Skip to content
BibleKenya

Alkitab Bahasa Wondama

Markusi 10

Yesus dieniniau nanapi mua pai tutiri vavi pai sunggambarai sandu pa

(Mat. 19:1-12; Luk. 16:18)

Janama Yesus vievu vurusu Kapernaum e ria so uta Yudea tutiri maria Yordan rawesi pa. Nana jana kota siniotu vepau pasia sendama ea sesorum wawari Yesus. E Yesus dieniniau sia ariri nienari ora pa. Siniotu Farisi pasia sendama so I ave sesotouru Yesus. Setuta maso i e setojo, “Ariri tane hukum agama pai mamo, diadi so sawa pesi kiembarai vinie pai e?” Yesus ruar e diojo, “Musai diono pareta vitoi maso mia pa?” Senduar e setojo, “Ariri Musai nie pareta pai, siniotu pesi diadi so kiembarai vinie pai tutiri vui surat vekea pai e dioni so i.”1 Vape Yesus kievo maso sia e diojo, “Aso mendumi pasi sikarakuai mo pana apavo Musai vui pareta jani so mia pa. Vape nana retena pa, nana rabua Allah nienari dunia nei pa, I ma nienari siniotu, mua tutiri vavi pa sandu.2 Aso janapa mua pesi nari vievuru tamani e siniani sandu e vie siri tutiri vinie pai,3 apavo sandu ma sumbe siri. Toapa jana mamo sa sumbe muandu ea va, vape sumbe siri. Apavo, Allah dionae mua pai tutiri vavi pai sumbe siri to manau, siniotu kasa dionae sunggambarai sandu va!” Janama sesua sovera so anio pai raro pa. Avori Yesus nie verausari pasia setuta riwanea maso I nanapi sunggambarai sandu pa. Yesus kievo maso sia e diojo, “Teini kiembarai vinie pai avori ririau tutiri vavi vevesiei pesi mamo, siniotu jani nienari kavo vavi e vie tatar so vinie retena pai.4 Toapa jana kota vavi pai kiembarai sawani avori ririau tutiri mua vevesiei pesi mamo, i ma nienari kavo mua e vie tatar so sawa retena pai kota.”

Yesus diono vesie pai maso atuma pasia

(Mat. 19:13-15; Luk. 18:15-17)

Siniotu pesia senggor atuma katu pasia maso Yesus ave amamo pir vara pa ajai so atuma katu pasia e diono vesie pai maso sia. Vape Yesus nie verausari pasia senggasiou siniotu jasia. Nana rabua Yesus siejo vava jana pa, kiesiou e kievo maso Nie verausari pasia e diojo, “Metonae atuma katu pasia sendama so jau! Metarandu sia vape moja, aso siniotu vetoapa atuma katu pasia, sembe kaiwasa nana Uta Allah vie pareta ariri Raja pa. Vevata mo itopa so mia, teini kiorusara Allah va ariri atuma katu pesi, kasa vie kaiwasa nana rabua Allah vie pareta ariri Raja pa va.”5 Manau na Yesus kievo tonine pa, tiepur atuma katu pasia, janama pir vara pa ajai so sia e diono berkat pai maso sia.

Siniotu vesamuai pi vepau pesi

(Mat. 19:16-30; Luk. 18:18-30)

Nana rabua Yesus suvi e andija ria rami, siniotu pesi diepai maso I. Siniotu jani disa aebu pa sandu na aropo Yesus, avori dutani e diojo, “Guru viate panau, nari inanari vitoi ave isamuai tenam to woroi-woroi?” Yesus duta maso i e diojo, “Aso vitopi kuevo e buojo jete pa? Varo siniotu viate, vape Allah miesari andi diete vea. Au ma ruini Allah nie pareta pai to manau, mu siniotu vape moja, nuenari kavo vavi vape moja, buemanana pi vape moja, tuopanusara kavo viawia vape moja, buawi tituwa vape moja, tuetuana tamamui e siniamui sandu.”6 Siniotu jani kievo e diojo, “Jai Guru, pareta jasi vura ma ira aririasi to manau nana aja ivavoru pa.” Yesus dieduata siniotu jani tutiri sanepai, kievo maso i e diojo, “Vava pa siri ea andi aja nuenari varami. Vuevu ave vuovo nomu pi pasi vura e buono pipi pasi maso siniotu vevaro pi pasia, e nari suemuai pi na rora wa. Manau mamo ruama rua usara Jau” Siniotu jani diediawa Yesus kievo tojana pavo, tiendor vesiri avori ria vurusu uta jana tutiri sane pa kariria aso nie pi pa pau pana.

