kievo ea maso sia e diojo, “Vevata mo, Ikavo maso mia e jojo, esia nana rabua mia na nine ma kasa memboru varami veito mesajo Allah vie pareta tutiri ipaja pai!”

Yesus vieruani nana sasaar pimasa pai na wi pa vavo pa

(Mat. 17:1-13; Luk. 9:28-36)

2Raria rim e siri pai kiara, janama Yesus kior Petrusi tutiri Yakobusi e Yohanesi, senda e setauta ajai so wi vetariai pesi. Semesari na wana vea. Avori setisajo Yesus nie tarai wai mana diombesiei na aropo sia.1 3Nie sasu pasi simamara veito sisanggapara. Siniotu venana dunia nei esi kota, kasa piapa avavar to miemara tojana va. 4Avori siniotu verausari ne setoru sesajo Yesus kievavo tutiri Eliai e Musai sandu. 5Apavo Petrusi kievo maso Yesus e diojo, “Guru, amasanemi vesasie vesiri so amanana uta nine pa. Vesie mamo nari amananari java pa toru: siri so Au, e siri so Musai, e siri so Eliai.” 6Petrusi kievo tojana, aso tietara kavo vitopi nari kievora pa, aso setoru sematai mo pana. 7Janama arepa pesi riama e tievun sia, e setadiawa raupui pesi nana arepa pai kievo tonine, “Nine ma ine atuma isanemipaja paina. Ariria mamo metadiawi!”2 8Sawawarae sesajo wawari sia, e sesajo siniotu vevesiei ea va, vape Yesus miesari tutir sia vea.

9Nana rabua sembiar vurusu wi pai pa, Yesus dierandu sia e diojo, “Kasa metopan usara pi erine vesajorasi pa so esia va, veito Atuma Siniotu pai tienam riwanea nana voru pai.” 10Apa senggorusara kavo jani, vape setoru senggavavo nana matau sia so Yesus nie kavo diojo “Tienam riwanea nana voru pai” nie tarai pai ma toane. 11Apavo setuta maso I e setojo, “Aso vitopi siniotu veruin sasavu kavo aniau na Torat pasia senggavo toapa Eliai nari riama papo, aja Kristus riama varami e?”3 12Yesus ruar e diojo, “Vevata mamo Eliai riama papo ave diono ariri pi pasi vura to siete. Vape nari toane tutir Atuma Siniotu nei? Aso vitopi Repo pai vui toapa nari siemuai kariria pa pau e nari kaiwasa pasia sesisiajari? 13Vape ikavo maso mia e jojo: Eliai riama to manau, e kaiwasa pasia setoni ariri sene majar. Imasi ariri Repo pai vui to manau pa.”

Yesus dietavar wainunu vekariria pai vurusu atuma vesoremi mumuja pesi

(Mat. 17:14-21; Luk. 9:37-43)

14Nana rabua Yesus tutiri Petrusi, Yakobusi e Yohanesi sesovera so nie verausari esi pasia pa, sesajo siniotu pa sepau sesorum sia. Siniotu veruin sasavu kavo aniau na Torat pa esia, aja senggavo vavera tutiri Yesus nie verausari pasia rami. 15Nana rabua siniotu vepau jasia sesajo Yesus pa, setandor e setapai vediori. 16Avori Yesus duta maso nie verausari pasia e diojo, “Vitoini menggavo vavera tutiri siniotu veruin sasavu kavo aniau na Torat pasia pa?” 17Nana siniotu vepau jasia, esi ruar e diojo, “Guru, ikor ine atuma nei maso Au. I ma sore pa mumuja aso wainunu vekariria pai ria savui pana. 18Nana rabua wainunu vekariria pai ria savui pa mamo, wainunu jani biari avav so kakopa pa, sore pai vie wopapus, kieri tawana dere pasi e nie tarai pai bieririwi. Isau so Nomu verausara au pasia ave amamo setatavar wainunu vekariria jani, vape sia ma kasa diadi va.” 19Apavo Yesus kievo maso sia e diojo, “Hei, Siniotu nine mia, mia ma vevata mo siniotu vesanemitiar va pa mia na. Ja ma inana tutiri mia to woroi, vape aja mesanemitiar maso Jau varami, jenota mia veito nari raria tonina ea? Menggor atuma jani maso nine!”

20Avori senggoro atuma jani maso Yesus. Na rabua wainunu vekariria jani siejo Yesus pa, dionae atuma jani nie tarai pai tienandor apajoma tiawa e kiediduira na kakopa pa. Sore pai vie wopapus. 21Avori Yesus duta maso atuma pai tamani e diojo, “Mierior ariri nine woroi pa toi?” Tamani ruar e diojo, “Nana aja miedia pa! 22Wainunu vekariria jani tawana dionie tiawa so adia pai pivai so kambu pai raro pa ave dio muni. Amasau buono viate pai e sanepai ama, masisi Jai diadi mamo, buono panam pai maso atuma nei.” 23Yesus ruar e diojo, “Aso vitopi kuevo e buojo, ‘Masisi Jai diadi mamo?’ Allah ma diadi so nienari pi vura maso siniotu vesanemitiar maso Allah pasia pa!” 24Sawawarae atuma jani tamani dienanar e diojo, “Syen, isanemitiar, vape ine sanetiar nei miendi. Sanepai jau ave amamo isanemitiar rawai ea!” 25Nana rabua Yesus siejo siniotu vepau pasia sendama e sesorumi pa, kievo suara wainunu vekariria pai e diojo, “Wainunu vekariria panau, buonae atuma pai sore pa mumuja e taradiau pasi sipoja pa, ive pareta au, suvi vurusu atuma ninei e sua riwanea so i vape moja!” 26Wainunu vekariria jani dienanar, e dionae atuma jani nie tarai pai tienandor, janama suvi vurusu atuma pai. Atuma jani vieva ariri wominggo apajoma siniotu pasia vura senggavo e setojo, “I ma vioru to manau!” 27Vape Yesus diekara rut na atuma pai vara pa e diedidini atuma jani siobatai, avori diosa.

