Skip to content
BibleKenya

Alkitab Bahasa Wondama

Markusi 2

Yesus dionae siniotu vemarera pai pienam

(Mat. 9:1-8; Luk. 5:17-26)

Mukara raria pa toi to manau, janama Yesus siovera so Kapernaum. Apavo siniotu pasia setadiawa raupui toapa Yesus andi niana anio jani. Apa siniotu pa sepau sendama. Sesorumi, veito varo uta ea na anio jani raro pa, senggotar na dopo rature pai kota. Janama Yesus tiopana usara Allah nie kavo pai maso sia. Nana kasau Yesus kievo pa, siniotu pa sembe at sesariou siniotu vemarera pesi e senggori maso Yesus. Vape diadi so senggori maso I va, aso kaiwasa pai piau, apa setita nandau pasi, na uta Yesus miesoi nana pa, janama setu siniotu vemarera pai tutiri andiau viata nana pai. Nana rabua Yesus siejo sene sanetiar pasi, kievo maso siniotu vemarera pai e diojo, “Hei ine atuma panau, suemuai ampun so nomu tatar pasi to manau!” Vape siniotu veruin sasavu kavo aniau na Torat pasia semasoi na jana kota, senggavo na sesanemi raro pasi, “Aso vitopi siniotu ninei kievo tojana pa? I ma sisiajara Allah. Teini piaja so vie ampun tatar pa? Allah matauni pino.” Vape sawawarae Yesus ruini sene sanepaja pasi, avori kievo maso sia e diojo, “Aso vitopi metuta tojana nana mesanemi raro pasi pa? Vitopi tapisa rawai, ikavo maso siniotu vemarera ninei e jojo, ‘Nomu tatar pasi ive ampunasi to manau’, pivai jojo ‘Suobatau, kuor nomu andiau pai e rua’? Vape amamo menduina, toapa na dunia nei Atuma Siniotu pai ma piaja so vie ampun tatar pasi pa.” Janama Yesus kievo maso siniotu vemarera pai e diojo, “Suobatau, rusasana nomu andiau pai e vuevu raso nomu anio pai!” Biatai e sawawarae rusasana nie andiau pai avori suvi e ria. Siniotu pa sepau sesajo vava jana, setandor e sesanandiki Allah, e senggavo e setojo, “Aja tasajo pi vetoapa nine varami!”

Yesus siau Lewi

(Mat. 9:9-13; Luk. 5:27-32)

Manau pa Yesus ria ea na ruru Galilea dere pa, e siniotu vepau pasia sendama so I, avori dieniniau sia. Janama Yesus ria na jana, siejo Lewi, Alpeusi nie atuma paina, miesoi na anio vesau pajak pai. Avori Yesus kievo maso i e diojo, “Rua usara Jau!” Apa Lewi biatai e ria usara Yesus. Nana rabua Yesus diapi na Lewi nie anio pai, vesau pajak pasia e siniotu veve tatar pasia sepau vesiri setapi tutir I e Nie verausari pasia, aso siniotu pa sepau senda usari. Siniotu veruin sasavu kavo aniau na Torat pasia ma sembava nana kuaruvi Farisi pai sesajo toapa Yesus diapi tutiri vesau pajak pasia e siniotu veve tatar pasia. Apa setuta maso Nie verausari pasia e setojo, “Aso vitopi mene guru pai diapi tutiri vesau pajak pasia pa e siniotu veve tatar pasia pa?” Yesus diediawa sene utana pai, avori ruar e diojo, “Siniotu vepanam pai ma sa siesera dokter va, vape siniotu vepota paini siesera dokter vea. Irama ave isau siniotu vetindija pasia va, vape isau siniotu veve tatar pasia.”

Nanapi sembe puasa pa

(Mat. 9:14-17; Luk. 5:33-39)

Nana raria pesi pa, Yohanesi viono kambu masi pai, nie verausara pasia tutiri siniotu Farisi pasia aja sembe puasa rami. Avori esia sendama so Yesus e setutani e setojo, “Aso vitopi Yohanesi viono kambu masi pai nie verausara pasia e siniotu Farisi pa sene verausara pasia, sembe puasa pa, vape Nomu verausara nesia ma piva e?” Yesus ruar e diojo, “Nana rabua mei vavindiriau pesi, e mua veririau vavoru pai nia tutiri nie maneta pasia mamo, apa sembe puasa te? Kasa diadi va. Vape nana raria pesi mamo, nari siniotu pesia senggor mua veririau vavoru pai vurusu nie maneta pasia. Nana raria jani, avori sembe puasa. ” Yesus kievo ea so sia e diojo, “Sa esi diawar tupu sasu tawa pai tutiri sis sope vavoru pesi va. Aso sis jani nari sierap sisui e dionae sasu tawa pai mieraba, apajoma viediajarae maraba pai bieba rawai ea. Toapa jana kota, kasa esi siara anggur vavoru pesi susa rota piaum rawa tawawari pesi va. Aso sua anggur jani nari dionae rota pai miesabu, apajoma sua anggur pai tiebubue niai e rota pai kieriria. Apavo sua anggur vavoru pai ma nari siara nana rota vavoru pai kota!”

Yesus nie verausari pasia setema gandum buo pasi nana raria Sabat pai

(Mat. 12:1-8; Luk. 6:1-5)

Nana raria Sabat pesi pa, Yesus tutiri Nie verausari pasia senda na romi gandum pai, kasau jana Nie verausari pasia setema gandum buo pasi.1 Avori siniotu Farisi pasia senggavo so Yesus e setojo, “Aso vitopi Nomu verausara pasia sendawai tane hukum agama pai pa, tutiri senanaripi viaranduna nana raria Sabat pai pa?”

Yesus ruar e diojo, “Aja metap vitopi Dauti nienari pa varami pe? Nana rabua i tutir nie verausari pasia sembavisi e sembaro pisia pa.2 Nana rabua Abyatar vie Imam Baba pai, Dauti sua so Anio Syen pai, e dian mamami viona ve pisom maso Allah pasi to manau. E mamami jasi dionasi kota maso nie verausari pasia. Vape nanapi tane agama pai ma, imam pasia diadi so seta mamami pasi vea.”3 Avori Yesus kievo ea e diojo, “Allah nienari raria Sabat pai ave sanepai siniotu, sa diono marabati so siniotu va. Apavo Atuma Siniotu paini piaja so Raria Sabat pai.”

Source notes (3)
  1. Cross-reference Ul. 23:25
  2. Cross-reference 1Sam. 21:1-6
  3. Cross-reference Im. 24:5-9

Alkitab Bahasa Wondama. Copyright © The Seed Company. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.