Apavo Yesus dieduata Nie verausari pasia, avori kievo maso sia e diojo, “Marabat vesiri so siniotu vesamuai pi vepau pesi sua nana uta Allah vie pareta ariri Raja pa!” Yesus nie verausari pasia setadiawa kievo pa senggavo usara vesiri. Vape Yesus kievo ea, “Ine atuma pa mia, marabat vesiri so sua nana uta Allah vie pareta ariri Raja pa! Tapisa rawai maso unta pesi sua nana ret pai nie kamberei pai vurusu siniotu vesamuai pi vepau pesi sua nana uta Allah vie pareta ariri Raja pa.” Setadiawa Yesus nie kavavo pasi pa, Nie verausari pasia senggavo usara pa rawai ea e setuta vaveri sia, “Masisi tojana mamo, teini diadi so siemuai Vesie pai?” Yesus dieduata sia e ruar e diojo, “Siniotu pai ma sa diadi so diono vesie so matauni va, vape Allah diadi so diono vesie so siniotu, aso piaja so nienari pi vura.”

Vaiti na verausara Yesus pa

(Mat. 19:27-30; Luk. 18:28-30)

Avori Petrusi kievo maso Yesus e diojo, “Jai, ruini amanda vurusu amane pi pasi vura to manau ave amanda usara Au.” Yesus ruar e diojo, “Vevata mo, itopa so mia, siniotu vevavu vurusu nie anio pai, romi, raruo mua pai pivai vavi pai, siniani piva tamani, atuma pasia, aso ria usara Jau e tiopanusara Kavo Vesie pai, nana rabua nine siniotu jani ma nari siemuai utin siri rawai ea: romi, anio, neta mua e raruo vavi, siniani, e atuma, e siemuai kariria saserai kota. Vape nari raria verama wai mamo siemuai tenam to woroi-woroi mo pai. Vape siniotu pa sepau nana raria ninei sepapo ma nari sembe siniotu vepui e siniotu vepau nana raria ninei sepui ma nari sembe siniotu vepapo.”7

Yesus kievo nanapi Nie voru veve toru pai

(Mat. 20:17-19; Luk. 18:31-34)

Yesus tutiri Nie verausari pasia aja senana rara pai rami so Yerusalem. Yesus ria na dopo pa. Nie verausari pasia vura setandor e esi verausari nana dopui pasia sematai. Janama Yesus siau Nie siniotu sura e muandu verausari pasia ea e tiopa maso sia vitopi nari vediadi maso I Kievo so sia e diojo, “Metadiawa! Nine ma tanda so Yerusalem. Na wana Atuma Siniotu pai ma nari sesiwi maso imam veveru pasia e siniotu veruin sasavu kavo aniau na Torat pasia. I ma nari siemuai hukuman voru pai, janama sesiwi maso siniotu Yahudi va pasia. Sia ma nari sesisiajari, sengganisui, sendasi, e sepai na aitabat pai. Vape nana raria veve toru pai ma nari tienam riwanea.”