28Nana rabua Yesus niana anio pai to manau pa, e nie verausari pasia semesari tutir I, avori setuta maso I e setojo, “Aso vitopi diadi va so amatatavar wainunu vekariria jani pa?” 29Yesus ruar maso sia e diojo, “Wainunu vekariria ninesi ma, kasa metatavarsi va, vape membe nadi pino diadi so metatavarsi pe.”

Yesus tiopa na Nie voru pai

(Mat. 17:22-23; Luk. 9:43-45)

30Yesus tutiri nie verausari pasia senda vurusu uta jana e senda kara Galilea. Yesus kiembarai siniotu pesi ruina toapa niana jana, 31aso andija dieniniau nie verausari pasia rami. Apa kievo so sia e diojo, “Nari esi siwi Atuma Siniotu pai maso siniotu vene paja pasia, e nari semuni, vape nana raria veve toru pai nari tienam riwanea.” 32Nie verausari pasia setatara kavo Yesus kievora pasi, vape sematai setuta maso I.

Teini bieba mo na rabua Nie verausari pasia pa

(Mat. 18:1-5; Luk. 9:46-48)

33Janama Yesus tutiri nie verausari pasia sendama so Kapernaum. Nana rabua sesua so anio pai raro pa, Yesus duta maso nie verausari pasia e diojo, “Vitoini erine menggavo vavera nana rara pai pa?” 34Vape sepeja, aso sembaririwi nana rara pai so teini bieba mo na rabua sia pa.4 35Yesus miesoi e ruiri nie siniotu sura e muandu verausari pasia. Kievo maso sia e diojo, “Teini dio tieriai mo na rabua mia pa, i ma nari miajara kior uta vena dou mo e nienaripi maso siniotu vura.”5 36Janama Yesus kior atuma katu pesi e dionae diosa nana sene kasau rabua pa. Yesus tiepu atuma jani e kievo maso nie verausari pasia e diojo, 37“Teini dio kior atuma katu ninei na sano ne mamo, i ma kior Jau. E teini kior jau mamo, i ma kior Jau vea va, vape kior Allah viamiasa Jau pai kota.”6

Teini dierandu mia va, i ma niavori mia

(Luk. 9:49-50)

38Avori Yohanesi kievo maso Yesus e diojo, “Guru, amasajo siniotu pesi dietavar wainunu vekariria nanapi sanomu pa, apa amataranduni, aso i ma ria usara tata va pana.” 39Vape Yesus kievo e diojo, “Metaranduni vape moja, aso esi nienari pitandor pesasi nana sano ne pa, i ma kasa saira e sisiajara Ja va. 40Teini kievo vavera tutiri tata va mamo, i ma niavori tata.7 41Vevata mo ikavo maso mia! Teini diono kambu pesa maso mia e metunu aso menggor usara Kristusi pana, tindija mamo i ma nari siemuai nie vaiti pai.”8

Nanapi vava veve diajara senanari tatar pasi

(Mat. 18:6-9; Luk. 17:1-2)

42“Teini viediajarae siniotu pesi nana atuma katu nine sia, ave sanetiar Jau va mamo, vesie rawai pa rovuki pimasa pesi kiesie na siniotu jani rao pa, e vekei na rawana pai raro pa. 43E masisi varamu pa suronae nuenari tatar mamo, tuaratu varamu pa! Aso vesie rawai pa tuenam tutir varamu vetaitu pa to woroi-woroi, nanapa varamu pa sandu vape nari sua so neraka pai, andina adia veveviar vei vea pai. 9[44Na wana adia pai kasa vioru va, e avi pasi kasa sivoru va.] 45E masisi aemu pa suronae nuenari tatar mamo, tuaratu aemu pa. Vesie rawai pa tuenam nana aemu vekapau pa to woroi-woroi, nanapa aemu pa sandu vape nari sua so neraka pai. [46Na wana adia pai kasa vioru va. E avi pasi kasa sivoru va.] 47E masisi remu pa suronae nuenari tatar mamo, kuewar remu pa! Vesie rawai pa sua so uta Allah vie pareta ariri Raja pa nana remu pa siri, nanapa remu pa sandu vape nari sua so neraka pai.10 48Na wana adia pai kasa vioru va, e avi pasi kasa sivoru va.11

49Allah nari tieto siniotu vura, masi ariri sesamuai sasi viana na adia pai.

50Sasi pai ma diete, vape masisi sasi pai vie kambu, apavo nari diadi tatoni e vie sasi riwanea e?12

Ariria mamo tawana mesamuai sasi nanapi mene tarai pai e tawana metenam nana mari pai tutiri siniotu vura.”