Yakobusi e Yohanesi sune sau pai

(Mat. 20:20-28)

Avori Yakobusi e Yohanesi Zebedeusi atu pa sandu sundama so Yesus e surojo, “Jai Guru amusau so Au nana pi pa siri nuenari so nandu!” Avori Yesus duta sandu e diojo, “Vitopi mumajari ve inanari maso mandu pa?” Sunduar e surojo, “Nana rabua nari vue pareta ariri Raja pa, amumajar so amumasoi nana nomu rawa vata pa e nomu rawa sara pa.” Vape Yesus ruar e diojo, “Mandu ma munduini va so pi vitoini musau pa. Avo mupaja so murunu toki vionu tutiri marior masi ariri nari junu pa e mupaja so musamuai kambu masi ariri kambu masi nari isamuai pa e?”8 Sunduar e surojo, “Nandu ma amupaja.” Avori Yesus kievo e diojo, “Vata nari murunu toki vionu masi ariri junu pai e musamuai kambu masi pai ariri kambu masi isamuai pa. Vape nanapi teini nari miesoi na Ine rawa vata pa pivai Ine rawa sara pa, Jau ma ipaja so ikutu va. Allah matauni nari kutu maso teisia nari semasoi na uta jana pa.”

Nana rabua Yesus nie siniotu sura e muandu esi verausari pasia setadiawa vava jana pa, senggasiou maso Yakobusi tutiri Yohanesi sandu. Apa Yesus siau sia vura, avori kievo e diojo, “Menduina toapa veveru nana pareta veruini Allah va pasia setono pareta vemarabat maso sene kaiwasa pai. E veve baba pasia setono pareta vekariria maso sia.9 Vape mia ma metoto jana vape moja. Sovera ea mamo, teini dio bieba na rabua mia mamo, siniotu jani nienaripi so mia ariri womi pesi.10 E teini dio sieru na rabua mia mamo, siniotu jani andi vie womi so mia vura. Aso Atuma Siniotu pai riama ave amamo siniotu senanaripi so I va, vape I ma riama ave nienaripi so sia. E siwi nie tenam pai veito vioru ave kior vesie pai maso siniotu vepau pasia.”

Yesus diono panam so Bartimeus veremi kaber pai

(Mat. 20:29-34; Luk. 18:35-43)

Yesus tutiri nie verausari pasia sendama so bendar Yerikho. E nana rabua sembavu vurusu bendar jani pa, siniotu vepau pasia senda usara sia. Nana rabua jana siniotu veremi kaber pesi miesoi na ria dere pa e siau pipi. Sano pa Bartimeusi, Timeusi atu paina. Nana rabua diediawa toapa Yesus siniotu Nazaret pai ria tuwa na jana pa, dienanar e diojo, “Yesus, Dauti atu panau! Sanepai jau!” Siniotu vepau pasia senggasiowi e setamiasi pieja. Vape dienanar to baba rawai ea, “Dauti atu panau, sanepai jau!” Apavo Yesus ria to diosa eti avori kievo e diojo, “Mesauwi!” Apa sesau siniotu veremi kaber jani. Senggavo maso i e setojo, “Muenasi! Buosa, Yesus siau au” Siniotu veremi kaber jani tiavi nie sasu viaroi pai, avori saira e diosa e ria so Yesus. Yesus dutani e diojo, “Vitoini muajar ve inanari so au pa?” Siniotu veremi kaber jani ruar e diojo, “Jai Guru, imajar so isajo.” Yesus kievo so i e diojo, “Rua, aso sanetiar maso jau, apavo puenam.” Nana rabua jana kota siniotu pai diadi siejo. Avori ria usara Yesus nana nie rara pai.

Source notes (10)
  1. Cross-reference Ul. 24:1-4; Mat. 5:31
  2. Cross-reference Kej. 1:27, 5:2
  3. Cross-reference Kej. 2:24
  4. Cross-reference Mat. 5:32; Luk. 16:18; 1Kor. 7:10-11
  5. Cross-reference Mat. 18:3; Luk. 18:17
  6. Cross-reference Kel. 20:12-16; Ul. 5:16-20
  7. Cross-reference Mat. 20:16; Luk. 13:30
  8. Cross-reference Luk. 12:50
  9. Cross-reference Luk. 22:25
  10. Cross-reference Mat. 23:11; Mrk. 9:35; Luk. 22:26

Alkitab Bahasa Wondama. Copyright © The Seed Company. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.